¹ Ndakaamba kuti mumoyo wangu, ''Koboola lino, Ndiyokweezya akukondwa. Aboobo botelelwa lukondo.'' Pesi langa, eechi alimwi nchabuyo. ² Ndakaamba atala ansesya, ''nkusondoka,'' Alimwi aatala kubotelwa, ''Chibelekaanzi?'' ³ Ndakeezya mumoyo wangu kuti ndilibotezye biyeni awayini. Ndakazuminina muzezo wangu undendelezye abusongo nikuba ndachili jisilidi kubufubafuba. Ndasiyande kulanguula kuti ncheechili chibotu chakuchita kubana babantu aansi ajulu mumazuba akupona kwabo. ⁴ Ndakachita zintu zipati. Ndakaliyakila maanda akulibyalila myuunda yamasansa. ⁵ Ndiliyakile zilili azilyokezezyo, alimwi ndakabyala misyobo yoonse yaminsamu yamichelo mulinjiyo. ⁶ Ndachita malambwa amanzi akutilizya lusaka oomo muzikkidwe minsamu. ⁷ Ndakawula bazike baalumi abazike banakazi; Ndakali abazike bakazyalilwa mung'anda yangu yabwami. Alimwi kandijisi buvubi bwiingi amatanga azivuubwa, kwiinda boonse baami bakeendelezya musule lyangu mu Jelusalemu. ⁸ Alubo mebo ndakalijanina nsiliva angolide, buvubi bwabaami azilikiti kandijisi basikwiimba, boonse baalumi abanakazi, mpawo abasimamambe banji, kubotezya kwabana babantu. (Nsandululo zyiingi zyachiindi zipandulula kampanzi kakumaninina amunchali ooyu) ⁹ Aboobo ndakaba mupati akuba mubuvubi kwiinda boonse bakaliwo musule lyangu mu Jelusalemu. Alimwi busongo bwangu bwakakkalilila muli ndime. ¹⁰ Kufumbwa menso nchakayandisya, tendakakasya kuzwa kulinzizyo. Tendakakasya moyo wangu kuzwa kuli chimwi chibotezya, nkambo moyo wangu wakakondwa kumulimo wangu woonse akubotelwa njiyakali mpindu yamulimo wangu woonse. ¹¹ Eelyo ndakalanga milimo yoonse eeyo maanza angu njiyakachita, alimwi amilimo eeyo njindakachita, pesi alubo, zyoonse zyakali zyabuyo-- mbuli kwandilila luuwo. ¹² Tekwakali mpindupe ansi azuba mulinjiyo. Mpawo ndakatalika kuyeeya busongo, alimwi alubo busondosi abufubafuba. Nkaambo niinzi chimbi kumuntu ooyo utabe mwami utobela nchatachite kwinda eecho mwami nchakachitide kale? ¹³ Mpawo ndakatalika kumvwisisisya busongo oobo kuti buli abubotu atala abufubafuba, mbuli mumuni ulampindu kwinda mudima. ¹⁴ Mwaalumi musongo ubelesya menso ali amutwe wakwe kukubona nkwaya, pesi mufubafuba uleenda mumudima, nikuba ndizi kuti chintu chikozyenie chilachitika kuli mbabo boonseni. ¹⁵ Eelyo ndakaamba kuti mumoyo wangu, ''Eechi chichitika kumufubafuba, chiyochitika alimwi akulindime. Aboobo musiyang'onzi nguchichita naa ndaba musongo loko?'' Ndakajinsya mumoyo wangu kuti, ''Achilacho eechi nchabuyo.'' ¹⁶ Nkambo muntu musongo, mbuli mufubafuba tayeyegwi kwachindi chilamfu loko. Mumazuba achiza zyoonse zinoli zyalubinkana. Muntu musongo ulafwa mbuli mufubafuba mbwafwa. ¹⁷ Aboobo ndakasula buumi nkambo mulimo woonse uuchitwa aansi azuba bwakali bubi kuli ndime. ''Nkaambo kakuti eezi zyoonse nzyabuuyo--mbuli kwandilila luuwo. ¹⁸ Ndakasula mulimu wangu woonse ooyo ngandakabeleka aansi azuba nkambo ndelede kusiila muntu unditobela. ¹⁹ Nkambo ngwani uzi kuti uyooba muntu musongo naa mufubafuba? Kakuli kuyooba simalelo aatala azintu zyoonse aansi azuba kukubeleka kwangu, abusongo nzizyakayaka. ²⁰ Aboobo ndakatalika kupeda moyo wangu kukubula bulangizi atala akubeleka kwangu koonse nkundakachita aansi azuba. ²¹ Nkaambo ngakulaba umwi muntu ubeleka chabusongo, achaluzibo alimwi achabunamaanu, pesi uyosiya zintu zyoonse nzyali azyo kumuntu utakwe nakachita chintu. Eezi alimwi nzyabuyo -- nchibi chipati. ²² Nimpinduunzi muntu njajana kuzwa kumilimo yoonse akuzwa kukukakatila kwamoyo ooyo wakubeleka aansi azuba. ²³ Mazuba woonse mulimo wakwe ulachisa akukatazya, aboobo mansiku muuya wakwe tujani kulyookezya pe. Eechi achilacho nchabuyo. ²⁴ Takwepe chintu chibotu kumuntu kwiinda kulya akunywa buyo akujana kubotelwa mukubeleka kwakwe. Ndakabona kasimpe aka kuti kazwa kujanza lya Leza. ²⁵ Nkaambo ngwani uunga ulalya naa kuba amusyobo wakubotelwa kutazwi kwa Leza? ²⁶ Nkaambo kumuntu umubotezya, Leza ulamupa busongo aluzibo akukondwa. Nikubaboobo, kuli sizibi ulamupa mulimo wakubunganya akubamba kuchitila kuti achipe uumwi ubotezya Leza. Eechi alimwi nchabuyo -- mbuli kwandinanya luuwo.