¹ Aaba bakali balunyungu lwabana ba Nowa, bategwa, Syemu, Hamu, a Jafeti. Bana bakazyalwa kulimbabo musule lyazambangulwe. ² Bana ba Jafeti mbaba Goma, Magogi, Madayi, Javani, Tubbalu, Misyeki, a Tilasi. ³ Bana ba Goma mbaba Asyakenazi, Lipati, a Togama. ⁴ Bana ba Jovani mbaba Elisya, Tasyisyu, Kkitimu, a Dodanimu. ⁵ Kuzwa kutusuwa bantu bakaanzanisigwa mpawo bakayinka kunyika zyabo, umwi awumwi amulaka wakwe, mbulikuluzubo lwabo, kuzisi zyabo. ⁶ Bana ba Hamu mbaba Kusyi, Mizilayimu, Puti a Kkenani. ⁷ Bana ba Kkusyi mbaba Sebba, Havila, Sabbata, Lama, a Sabbuteka. Bana ba Lama mbaba Syebba a Dedani. ⁸ Kkusyi wakaba wisi wa Nimulodi, wakaba mutaanzi kuba muzundi anyika. ⁹ Wakali muvwimi singuzu kunembo lya Jehova. Ncheenchicho nchikwambwa kuti, "Mbulu Nimulodi, singuzu muvwimi kunembo lya Jehova. ¹⁰ Busena butaanzi bwabwami bwakwe bwakali Bbabbiloni, Uluki, Akkadi, a Kkalune, munyika ya Syina. ¹¹ Kuzwa kunyika wakiinka ku Asiliya wakuyaka Ninivu, Lehobboti, Ayili, Kkala, ¹² a Luseni, chakali aakati ka Ninivu aKkala. Wakali muunzi mupati. ¹³ Mizilayimu wakaba wisi wa Luditi ba Anamiti, ba Lehabbiti, ba Naputuhiti, ¹⁴ ba Patulusiti, ba Kkasiluhiti (ooko Mafilisitiya nkwakazwa) aba Kkafutoli. ¹⁵ Kkenani wakaba wisi wa Sidoni, mwana wakwe mutaanzi, aba Heti, ¹⁶ Alubo ba Jebbusi, aba Ampoli, aba Gigasyi, ¹⁷ ba Hiviti, aba Akkiti, aba Sinati, aba ¹⁸ Avadi, aba Zemali, mpawo aba Hamati. Kusule lyaluzubo lwaba Kkenani bakazulila koonse. ¹⁹ Kumugaano waba Kkenani wakali kuzwa ku Sidoni, kulangide ku Gela, kule mbuli ku Gaza, mpawo mbuli umwi mbayinka kunembo lya Sodomu, Gomola, Adina, a Zebboyimu, mbuli kule mbuli ku Lasya. ²⁰ Aaba bakali bana ba Hamu, kuluzubo lwabo, kumulaka wabo mumanyika aabo alubo amuzisi zyabo. ²¹ Alubo bana bakazyalwa kuli Syemu, mukulana wa Jafeti. Syemu alakwe wakali syanyinakulu wabantu boonse ba Ebba. ²² Bana ba Syemu mbaba Elamu, Asya, Alifazadi, Ludi, a Alamu. ²³ Bana ba Alamu mbaba Uzi, Hulu, Geta a Misyekki. ²⁴ Alifazadi wakaba wisi wa Syela, alimwi Syela wakaba wisi wa Ebba. ²⁵ Ebba wakali abana babili. Zina lyawumwi wakali Pelegi, kumazuba aakwe nyika yakali yanzeene, zina lyamukulana wakwe wali Jokkitani. ²⁶ Jokkitani wakaba wisi wa Alumodadi, Syelefu, Hazalimaveti, Jela, ²⁷ Hadolamu, Uzalu, Dikkila, ²⁸ Obbalu, Abbimayelu, Syebba, ²⁹ Ofili, Havila, a Jobbabbu. Boonse aaba bakali bana ba Jokkitamu. ³⁰ Busena bwabo bwakalikuzwa ku Mesya, woonse musinzo kusikila ku Sefa, chilundu chakujwe. ³¹ Aaba bakali bana ba Syemu, mbuli kuluzubo lwabo akumulaka wabo, munyika zyabo mbuli muzisi zyabo. ³² Aaba bakali baluzubo lwabana ba Nowa, mbuli kumazyalane, kuzisi zyabo. Kuzwa kuzisi bakaanzanisigwa akwiinka atala lyanyika nikwakamana zambangulwe.