¹ Solomoni mwana mulombe wakalisimide mumulawo wakwe, a Jehova Leza wakwe wakali aanguwe wakamuchita kuti abe singuzu loko. ² Solomoni wakambula kuma Izilayeli, boonse kubendelezi bazyuulu abe miyanda, akubabetesi, alimwi akubendelezi boonse bakwa Izilayeli, basilutwe bamyunzi yabamawisi. ³ Nkabela Solomoni ambungano yoonse yakali aanguwe bakinka kubusena butantide oko ku Gibbiyoni, mbuli mbukwakali teente lyakuswanana a Leza, eelyo Mozesi mulanda wa Jehova, ndyakalunda kali munkanda. ⁴ Pesi Devidi wakeeta ibbokesi lya Leza kuzwa ku Kkiliyati Jilimu kuyosika kubusena obo mbwakabambilide, mbuli mbwakabikka tente mu Jelusalemu. ⁵ Mukuyungizya, chipayililo chamukuba chakachitwa a Bbezalelu mwana mulombe wa Uli mwana mulombe wa Huli oyo wakaliwo kunembo lyatente lyakubunganina lya Jehova; Solomoni ambungano bakinka nkuko. ( amwi malembe abensiku muchi Hibbulu alijisi, chipayililo chamukkuba chakapangwa a Bbezalelu mwana mulombe wa Huli, wakachibika awo kunembo lyatente lyakubunganina lya Jehova, oko nkwawamba kuli Devidi). ⁶ Solomoni wakiinka nkuko kuchipayililo chamukkuba kunembo lya Jehova, eelyo lyakali ateente lyakubunganina akupeda zipayizyo zili chuulu chomwe zipayizyo zyakutenta. ⁷ Leza wakalibonia kuli Solomoni mansiku aayo akwamba kuti kulinguwe, ''Kumbila! Ninzi nchitakupe ?'' ⁸ Solomoni wakati kuli Leza, ''Wakatondezya chizuminano chisyomekede chipati loko kuli taata Deviti, akundichita mwami mubusena bwakwe. ⁹ Lino, Jehova Leza, chita chisyomezyo kuli Devidi taata chizuzikizigwe mbuli mbuwandichita mwami wakwendelezya bantu banji mbuli lusuko lwanyika. ¹⁰ Lino kondipa busongo amanu, kuchitila kuti njendelezye bantu bako, mbingi loko mumweelwe?'' ¹¹ Leza wakati kuli Solomoni, Nkambo eechi chakali mumoyo wako,akambo kakuti tewakumbila buvubi pe, mbono na bulemu, nikuba buumi bwabasinkondonyokwe, na buumi bulamfu bwako, pesi wakumbila busongo amaanu aako, kuchitila kuti ukonzye kuzulwida bantu bangu ajulu ababa mbendakuchitila kuti ube mwami, eechi nchicho nchensichite. ¹² Ndilakupa lino busongo amanu. Ndakupa lubo buvubi, ambono, abulemu kwiinda baami boonse ibakakutangunina akwinda boonse bakakutobele.'' ¹³ Nkabela Solomoni wakeza mu Jelusalemu kubusena butantide mbwakali mu Gibbiyoni, kuzwa kunembo lyateente lyakubunganina; akwendelezya ba Izilayeli. ¹⁴ Solomoni wakabungania inkalaki abasimabbiza, wakali azyuulu zine amiyanda iine yankalaki azyuulu zilikkumi azibili zyaba simabbiza eezyo nzyakabikka inkalaki mumadolopo, kabali anguwe, mwami mu Jelusalemu. ¹⁵ Mwami wakachita nsiliva, angolida kuti zibe zintu zijayilikide mbuli mabwe. Alimwi wakachita zisamu zya Kkedali wazivuzya mbuli nkuyu zili mutulundulundu. ¹⁶ Mbuli mbubwakali kuyandika mabbiza kuzwa ku Ijiputi aku Kkuu kuli Solomoni, basambazi bakawula kuzwa ku Kkuu amuulo. ¹⁷ Bakakuula nkalaki mu Ijiputi, amiyanda ili musanu awumwi yamasyekeli ansiliva, a Bbiza lyamuyanda oomwe amakkumi alimusanu amasyekeli. Bakawuzizya lubo ba Hititi aba Alamiyenisi.