¹ Lino Solomoni wakalayilila mayake ang'anda yazina lya Jehova amayake ang'anda yabwami bwakwe. ² Solomoni wakatuma baalumi zyuulu zili musanu azibili kuti babweze mikuli abali zyuulu musanu azitatu mbuli basikunenga mabwe muzilundu, abalumi bali zyuulu zitatu amyaanda musanu awumwi kuti babe basikubalanga nibalokubeleka. ³ Solomoni wakatuma mutumwa kuli Hilamu mwami wa Tulo, kawamba kuti, ''Mbuli mbwakachita kuli Davida taata, kumutolela matanda aseda kuti ayake ing'anda kuti ukkale mukati, chita mbubo akuli ndime. ⁴ Langa njanda kutazika kuyaka ing'anda yazina lya Jehova Leza wangu, kuti njibambile nguwe, kuti nteente tununkilizyo tubotu kunembo lyakwe, kubambila aanze chinkwa chabuliwo bwakwe, achazipayizyo zyuumpidwe kuseni amansiku mubuzuba butegwa nsabata akuchiindi chamweezi mupya, akuchindi chaambidwe chepobwe lya Jehova Leza wesu. Eechi nchaalyonse, kuli Izilayeli. ⁵ Ing'anda eyo njinzoyaka inoli mpati loko, nkambo Leza wesu mupati kwinda boonse baleza. ⁶ Pesi ngwani ukonzya kuyakila Leza ing'anda, kuzwida kunyika yoonse alimwi nikuba ijulu lwalyo talikonzyi pe kumujata? Ndimeni kuti muyakile ing'anda, kwinda kuumpa zipayizyo kunembo lyakwe? ⁷ Aboobo nditumine mwalumi ooyo uzi kubeleka mulimu wangolida, insiliva, mukkuba abutale, alimwi uzi milimu yamasani ilimumusyobo wantumbula, aasalala, abuluba bwasyamuteme, mwalumi uzi kuchita yoonse misyobo yazisamu zibezedwe kabotu. Uunoli abalumi aabo bazi mulimu aabo banoli andime mu Juda amu Jelusalemu, aabo Davida taata mbakagwasya. ⁸ Unditumizye lubo siida, seyipulesi, a misamu ya alugumu kuzwa ku Lebbanoni, nkambo ndizi kuti bazike bako balizi kuti zisamu batema biyeni ku Lebbanoni. Laanga, balanda bangu bayoba abalanda bako, ⁹ kuchitila kuti undibambile zisamu mubwingi, nkambo ing'anda eeyo njinjenda inoli mpati akugambya. ¹⁰ Langa, ndiyokupa bazike balumi bayogonka zisamu, zyuulu makumi abbali zyalubuwa lwawiti, zyuulu makumi abili azisuwo makumi abili zyabbali, zyuulu makumi abili anongo zyawayini azyuulu makumi abili anongo yamafuta.'' ¹¹ Mpawo Hilamu, mwami wa Tulo, wakasandula mumalembe, aayo ngakatumizya kuli Solomoni: ''Nkambo Jehova uyanda bantu bakwe, wakakuchita kuti ube mwami kuli mbabo.'' ¹² Mukuyungizya, Hilamu wakati, ''Alongezegwe Jehova, Leza wa Izilayeli, wakalenga ijulu anyika, wakapa kuli Davida mwami mwana mulombe musongo, upedwe maanu akumvwisisisya, ooyo utakayake ing'anda ya Jehova ang'anda yabwami bwakwe. ¹³ Lino ndilatuma mwalumi uuzi mulumu kwindilila, Hilamu - Abbi, ooyo upedwe achipo chakumvwisisisya. ¹⁴ Mwana mulombe wamwanakazi wabaana basimbi ba Dani. Wisi wakali mwalumi waku Tulo. Ulikwizi kubeleka mulimu wangolida, nsiliva, mukkuba, butale, mabwe azisamu, alimwi yamasani amuntumbula, muteme, alimwi abuluba busalala amasani atuba. Ulikwizi lubo kulunda kufumbwa bwabulembo alimwi amukulunda kufumbwa bube. Akube busena mbwatabambilwe akati kababelesi bako, azyabaabo basimalelo aangu, Davida, wuso. ¹⁵ Lino mpawo, i witi a bbali, mafuta awayini, eeyo simalelo wangu njakali wamba, atumizye zintu eezi kubazike bakwe. ¹⁶ Tuyogonka zisamu kuzwa ku Lebbano mubwiingi mbuli nzyoyanda. Tuyozitola kuli nduwe mbuli mapulanga mulwizi kuyosika ku Jopa alimwi muyobweza kusikila ku Jelusalemu.'' ¹⁷ Solomoni wakabala boonse bazwa kule aabo bakali munyika ya Izilayeli, kayabutobezya munzila eeyo Davida wisi njakabalide. Bakajanika kuti bakali 153,600. ¹⁸ Wakatuma balumi bali zyuulu zili musanu azibili zyabwami kuti babweze mikuli balizyuulu zili musanu azitatu kuti babe basikunenga mabwe muzilundu abali zyuulu miyanda iitatu amyanda musanu awumwi kuti babe basikubalanga kuti babikke bantu mukubeleka.