¹ Lino Abbulahamu wakali wachembaala loko alimwi Jehova wakali mulongezezye muzintu zyoonse. ² Abbulahamu wakati kumulanda wakwe, ooyo wakali mupati kuli basin'anda bakwe alimwi wakali mubambi wazezyo nzyakali aazyo, ''Bika kuboko kwako kunsi achibelo changu ³ alimwi ndiyokuchita kuti ukakonke kuli Jehova, ooyo Leza wamajulu alimwi ooyo Leza wenyika, tokoyojani mwanakazi wa mwana wangu mulombe kuzwa kubana basimbi ba baKkenani, mbeyakide munzi aakati kabo. ⁴ Pesi iwe weelede kwiinka kunyika yakulindiswe, alimwi kunzubo zyangu, alimwi ukajanine mwanakazi mwana wangu mulombe Izaka.'' ⁵ Mulanda wakati kulinguwe, ''Anikuti mwanakazi kaya kunditobelakunyika eyi? Ani ndikabweze na mwana wako ndikabwede awe kuzwa kunyika nkuwazwa? ⁶ Abbulahamu wakati kulinguwe, "Ba akasimpe kuti utakabwezi mwanaangu kuti ubwede awe okuya. ⁷ Jehova leza wakujulu, oyo wakandigwisya kuzwa kunganda yandende alimwi kuzwa kunyika yanzubo zyangu, alimwi oyo wakandisyomezya chinkonke chinichini wakati, 'Ku lunyungu lwako ndiyokupa nyika eyi,' uyotuma angelo wakwe kunembo musulaako, alimwi uyojanina mwanaangu mulombe mwanakazi kuzwa ooko. ⁸ Pesi na mwanakazi katayandi kukutobela, mpawo iwe uyowangunuka ku chikonke changu. Luzutu iwe toyelede kubwedezya mwana wangu okuya.'' ⁹ Aboobo mulanda wakabika kuboko kwakwe kunsi lyachibelo cha Abbulahamu simalelo wakwe, alimwi wakakonkezya kulinguwe aatala amajwi aaya. ¹⁰ Mulanda wakabweza kkumi lyambon'olo zya simalelo wakwe alimwi wakanyampuka. Wakabweza lubo anguwe zipo zyamisyobo yoonse kuzwa kuli simalelo wakwe. Wakanyampuka alimwi wakaya kubusena bwa Alam Nahaleyimi, kuchisi cha Neha. ¹¹ Wakachita kuti mbongolo zyakwe zifugame aansi kunze lya chisi kumbali esawu lya manzi. Lyakali golezya, chiindi bakayintu nibaya kuyoteka manzi. ¹² Mpawo wakati, ''Jehova, Leza wa simalelo wangu Abbulahamu, ndipe kuzwidilila sunu alimwi tondeezya chizuminano chisyomekede kuli simalelo wangu Abbulahamu. ¹³ Langa, aawa mpundiimvwi akasensa kamanzi, alimwi bana basimbi ba baalumi bachisi balasika kuzoteka manzi. ¹⁴ Leka zichitike oobu. Eelyo nindati kumwanakazi muniini, 'Ikaka tula nongo yako kuti nkanywe,' alimwi akatedi kulindime, 'Nywa, alimwi ndiyonywisya ankamela zyakoazilazyo, elyo abe nguwe oyo nguwe tondekela mulanda wako Izaka. Azezi ndiyo ziba kuti watondezya chizuminano chisyomekedekuli Simalelo wangu. ¹⁵ Kwaba kuti nikuba naka manisya kwambula, amulange, Lebekka wakaza anongo yakwe yamanzi amakkuko akwe. Lebekka wakazyalwa kuliBbetuweli mwana mulombe waMikka, mwanakazi waNaho, mukulana wa Abbulahama. ¹⁶ Mwanakazi munini wakali mubotu loko alimwi nkali nakalindu. Takazi mwalumi. Wakiinka ansi kukasensa, wazuzya nongo yakwe alimwi wakazwa. ¹⁷ Aboobo mulanda wakachijana kuyomuswanizya alimwi wati, " Ikaka ndipe nywe bunini manzi kuzwa munongo yako," ¹⁸ wakati, "Nywa simalelo wangu," alimwi wakafwambana kutula nongo mumaboko akwe, alimwi wakamupa wanywa. ¹⁹ Elyo nakamana kumupa akunywa, wakati "Ndiyotekela ankamela zyako manzi azilazyo kusikila zikamane kunywa." ²⁰ Elyo wakafwambana alimwi wapimpa nongo mumutiba , aboobo wakachijana lubo kusawu kukuteka manzi, alimwi wakatekela inkamela zyakwe zyoonse manzi. ²¹ Mwalumi wakamwebela chumunizi kuti abone kana Jehova wazwidilizya lwendo kana pe. ²² Mankamela nakamanisya kunywa, mwalumi wakagwisya chisila changolida chakala bulemu bwechisela chaShekkeli, alimwi anchoko zyangolida zyobile zyakumaboko zilabulemu buli maShekkeli makumi, ²³ alimwi wakabuzya, "Uli mwana musimbi wani? Ndambile kaka, kulibusena na kunganda yawuso kuti swebo tukoone kwabusiku?" ²⁴ Wakati kulinguwe, "Ndimwana musimbi wa Bbetuweli mwana mulombe waMikka, oyo ngwakazyala kuliNaho." ²⁵ Wakati lubo kunguwe, "Tulabwingi bwizu alimwi azyakulya, alimwi abusena bwakoona kuti ukamanisye busiku." ²⁶ Elyo mwalumi wakakkotama aansi alimwi wakakkomba Jehova. ²⁷ Wakati, " Ngalumbwe Jehova, Leza wasimalelo wangu Abbulahamu, wakatasiya chizuminano chakwe chakusyomeka alimwi kusyomekesya kuli simalelo wangu. Mbuli kuli ndime, Jehova wandizulwida wandilulamika kunganda yaLuzubo lwasimalelo wangu. ²⁸ Elyo mwanakazi munini wakachijana alimwi wakabuzya basinganda yabanyina atala azintu ezi zyoonse. ²⁹ Lino Lebekka wakali amunyandumi, alimwi izina lyakwe wakali Labbani. Labbani wakachijana kumwalumi wakali aanze kumugwagwa wakukasensa. ³⁰ Elyo nakabona chisita alimwi anchoko kumaboko amuchizi, alimwi elyo nakamvwa mabala aLebekka muchizi wakwe, " Ezi nzizyo oyu mwalumi nzyawamba kulindime," wakinka kumwalumi alimwi akumubona, wakalimvwi kumbali ankamela zyakwe kukasensa. ³¹ Elyo Labbani wakati, "boola iwe nolongezedwe waJehova. Kaambonzi noyimvwi aanze? Ndakubambila nganda, alimwi abusena bwenkamela." ³² Aboobo mwalumi wakaza kunganda alimwi akwangununa nkamela. Nkamela zyakapegwa bwizu alimwi azyakulya, oyu mwalumi wakapegwa manzi akusamba mawulu akwe amawulu ababo mbakalabo. ³³ Bakabika chakulya kunembo lyakwe kuti alye, asi wakati, " Nsikoyolya kusikila ndambe ezyo nzyeyelede kwamba." Aboobo Labbani wakati, "Ambula." ³⁴ Wakati, "Ndilimulanda wa Abbulahamu. ³⁵ Jehova ulimulongezezye simalelo wangu alimwi waba mupati. Wakamupa mbelele angombe, ansiliva angolide, balanda balumi abanakazi, ankamela amadonki. ³⁶ Sala, mwanakazzi wasimalelo wangu, wakazyala mwana mulombe kulisimalelo wangu mubuchembele bwakwe, alimwi wiisi wakamupa zyonse zyakwe. ³⁷ Simalelo wangu wakandichita kuti ndikonke, kwamba kuti, 'Iwe toyelede kutolela mwanangu mwanakazi kubana babaKanana basimbi, munyika mundakayaka munzi. ³⁸ Pesi kuti, welede kwiinka kumpuli yandende, alimwi kunzubo zyangu, alimwi ukajanine mwana wangu mwanakazi.' ³⁹ Ndakati kuliSimalelo wangu, ' Amwi mwanakazi takoyonditobela.' ⁴⁰ Asi wakati kulindime, Jehova, oyo ngwetobela uyotuma mungelo anduwe alimwi uyozwidilizya nzila yako, aboobo uyotolela mwanangu mwanakazi kuzwa kuluzubo lwangu alimwi kuzwa kumpuli yaluzubo lwandende. ⁴¹ Asi uyowangununwa muchikonke changu kuti wakuza kuluzubo lwangu alimwi batakukupa nguwe. Elyo uyowangununwa kucikkonke changu.' ⁴² Aboobo ndasika sunu kutusensa, alimwi ndati, 'O Jehova, Leza wasimalelo wangu Abbulahamu ikaka, kuti nkochita mukwambisya nkopanga lwendo lwangu luzwidilile - ⁴³ Ano mpwebede ndimvwi kumbali akasensa kamanzi - leka oyo mwanakazi uza kukuteka manzi, ngundiyowambila kuti, " Ikaka ndipe twanzi tuche munongo ndinwe," ⁴⁴ Mwanakazi uyoti kulindime "Nywa, alimwi ndiyotekela ankamela zyako maanzi " - abe nguwe nguwasalila mwana wasimalelo wangu.' ⁴⁵ Nkesena manisya kwambula mumoyo wangu, Lebekka wakaza anongo yakwe amakukko alimwi wakaya ansi kukasensa alimwi wakakuteka manzi. Aboobo ndakati kulinguwe, 'Ikaka ndinywisye. ⁴⁶ 'Wakafwambana kuseluzya nongo yakwe kuzwa amakkuko alimwi wakati, 'Nywa, alimwi ndiyopa nkamela zyako manzi azilazyo.' Aboobo ndakanywa , alimwi wakanywisya nkamela azilazyo. ⁴⁷ Ndakamubuzya alimwi ndati, ulimwanani webo? Wakati ndilimwana musimbi waBbetuweli, mwana mulombe waNaho ngwakazyalilwa aMikka.' Elyo ndamubika chisita mumpemo alimwi anchoko kumaboko akwe. ⁴⁸ Elyo ndakavundama ansi alimwi ndakakomba Jehova, alimwi ndalongezya Jehova, Leza wasimalelo wangu Abbulahamu, oyo wakandenzya munzila mbotu kuti ndijane musimbi wamwana wasimalelo wangu kunzubo zyakwe. ⁴⁹ Nkikaako, kuti kamulibambilide kunditondezya luyando luteli alimwi akusyomeka kuli simalelo wangu, mundambile, pesi kuti pe mundambile lubo, kwitila kuti ndizibe kuti ndelede kulanga kululyo kana kuchimwensi." ⁵⁰ Elyo Labbani aBbetuweli bakasandula alimwi bati, "Chintu chazwa kuli Jehova, tatukonzyi kwambula ayebo zibi na zibotu. ⁵¹ Langa, Lebekka ezi zilikulinduwe. Mubweze alimwi wende, aboobo, antela walikuyoba mwanakazi wasimalelo wako, mbuli Jehova mbakamba." ⁵² Elyo mulanda waAbbulahamu nakamvwa majwi abo, wakakotama ansi enyika kunembo lyaJehova. ⁵³ Mulanda waketa zilongo zyansiliva azilongo zyangolida, azikobela akuzipa Lebekka. Wakapa lubo zipo ziyandisi kumunyandumi wakwe akuli banyina. ⁵⁴ Elyo we abalumi mbakalabo bakalya akunywa. Bakakkala nkukoko busiku boonse, nibakabuka kuseni, wakati, "Amunditume ndiye kulisimalelo wangu." ⁵⁵ Munyandumi wakwe abanyina bakati, "Leka mwanakazi munini akale andiswe kwamazuba mache, ambweni alikkumi. Musule aaya ulenda." ⁵⁶ Pesi wakati kulimbabo, " Mutandijalili, Kambo Jehova wandizwidilizya munzila yangu. Amunditume munzila yangu kuti ndiye kuli simalelo wangu." ⁵⁷ Bakati, " Tulita mwanakazi munini alimwi tubuzye." ⁵⁸ Aboobo bakamwita Lebekka alimwi bamubuzya, "Ulinka na amwalumi oyo? " Wakasandula, " Ndilinka." ⁵⁹ Aboobo bakazumizya muchizi wabo Lebekka, antomwe amulanda wakwe mwanakazi, mulwendo lwamulanda waAbbulahamu abalumi bakwe. ⁶⁰ Bakalongezya Lebekka, alimwi bakati kulinguwe, " Muchizi wesu, ukabe banyina bezyulu zilikkumi zyazyulu, alimwi lunyungu lwako lukavube milyango yababo batakuyandi." ⁶¹ Elyo Lebekka wakanyampuka alimwi we abalanda bakwe basimbi bakatanta nkamela, alimwi bakatobela mwalumi. Aboobo mulanda wakabweza Lebekka alimwi winka munzila yakwe. ⁶² Lino Izaka wakali kukala kuNegevi alimwi wakali wakali wabola kuzwa kuBbiya Lahayi Loyi. ⁶³ Izaka wakinka anze kukuyesesya mulukuba golezya. Elyo nakalanga kunembo, wakabona nkamela kaziyobuza! ⁶⁴ Lebekka nakalanga alimwi elyo wakabona Izaka wakasotokela ansi kuzwa enkamela. ⁶⁵ Wakati kumulanda, ngwani oyu mwalumi uyobwenda mumunda kuti aswanizye ndiswe?" Mulanda wakati, " Ngusimalelo wangu." Wakabweza veyili, alimwi walivumba. ⁶⁶ Mulanda wakapandulwida Izaka zyonse zintu nzyakachita. ⁶⁷ Elyo Izaka wakamweta mutente lyabanyina Sala, alimwi wakabweza Lebekka, alimwi wakaba mwanakazi wakwe, alimwi wakamuyanda. Aboobo, Izaka wakumbulizigwa musule akufwa kwabanyina.