¹ Lino nyika yoonse yakali kubelesya mulaka uumwi alimwi amabala akozyene. ² Mbuli mbubakeenda kujwe bakajana nyika ntandabale munyika ya Sinala alimwi bakakkala nkuko . ³ Bakati kuli umwi awumwi, "Musike, atuchite zitina akuzyuumpa changuzu." Bakaba azitina kutali mabwe amulambo mbuli chiyasyo. ⁴ Bakati, "Musike tuliyakile muunzi ang'anda ndafu, kaluli kayo kayoosika kujulu, alimwi tulichitile zina lyesu. Natetwachita, tulaanzanisigwa anyika yoonse." ⁵ Aboobo Jehova wakasika kuzoobona muunzi ang'anda ndamfu yakayakwa aazyalane lya Adamu. ⁶ Jehova wakati, "Mulange mbantu bamwi bali amulaka umwi alimwi basanguna kuchita eezi, lino taakwe zibayooyanda kuchita zitakakachile kuzwidilila kulimbabo. ⁷ Musike atwiinke ansi alimwi tukanyonyonganie mulaka wabo nkukonya kuchitila kuti batakamvwanaani chabochabo." ⁸ Lino Jehova wakabanzaania kuzwa awo munyika yoonse alimwi bakaleka kuyaka muunzi. ⁹ Nkikaako zina lyawo lyakalikutegwa Bbabbelu nkaambo ooko Jehova wakanyonyonganya mulaka wanyika yoonse alimwi kuzwa aawo Jehova wakabaanzania atala anyika yoonse. ¹⁰ Eeli lyakali zyalane lya Syemu. Syemu wakali amyaaka ili myaanda alimwi wakaba wisi wa Alifozadi nikwakayinda myaaka iibili kuzwa kuzambangulwe. ¹¹ Syemu wakapona myaaka ili myaanda musanu kali waba wisi wa Alifozadi. Nkwakaba lubo wisi wabambi balombe abasimbi. ¹² Chiindi Alifozadi nakapona myaaka mukumi aatatu amusanu, wakaba wisi wa Syla. ¹³ Alifozadi wakapona myaaka ili myaanda iine ayitatu kali waba wisi wa Syela. Wakaba lubo wisi wabambi balombe abasimbi. ¹⁴ Elyo Syela nakapona kwa myaaka makumi aatatu, wakaba wisi wa Ebbeli. ¹⁵ Syela wakakkala myaaka myaanda ine ayitatu kali waba wisi wa Ebbeli. Wakaba lubo wisi wabambi balombe abasimbi. ¹⁶ Elyo Ebbeli wakapona kwamyaaka ili makumi aatatu ayine wakaba wisi wa Pelegi. ¹⁷ Ebbeli nakapona kwamyaaka myaanda yone amakumi aatatu kali waba wisi wa Pelegi.Wakaba lubo wisi wabambi balombe abasimbi. ¹⁸ Elyo Pelegi wakapona kwamyaaka ili makumi aatatu, wakaba wisi wa Leyi. ¹⁹ Pelegi wakapona kwamyaaka ili myaanda ibili amusanu ayine kali waba wisi wa Lewu. Wakaba lubo wisi wabambi balombe abasimbi. ²⁰ Elyo Pewu wakapona kwamyaaka ili makumi aatatu ayibili, wakaba wisi wa Selugi. ²¹ Pewu wakapona kwamyaaka ili myaanda ibili amusanu ayibili wakaba wisi wa Selugi. Wakaba lubo wisi wabambi balombe abasimbi. ²² Elyo Selugi wakapona kwamyaaka ili makumi aatatu, wakaba wisi wa Naholi. ²³ Selugi wakapona kwamyaaka ili makumi aabili kali waba wisi wa Naholi. Wakaba lubo wisi wabalombe abasimbi. ²⁴ Elyo Naholi wakapona kwamyaaka ili makumi aabili amusanu aabili ayine, wakaba wisi wa Tela. ²⁵ Naholi wakapona kwamyaaka ili mwaanda amakumi musanu aane kali waba wisi wa Tela. Wakaba lubo wisi wabambi balombe abasimbi. ²⁶ Tela nakamana kupona kwamyaaka ili makumi musanu aabili wakaba wisi wa Abbulamu, Naholi, a Halani. ²⁷ Lino aaya akali mazyalani a Tela. Tela wakaba wisi wa Abbulamu, Naholi, a Halani alimwi Halani wakaba wisi wa Loti. ²⁸ Halani wakafwa wisi Tela nakachili muumi munyika njakazyalilwa, mu Uli waba Kkasidi. ²⁹ Abbulamu a Naholi bakakwata banakazi. Zina lyamwanakazi wa Abbulamu wakali Salayi alimwi zina lya mwanazi wa Naholi wali Milikka, mwana wa Halani, wakali wisi wa Milikka a Isikka. ³⁰ Lino Salayi wakali musundi, tewakali aamwana pe. ³¹ Tela wakabweza Abbulamu mwana wakwe, Loti mwana wamwanike wakwe Halani, a Salayi mukamwana wakwe, mwanakazi wamwana wakwe Abbulamu, antoomwe bakazwa mu Uli yaba Kkasidi, kuti bayinke munyika ya Kkenani. Pesi bakasika kuli Halani akukkala nkuko. ³² Tela wakapona kwamyaaka ili myaanda ibili amusanu awuumwi wakafwida mu Halani.