¹ Mpawo Hagayi musinsimi a Zekkaliya musinsimi, walunyungu wa Ido, wakasima muzina lya Leza wa Izilayeli kuba Juda akuli bamu Jelusalemu. ² Zelubbabbelu mwana mulombe wa Syeyilutielu a Jeshuwa mulombe wa Jozadaki bakanyampuka kuya kukuyoyakulula ng'anda ya Leza mu Jelusalemu antomwe abasinsimi abo bakabagwasizya. ³ Mpawo Tatenayi mwendelezi wachisi chili Kusule a Mulonga, Syeta-Bbozenayi, antomwe abenzinyina bakasika akubambila kuti, ''Ngwani wakamuzumizya kuti muyakulule ng'anda akumaninsizya bulambo?'' ⁴ Alimwi bakati, ''Mbani mazina abo balumi balikuyaka mayake aya?'' ⁵ Pele linso lya Leza lyakali abapati pati baba Juda kwakuti basinkondonyina tebakabayimikizya pe. Bakali kulindila lugwalo kuti lutuminwe kumwami alimwi amalayilile kuti akabozegwe alangene azezi. ⁶ Echi nchinduluzyo chalugwalo lwa Tatenayi, muzuluzi wa Chisi chili Kusule lya Mulonga, a Syeta-Bbozenayi antomwe abenzinyina mukati ka Chisi Kusule lya Mulonga, olo ndubakatuma kuli Daliyasi mwami. ⁷ Bakatuma mulumbe, kabalemba ezi ku Mwami Daliyasi, ''Lumuno loonse lube kulinduwe. ⁸ Mwami tuyanda kuti uzibe kuti twakasika kuchisi cha Juda mung'anda ya Leza mupati. Ilokuyakwa amabwe mapati alimwi amasamu abikidwe mubulambo. Mulimo oyu ulokuchitwa mbuli mbokwelede alimwi ulokwendelela kunembo kabotu mumanza abo. ⁹ Twakabuzya kubapati, ''Ngwani wakamupa malayilile akuyakulula ng'anda eyi antomwe abulambo obu?' ¹⁰ Alimwi twakababuzya mazina abo kuchitila kuti iwebo uzibe mazina awumwi awumwi sikubazulwida. ¹¹ Bakasandula akwamba kuti, 'Swetuli babelesi bayoyo ulingo Leza wama julu anyika, alimwi tulokuyakulila eyi ng'anda eyo yakayakidwe minyaka myingi yakayinda chindi elyo mwami mupati wa Izilayeli naka iyakide akwimana. ¹² Nekubaboobo, muchindi basikale besu nibakapapila Leza wakujulu, wakabaaba mumanza a Nebbugadineza mwami wa Bbabbiloni, ba Chaludiya, abo bakamwayuula eyi ng'anda alimwi akutola bantu mubuzike ku Bbabbiloni. ¹³ Kakuli boobo, mumwaka mutanzi muchindi nakaba mwami wa Bbabbiloni, Sayilosi wakalayilila kuti ng'anda ya Leza iyakululwe. ¹⁴ Mwami Sayilosi alakwe wakabwedezya zibelesyo zyangolida azya nsiliva ku ng'anda ya Leza ezyo Nebbugadineza nzyaketede kuzwa muntempele mu Jelusalemu kuzyeta kuntempele mu Bbabbiloni. Wakaziboozya kuli Syesibbaza, oyo ngwakachitide mwendelezi. ¹⁵ Wakati kuli nguwe, ''Bweza zibelesyo ezi. Koya ukazibike muntempele mu Jelusalemu. Chita kuti ng'anda ya Leza iyakululwe.'' ¹⁶ Mpawo oyu Syesibbaza wakasika alimwi wakayala ntalisyo yang'anda ya Leza mu Jelusalemu; alimwiilokuyakwa, pesi tinakumaninina pe.' ¹⁷ Kwalino kuti kachibotelezya mwami, ino kulibiyeni kuti chalangwa langwa mung'anda yansiswa mu Bbabbiloni kubona kuti muleli mupati Sayilosi wakalayilila zyanchobeni kuti ng'anda ya Leza iyakululwe mu Jelusalemu. Eelyo akube kuti mwami atumizye mizezo yakwe kuli ndiswe.