¹ Mpawo jwi lya Jehova lyakasika kulindime kaliti, ² ''Mwana wamuntu, zibya Jelusalemu aatala azisesemyo zyakwe, ³ alimwi waambe, 'Mwami Jehova waamba eechi kuli Jelusalemu: Matalikilo aako abuzyalwe bwako bwakachitikila mubusena bwanyika ya Kkenani; wuso wakali mu Amoli, abanyoko bakali mu Hiti. ⁴ Mubuzuba bwakuzyalwa kwako, banyoko teensi bakalunenga pe lukombokombo lwako, nikuba kukusalazya mumaanzi na kukukkumba amunyo, na kukupopelezya achidabba. ⁵ Takwe linso lyakakufwida luzyalo kuti likuchitile chimwi chazeezi, kukufwida luzyalo kunembo lyako. Mubuzuba niwakazyalwa, akusulwa kwabuumi bwako, wakasowelwa aanze mumuunda uujulikide. ⁶ Pesi ndakayinda kumbali lyako, alimwi ndakakubona koli kubumbuluka mubulowa bwako; aboobo ndakati kulinduwe mubulowa bwako, ''Pona!'' Ndakati kulinduwe mubulowa bwako, ''Pona!'' ⁷ Ndakakuchita kuti ukomene mbuli musamu uuli mumuunda. Wakavula alimwi wakaba mupati, mpawo wakaba nchoko yenchoko. Nkolo zyako zyakayuma alimwi susu lyako lyakakomena nikuba wakalimaya kotazweete. ⁸ Ndakakwiinda lubo, alimwi ndakakubona. Bona! Chiindi cha luyando chakakusikila, aboobo ndakabika mulembo wangu aalinduwe kuvumba maya yako. Mpawo ndakakonkezya kulinduwe alimwi ndakweeta mu chizuminano - ooku nkwaamba kwa Mwami Jehova - mpawo wakaba wangu. ⁹ Aboobo ndakakusanzya amaanzi alimwi ndakagwisya bulowa kuzwa kulinduwe, mpawo ndakakunanika amafuta. ¹⁰ Ndakakuzwaatika zizwaato zibotu ansangu mbotu zyachikumba kumawulu aako. Ndakakuzambilila amulembo mubotu wa telelina akukuvumba aboya. ¹¹ Chitobela ndakakubotya anchoko mumaanza aako, abulungu buzyunguluka mukosi wako. ¹² Ndakakubika chisita mupemo yako a malangulangu mumatwi anu, amusini mubotu amutwe wako. ¹³ Aboobo wakabotesegwa a ngolide ansiliva, alimwi wakasamikidwe amulembo mubotu, boya azizwaato zibotu; wakalya busu bunante, buchi, a mafuta. Wakali mubotu alimwi wakaba mbuli mwami wachanakazi. ¹⁴ Mpuwo yako yakeendelela aakati kazisi nkaambo kabubotu bwako, nkaambo chakali kweebeka mubulemu mbundakakupede - ooku nkwaamba kwa Mwami Jehova. ¹⁵ Pesi webo wakasyoma bubotu bwako, alimwi wakachita mbuli sibwaamu akaambo kampuwo yako; wakatila nchito zyako zya bwaamu kuli woonse wakiinda kumbali lyako kuti bubotu bwako bube bwako. ¹⁶ Mpawo wakabweza zibaki zyako alimwi anzizyo wakalibotesezya busena bwako bwaajulu amibala iisiyene, alimwi ooko wakachita mbuli sibwaamiu. Eechi techakeelede kuchitika pe. Nikuba kuti chintu chili boobu chipone. ¹⁷ wakabweza nchoko mbotu zya ngolide ansiliva eezyo nzindakakupa mpawo wakalichitila zitoombe zyaalumi. Wakachita anzizyo mbuli sibwaamu mbakonzya kuchita. ¹⁸ Wakabweza zizwaato zyako zibotu wazivumba, alimwi wakabika mafuta aangu ansende zyangu kunembo lyazyo. ¹⁹ Ndakakupa chibunge changu - chichitidwe aabusu bunante, mafuta, a buchi - wakazibika kunembo lyazyo kuti zipe bweema bununkilila, nkaambo eezi nzizyo zyakachitika - ooku nkwaamba kwa Jehova. ²⁰ Mpawo wakabweza bana bako balombe abasimbi mbiwakandizyalila akubapedekezya ku zitoombe kuti bakalyigwe mbuli chakulya. Nchito zyako zyabwaamu nchintu chiniini na? ²¹ Mwakajaya bana bangu kuzitoombe akubachita kuti biinde mumulilo. ²² Kuzisesemyo zyako zyoonse akunchito zyabwaamu bwako takwe niwakayeeya mazuba aabwanike bwako pe, aawo niwakali maya kotazweete niwakali kutapata mbublowa bwako. ²³ Mawe! Mawe kulinduwe! - ooku nkwaamba kwa Mwami Jehova - nkinkaako, kukuyungizya kububi oobu boonse, ²⁴ wakaliyakila chilikwabililo akulichitila ntumba ndamfu mumasena woonse. ²⁵ Wakayaka busena buli aatala lyamigwagwa yoonse akuchita bubotu bwako buusu. Wakajula mawulu aako kuli kufumbwa wakiinda kumbali lyako mpawo wakavuzya nchito zyako zyabwaamu. ²⁶ Wakachita mbuli sibwaamu a ba Ijipiti, basimayakilanwe bako basikweemuzya, alimwi wakachita nchito nyingi zyabwaamu, kundichita kuti ndinyeme. ²⁷ langa! Ndiyokuuma ajanza lyangu alimwi nkagozye kulya kwako. Ndiyoopedekezya buumi bwako kuli basinkondonyokwe, bana basimbi baba Filisitiya, aabo bakaba aabweeme amaponeno aako mabi. ²⁸ Wakapona mbuli sibwaamu aatoomwe a ma Asiliya nkaambo tewalikukkutisikana pe. Wakachita mbuli sibwaamu alimwi tewakakkutisikana pe. ²⁹ Wakachita nchito nyingi zyabwaamu munyika ya zyabuuzya baku Chaludiya nikuba eezi tezyakakukkutisya pe. ³⁰ Moyo wako uchiswa biyeni - ooku nkwaamba kwa Mwami Jehova - kuti ulakonzya kuchita eezi zyoonse zintu, nchito zyasibwaamu uutakwe nsoni? ³¹ Mwakaliyakila zyakulikwabilila aajulu aanzala akulichitila ntumba zili aajulu mumasena woonse. Pesi tewakali mbuli sibwaamu pe nkaambo mwakasampawula kubweza mbadalo. ³² Yomwanakazi simamambe, iwe nuutambula batuba kwiinda mulumi wako. ³³ Bantu balaliya kuli sbwaamu woonse, pesi upa mufolo ku bayandwi bako akubeeneena kuti baze kulinduwe kuzwa kumazuba aanchito zyabwaamu bwako. ³⁴ Aboobo kuli musiyane aakati kako abamwi banakazi. Takwe naba womwe uukuliya kuti uchite mbuli sibwaamu. Nduwe uupesene. Wakabapa mbandalo alimwi takwe yapegwa kulinduwe pe. ³⁵ Nkinkaako webo sibwaamu, swiilila jwi lya Jehova. ³⁶ Mwami Jehova waamaba eechi: Akaambo kakuti wakatila aansi nkosya yako alimwi akutavumba maya yako kwiindila munchito zyako zyabwaamu abayandwi bako azileza zyako zisesemya, alimwi kuti wakabapa bulowa bwabana bako, ³⁷ nkinkaako, langa, ndiyoobungania bayandwi bako boonse mbuwakaswaanana aabo, boonse mbiwakayanda alimwi abaabo mbiwakasula, ndiyobabungania kukubukila nduwe kumabazu woonse. Ndiyoovumbula maya yako kulimbabo kuti bakabone yoonse maya yako. ³⁸ Nkaambo ndiyokupa chisubulo akaambo kabwaamu akutila bulowa, alimwi ndiyoyeta kutika kwabulowa kwabukali aluzyalo lwangu. ³⁹ Ndiyomupeda mumaanza aabo kuti bakakonzye kuwaalila aansi maanda anu akunyonyoona masena aalikujulu, alimwi bayoomukulula anchoko zyabo zyoonse zyeebeka Bayookusiya koli maya kotazweete. ⁴⁰ Mpawo bayokuletela nkamu yakukulwisya akukutulula mabwe, alimwi bayookunenguula amapanga aabo. ⁴¹ Bayootenta maanda aako akuchita nchito zyachisubulo aatala lyako kunembo lyabanakazi biingi. Nkinkaako ndiyokulesya bubwaamu bwako, alimwi tochiyoobabbadali limbi bayandwi bako. ⁴² Mpawo ndiyowumuzya bukali bwangu kulinduwe; bukali bwangu buyookusiya nkaambo ndinoli ndakkutisikana, nsichiyoonyemi limbi. ⁴³ Akaambo kakuti tewakandiita kukuyeeya mazuba aabwanike bwako alimwi wakandichita kuti ndizungaane akaambo kazintu zyoonse eezi, nkinkaako , langa! Ndiyoyeta aatala aamutwe wako chisubulo chanziwakachita - ooku nkwaamba kwa Mwami Jehova. Tewakayungizya bwaamu na aali zyoonse zisesemyo zyako? ⁴⁴ Langa! Woonse muntu waambuula tusimpi aatala anduwe uyowowamba kuti, ''Mbuli banyina mbubabede, aboobo amwana wabo musimbi mbabede.'' ⁴⁵ Uli mwana musimbi wabanyoko, wakasampawula mulumi wabo abana bakwe, alimwi ulimuchizi wabachizi bako bakassampawula balumi babo abana babo. Banyoko wakali mu Hiti, wuso wakali mu Amoli. ⁴⁶ Muchizi wako mupati wakali Samaliya alimwi bana bakwe basimbi mbabo bakali kukkala kunyika, eelyo muchizi wako muniini nguwe wakali kukkala ku musanza kwako, kwaamba kuti, Sodomu abana bakwe basimbi. ⁴⁷ Teensi kuti wakeenda luzutu munzila zyabo akutobelezya mayeeyelo anchito zyabo, pesi munzila zyako zyoonse wayindilila kuli mbubakabede. ⁴⁸ Mbuli mbechipona - ooku nkwaamba kwa Mwami Jehova - muchizi wako Sodomu abana bakwe basimbi, tebachita bubi bwiingi mbuli nduwe abana bako basimbi mbubakachita. ⁴⁹ Langa! Eechi chakali chibi cha muchizi wako Sodomu nchaakachita mukuti wakali kulisumpula mukulyiiba kwakwe, katakwe bubanzi akutalikataazya aatala achintu chomwe. Takali kuyumya maanza aabantu bachete ababula. ⁵⁰ Wakali kulisumpula alimwi wakali kuchita nchito mbi kunembo lyangu, aboobo ndakabatanda mbuli mbuwakabona. ⁵¹ Naba Samaliya taakachitide nichiba chisela chazibi zyakwe; anikuti webo wakachita zyiingi zisesemyo kwiinda nzibakachita, alimwi wakatondeezya kuti bachizi bako bakali mbubo kwiinda nduwe akaambo kazintu zisesemya nzyochita! ⁵² Ikapati we, tondeezya bweeme bwako; muli eeyi nzila unoli watondeezya kuti bachizi bako bakalimbubo kwiinda nduwe akaambo kazibi nziwakachita muli eezyo zyoonse nzila zisesemya. Bachizi bako lino baboneka kabali mbubo kwiinda nduwe. Ikapati we, tondeezya bweeme bwako, muli eeyi nzila unoli watondeezya kuti bachizi bako bakalimbubo kwiinda nduwe. ⁵³ Ndiyooboozya zyoolwe zyabo - zyoolwe zya Sodomu abana bakwe basimbi, a zyoolwe zya Samaliya abana bakwe basimbi; pesi zyoolwe zyako zinooli aakati kabo. ⁵⁴ Mukulangisisya zintu eezi uyootondeezya bweeme bwako; uyoobijilwa loko akaambo kazyoonse nziwakachita, munzila eeyi uyooba chuumbulizyo kuli mbabo. ⁵⁵ Aboobo muchizi wako Sodomu abana bakwe basimbi bayoobwedezegwa muchiimo nchibakabede lutaanzi, alimwi Samaliya abana bakwe basimbi bayoobwedezegwa kunyika yabo. Mpawo we abana bako basimbi muyooboozegwa kuchiimo chanu chalutaanzi. ⁵⁶ Sodomu muchizi wako takwe nakambidwe amulomo wako mumazuba aakulisumpula kwako, ⁵⁷ bubi bwako kabutanaayubununwa. Pesi lino waba chisampawuzyo kubana basimbi ba Idomu akuli boonse bana basimbi baba Filisitiya bamuzyungulukide. Bantu boonse bali kukusampawula. ⁵⁸ Uyootondeezya bweeme bwako anchito zyako zisesemya! - ooku nkwaamba kwa Jehova! ⁵⁹ Mwami Jehova waamba eechi: Ndiyoomaninsyania aayebo mbuli mbukweelede, inywe nimwakasampawula chikonke chanu akutyola mulawu. ⁶⁰ Pesi me ndiyooyeeya chizuminano changu nchindakachita mumazuba aabukubusi bwako, alimwi ndiyooyimika chizuminano changu anduwe kwa lyoonse. ⁶¹ Mpawo we uyooyeeya nzila zyako alimwi uyooba aansoni aawo waakutambula bachizi bako bapati a baniini. Ndiyoobapa kulinduwe mbuli bana basimbi, pesi peepe achizuminano chako. ⁶² Me lwangu ndiyooyimika chizuminano changu anduwe, alimwi uyoziba kuti ndime Jehova. ⁶³ Akaambo kazintu eezi, uyooyeeya zyoonse alimwi uyooba aabweeme aboobo tokoyoojula mulomo wako kukwaambuula akaambo kabweeme bwako kuchiindi nenjookulekelela kuli zyoonse nziwakachita - ooku nkwaamba kwa Mwami Jehiva.'''