¹ Mumunyaka wakkumi, mumwezi waane, alimwi mubuzuba bwamusanu mumwezi, kwakabakuti nindakakkede akkati kabazike kumulonga wa Kkebba. Majulu akajulika, alimwi ndakabona zilengano zya Leza. ² Mubuzuba bwasanu mulooyo mwezi-wakali munyaka wasanu wabuzike bwamwami Jehoyiyakkimu -- wakali munyaka wasanu wabuzike bwamwami Jehoyiyakkimu -- ³ Ijwi lya Jehova lyakasika kuli Ezekkiyeli mwana wa Bbuzi mupayizi, munyika yama Chaludiya kumulonga wa Kkebba, ajanza lya Jehova lyakali alinguwe nkukooko. ⁴ Mpawo ndakalanga, alimwi kwakali guwo lyemvula lyakayobuza kuzwa kunyika; ijoba pati lyakali amulilo umweka mukkati kalyo akubalama kwakazyungulukide mukkati kelyo, amulilo usalala mukati kejoba. ⁵ Akkati kwakali mbuli zinyama zyoone zipona mbobu mbuzyali kulangika: zyakali kubaanga muntu, ⁶ pesi zyakali amasyu oone achimwi, alimwi chinyama chakali amababa oone. ⁷ Mawulu azyo akaliluleme, pele kundyatyo zyamawulu azyo akali mbuli insumba zyakang'ombe zyakali kubalama mbuli kazikwizingidwe mbuli bbulonzi mumabazu woonse one. ⁸ Mulizine zyoonse, kumenso amababa akali oobu: ⁹ mababa akali kuguma mababa achinyama chimwi, alimwi takwepe nizyakali kunyona nkaziyobwenda; anukuti, achimwi chakaluleme kunembo mukwenda kwazyo. ¹⁰ Bwime bwakumenso azyo kwakali mbuli kumenso amuntu. Mubune bwazyo zyakali akumenso amulavu kubbazu lyakuchilisyo, alimwi mubune bwazyo zyakali akumenso kwamusune kulubazu lwakochimwensi. Mubune bwazyo zyakali akumenso kwensika. ¹¹ Kumenso azyo kwakali mbuboobo, mababa akali julikide ajulu, aboobo achimwi chinyama chakali amababa akajisini amababa achimwi chinyama, aboobo chakali amababa akavumbide mibili yazyo. ¹² Achimwi chakaluleme kunembo, aboobo kuti kufumbwa muuya nkuwaka zilulamika nkonkuko nkuzyakaya, zyakiinka nkatakwe kunyona. ¹³ Mbuli mukukozyania kwazinyama zipona, zyalikulangikanga mbuli makkala amulilo ayaka, mbuli zimunisyo, mulilo umunikisya alimwi wakali kwenda akkati kazinyama, alimwi kwakali kumweka kwakalabi. ¹⁴ Zinyama zipona zyakali kwenda kufwambana musule akunembo, alimwi zyakali kulangika mbuli kalabi! ¹⁵ Mpawo ndakalanga kuzinyama zipona; alimwi ndakabona vili lyomwe anyika kumbali achimwi chinyama chipona amasyu azyo oone. ¹⁶ Mbobu mbuzyakalikulangika abwiime bwamavili: alimwi vili lyakali mbuli Bbelulo, kulangika kwazyo abwiime bwakali mbuli vili linjilene alimwi vili. ¹⁷ Mbuli mbwakali kweenda, akali kwenda kufumbwa kumabazu oone, katanyoni pe. ¹⁸ Nakayobwenda mbuli mitendelele yawo, akali malamfu akuyoosya, mitendelele yakazwide menso nkaazyungulukide. ¹⁹ Kufumbwa zinyama zipona zyeenda, mavili alikwenda kumbali lyazyo. Elyo zinyama zyuumi zyali kunyampuka kuzwa ansi anyika, mavili awalawo akalikunyampuuka. ²⁰ Kufumbwa muuya nkuwakali kuya, zyakalikwinka, nkambo muya wazinyama zipona wakali mumavili. ²¹ Kufumbwa zinyama nkuzyakiinka, amavili nkonkuko nkwakaya; alimwi elyo zinyama nizyaakima, amavili akalikwima, elyo zinyama nizyaka nyampuka kuzwa aansi enyika, amavili akanyampuuka awalawo kumbali azyo, nkambo muuya wazinyama zipona wakali mumavili. ²² Ajulu amitwe yezinyamankala zipona kwakali mukozyanisyo wachilivumbyo; chakali kulangika mbulimabwe mayandisi akayalidwe ajulu amitwe yazyo. ²³ Kunsi achivumbilizyo, achimwi chinyama mababa akali tandabede akujata mababa achimwi chinyama. Achimwi chinyama chipona chakali amababa akulivumbya; achimwi nkachijisi akulivumba mubili wacho lwacho chini. ²⁴ Mpawo ndakamvwa muzuzumo wamababa azyo. Mbuli muzuzumo wamanzi miingi. Mbuli ijwi lyasimajulu kufumbwa nizyakali kweenda. Mbuli muzuzumo wemvula yeguwo. Mbuli muzuzumo wabasilumamba. Kufumbwa nizyakiimikila, zyalikuselezya mababa azyo. ²⁵ Ijwi lyakazwa atala achilivumbyo chaajulu amitwe kufumbwa nizyakali kwimikila akuselezya maba azyo. ²⁶ Ajulu achilivumbyo chamitwe yazyo kwakali mbuli chuuno chabwami: kwakali mbuli ibbwe lya Sofilo, alimwi awo kwali mbuli chunochabwami kwakali kubonekanga muntu. ²⁷ Ndakabona chintu chilimbuli nsimbi ilikutentwa mumulilo kuli nchicho kuzwa mumabolo kaziya kujulu, ndakabona kuuzwa mukulanga kwamuchikungu kuuza ansi kulangika kwamulilo akumweka kuzyungulukide. ²⁸ Mbuli bulangika fulichoongwe mumayoba muzuba lyemvula kwalai kuboneka mbuli mumuni uumwekesya uchizyungulukide kwakali kuboneka mbuli bulemu bwa Jehova. Nindakabubona, ndakavundama , alimwi ndakamvwa ijwi lyaambula.