¹ Jakkobbu wakalikukkala munyika oomo wisi mwakali kukkala, munyika ya Kkenani. ² Eezi zyakali zichitiko aatala aJakkobbu. Josefa, ooyo wakali mulombe ulaminyaka ilikkumi amusanu ayibili, wakalikwembela butanga abakkulana bakwe. Wakali abana balombe ba Biliha abana balombe ba Zilupa, banakazi bawisi. Josefa wakeeta makani mabi atala ambabo kuliwisi. ³ Lino Izilayeli wakayandisya Josefa kwinda bana bakwe balombe boonse nkambo wakalimwana wabuchembele bwakwe. Wakamuchitila jansi bbotu. ⁴ Bakulana bakabona kuti wisi wakamuyandisya kwinda bakulana bakwe boonse. Bakamusula alimwi tebakachili kwambula kabotu pe anguwe. ⁵ Josefa wakalota alimwi wakambila bakulana bakwe aatala anchicho. Bakayindilila kumusula. ⁶ Wakati kulimbabo, "Aakaka amuswilizye chiloto nchindakalota. ⁷ Amubone, twalikwaanga misunta yamayila mumuunda, musunta wangu wakabuka wayima nji, alimwi amubone, misunta yanu yakazyunguluka akukotamina musunta wangu." ⁸ Bakulana bakwe bakati kulinguwe, "Nchobeni uyootwendelezya na? Ndisimpe na kuti uyotwendelezya? Bakayindilila kumusula loko nkaambo kaziloto amajwi aakwe. ⁹ Wakalota alimwi ichimbi chiloto waambila bakulana bakwe. Wakati, "Mubone, ndalota chimbi chiloto: Izuba amwezi anyenyezi zili kkumi ayimwi zyandikotamina." ¹⁰ Wakachambila wisi mbuli mbakabuzya bakulana bakwe mpawo wisi wakamukalalila. "Nchichili chiloto eecho nchiwalota? Nkasimpe na kuti banyoko, ime abakulana bako nchobeni tuzosika tuzokuvundame aansi kuli nduwe?" ¹¹ Bakulana bakwe bakaba abbivwe anguwe, pesi wisi wakamba kaambo mumizeezo yakwe. ¹² Bakulana bakwe bakayinka kuya kukwembela mbelele zyawisi kuSyekkemu. ¹³ Izilayeli wakati kuli Josefa, "Ani bakulana bako tabalokwembela mbelele zyawuso na kuSyekkemu? Boola alimwi nkutume kuli mbabo." Josefa wakati, "Ndilibambilide." ¹⁴ Wakati kulinguwe, "Yinka lino ukakubone kuti kulikabotu na abakulana bako alubo kuti bulikabotu na butanga, mpawo undizide aajwi."Aboobo Jakkobbu wakamutuma kuzwa kumusena waHebbuloni, alimwi Josefa wakaya kuSyekkemu. ¹⁵ Umwi mwalumi wakajana Josefa. Boona, Josefa wakali kuyabwenda mumuunda. Ooyu mwalumi wakamubuzya, "Ulangulaanzi?'' ¹⁶ Josefa wakati, ''Ndookuyandula bakulana bangu. Ndambile inche ooko nkubalo kweembelela imbelele." ¹⁷ Mwalumi wakati, bazwa aabusena oobu, ndabamvwa nkabalokuti , ''Atuye kuDotaani."' Josefa wakatobela bakulana bakwe alimwi akuyobajana kuDotaani. ¹⁸ Bakamubona kachili kule ambabo , alimwi katanasika afwifwi ambabo bakayandula nzila yakuti balamuchita byeni. ¹⁹ Bakulana bakwe bakati kuli umwi awumwi, "Mulange ooyo sizilito uzabuza. ²⁰ Mubole lino, aboobo, atumujaye akumuwaala muli limwi lyamalindi. Tulowamba kuti, 'munyama wamusokwe wamulya. Tuzozibona kuti ziloto zyakwe." ²¹ Lubbeni wakamvwa alimwi wakamuvuna kumaanza aabo. Wakati, "Atutatoli buumi bwakwe." ²² Lubbeni wakati kulimbabo, "Mutatili ganzi. Mumuwalile mudindi lilimunkanda, pesi muleke kubikka janza alinguwe" - kuchitila kuti amuvune kuzwa kujaanza lyabo kuti amwete lubo kuli wisi. ²³ Nikwakasika awo Josefa nakasika kubakulana bakwe, bakamusamununa chikobela chakwe chibotu. ²⁴ Bakamubweza akumuwalila mudindi . Idindi telyakaala chintu pe mukati. ²⁵ Bakakkala aansi kuti balye insima. Bakatambya meso abo alimwi balanga, alimwi, amubone, mulongo waba Isyumayeli wakalikuzwa ku Giliyadi, ankamela zyabo kabanyampwide zilisyo amusamu atununkilizyo. Bakalikuya bweenda kabanyapwide kabaya kuIgipiti. ²⁶ Juda wakati kubakulana bakwe, ''Chitupa mpinduunzi kuti twajaya mwanike wesu akuvwikkila ganzi lyakwe? ²⁷ Mubole, alimwi tumuuzizye ma Isyumayeli alimwi tatubiki maanza esu pe alinguwe. Nkambo mwanike wesu, ninyama yesu. Bakulana bakwe bakamuswilizya. ²⁸ Basambazi baba Midiyona bakayinda mpawo, bakulana bakwe bakagwisya Josefa kuzwa mudindi. Bakawuzya Josefa ku ma Isyumayeli a makumi aabili ansiliva. Ba Isyumayeli bakayinka awe ku Ijipiti. ²⁹ Lubbeni wakabweda kudindi, amubone, Josefa taakachilimo pe mudindi. Wakadelula zisamo zyakwe. ³⁰ Wakabweeda kubakulana bakwe akwamba kuti, "'Mulombe tachiko pe! Alimwi ime njinke kuli?'' ³¹ Bakafunda mpongo mpawo bakabweza chigogo cha Josefa akuchinika muganzi. ³² Mpawo bakacheta kuli wisi akwamba kuti, "Twajana eechi. inche langa amwi nchicho chigogo chamwanaako naakuti pe." ³³ Jakkobbu wakachilangisisya akwamba kuti , Nchigogo chamwana wangu. Munyama wamusokwe wamulya. Josefa nchobeni wazavulwa. ³⁴ Jakkobo wakadelula zigogo zyakwe akubika saka muchikungu. Wakalila mwanakwe kwamazuba miingi. ³⁵ Boonse bana bakwe balombe abasimbi bakabuka kuti bamumbulizye, pesi wakakaka kumbulizigwa. Wakati, ''Inchobeni ndoyinka aansi mukabanda nkindobulila mwanaangu." Wisi wakamulilila. ³⁶ Ba Midiyeni bakamuzya kuIjipiti kuli Potifa , umwi silutwe waFalo, mupati wabasikamulinda.