¹ Ngaaya majwi aamuyiisyi, walunyungu lwa Devidi amwami wa Jelusalemu. ² ''Nzyabuyo! Nzyabuyo! Mbwawamba muyiisi. ''Zyoonse nzyabuuyo! Zyonse nzyabuyo.'' ³ Nimpinduunzi muntu njajana kumulimo woonse ngwabeleka aansi ezuba? ⁴ Izyalane limwi lyayinda; alimwi limbi lyatobela, pesi nyika inoliwo kwalyoonse. ⁵ Izuba lilazwa, alimwi lilabbila akufwambaana kubweda kubusena nkulizwida lubo. ⁶ Luuwo lulawunga kumusanza akuzyungulukila kunyika, akuya bweenda akuzyunguluka nzila yawo akubweda musule lubo. ⁷ Milonga yoonse ikunkila kulwizi, pesi lwizi taluzuli pe. Kubusena ooko milona nkwiiya, nkonkuko nkwitozya alimwi. ⁸ Zintu zyoonse zyakatala, alimwi kaatakwe uumwi ukonzya kuchipandulula. Linso talikkutikani anzilibona, nekuba kutwi kuzuzikizya acheecho nchikumvwa. ⁹ Kufumbwa chakaliwo nchechiyooba, alimwi kufumbwa chakachitika nchechiyochitwa. Takukwe chipya pe aansi azuba. ¹⁰ Sena nkuchili na chintu chaambwa alinchicho, Langa, eechi nchipya? Kufumbwa chiliwo chakaliwo kale kwachiindi chilamfu, muzyindi eezyo zyasika musule lyesu. ¹¹ Takwepe umwi wakaboneka kwibaluka zintu ezyo zyakachitika muzyindi zyakale, mpawozintu ezyo ziyochitika musule azeezyo ziyochitika mulibwejuunza tazikoyoyeyegwa limbi.'' ¹² Mebo ndili muyiisyi, mpawo ndakali mwami atala a Izilayeli mu Jelusalemu. ¹³ Ndakabika mizeezo yangu mukudunamina akulingulula busongo bwazintu zyoonse eezyo zili ansi ajulu. Bulinguluzi oobo mulimu ukatazya oyo Leza ngwakapa bana babantu kuti bajatikane anguwo. ¹⁴ Ndabona inchito zyonse zichitwa aansi azuba, mpawo langa, zyoonse biyo nzyabuyo akwandilila iuwo. ¹⁵ Chipilingene tachikonzeki koolololwa! Chibulikide tachibalwi! ¹⁶ Ndakaamba mumoyo wangu, kwamba kuti, ''Langa, Ndajana busongo bupati kwinda boonse bakali kunembo lyangu mu Jelusalemu. Miyeeyo yangu yabona busongo bwiingi aluzibo.'' ¹⁷ Aboobo ndibikka moyo wangu kukuziba busongo mpawo alimwi busondosi abufubafuba. Ndasika kukumvwisisisya kuti eechi alimwi chakali kweezya kwembela iguwo. ¹⁸ Nkambo mubusongo bwiini muli kuusa kupati, alimwi ooyo uyungizya luzibo ulayungizya kuusa.