¹ Bezaleel tamén fixo a arca de madeira de acacia, de dous cóbados e medio de longo, un e medio de ancho e un e medio de alto. ² E revestiuna de ouro puro por dentro e por fóra, e ao redor púxolle unha moldura de ouro. ³ Ademais fundiu catro argolas de ouro para as súas catro esquinas, dúas para un flanco e dúas para o outro. ⁴ Tamén fixo varas de madeira de acacia e revestiunas de ouro ⁵ E meteu as varas nas argolas, polos dous flancos da arca, para levala. ⁶ Fixo ademais un propiciatorio, de ouro puro, de dous cóbados e medio de longo e un e medio de ancho ⁷ Fixo tamén dous querubíns de ouro labrados a martelo, nos dous extremos do propiciatorio, ⁸ un en cada extremo, formando co propiciatorio un mesmo corpo. ⁹ Os querubíns despregaban as ás cara enriba, cubrindo o propiciatorio coas súas ás; un enfronte do outro; os rostros dos querubíns miraban cara ó centro deste. ¹⁰ Fixo tamén a mesa de madeira de acacia, de dous cóbados de longo, un de ancho e un e medio de alto. ¹¹ Revestiuna de ouro puro e púxolle arredor unha moldura de ouro. ¹² O redor fíxolle un reborde dun palmo de ancho e púxolle tamén unha moldura de ouro. ¹³ Fundiu catro argolas de ouro e púxollas nas catro esquinas, que estaban sobre as súas catro patas. ¹⁴ Preto do bordo estaban as argolas onde se introducían as varas para levar a mesa. ¹⁵ E fixo varas de madeira de acacia revestidas de ouro para levar a mesa. ¹⁶ Fixo tamén os instrumentos que había sobre a mesa: fontes, pratos, cuncas, e xerras para as libacións; todo de ouro puro. ¹⁷ Fixo ademais o candelabro de ouro puro, labrado a martelo, coa súa base e co seu fuste; as súas copas, cálices e corolas facían unha peza con el. ¹⁸ Dos seus lados saían seis brazos, tres dun lado e tres doutro. ¹⁹ Cada brazo tiña tres copas, coma flores de améndoa, co seu cáliz e a súa corola; eran iguais os seis brazos que saían do candelabro. ²⁰ No fuste do candelabro había catro copas, coma flores de améndoa, cada unha co seu cáliz e coa súa corola. ²¹ Debaixo de cada parella de brazos que saían do candelabro levaba un cáliz; era a mesma cousa cos seus brazos. ²² Os cálices e mais as corolas facían unha mesma peza de ouro puro labrado a martelo. ²³ Tamén fixo as súas sete lámpadas de ouro puro, coas súas pinzas e os seus pratos. ²⁴ Cun talento de ouro puro fixo o candelabro e todos os seus utensilios. ²⁵ Entón fixo o altar do incenso de madera de acacia; dun cóbado de longo, un de ancho, era cadrado, e dous de alto; os seus cornos formaban unha peza con el. ²⁶ Revestiuno de ouro puro por enriba, polos lados e nos cornos; púxolle arredor unha moldura de ouro. ²⁷ Nos dous lados, por baixo da moldura, púxolle dúas argolas de ouro, para meter nelas as varas e podelo transportar.. ²⁸ Entón fixo as varas de madeira de acacia e revestiunas de ouro. ²⁹ E fixo o aceite da santa unción e o incenso puro, de especias aromáticas, obra de perfumista.