¹ Gule si Jesús guidxi Belén xti Judea ca dxi guyuu rey Herodes, cadxi hombre nuu xpiaani ni zeedaca de ca guidxi nuu neza rindani gubidxa yendaaca' Jerusalen ziniica: ² "¿Paraa nuu Rey ni ma gule xti ca Judiu? Viiyadu xpeleguibe de zitu ne zeda gusisacadu laabe". ³ Ora rey Herodes binadiaga ndi, laa ne guidubi naca Jerusalén bidxibica'. ⁴ Herodes bichiña guira' ca sacerdote gola ne ca ni rucaa xtiidxa Diuxi de guidxi que que gunabadiidxabe laaca: "¿Paraa chi gale ni naca Cristu ca?" ⁵ Laacabe bicabicabe laabe: "Guidxi Belén xti Judea, purti maca bicaa profeta que ni: ⁶ 'NE LII, BELÉN, NI NUU XQUIDXI JUDÁ, CADI TUTUTIICA SI LII LADE CA GUIDXI RO' XTI JUDÁ, PURTI DE LII ZEDANDA TI XAIQUE NI GU'YA' CA XPINE' NUU ISRAEL. ⁷ Ti ora que Herodes bisendacaa ca hombre nuu xpiaani que para guinabadiidxa chaauibe laaca pora pe nga biuini belegui que. ⁸ Laabe biseendabe laaca guidxi Belén ne nabe: "La ché ne laguyubi chaaui xcuidi ca. Ora guidxelatu laabe lagabi naa, ti chaa ra nuube ne laca gusisaca laabe". ⁹ Bicaadiaga si cabe rey que gunaazecabe xnezacabe ne xa belegui bi'yacabe de ladu rindani gubidxa que zaaniru lucabe ne bizuhuaadxi ra nuu xcuidi que. ¹⁰ Ora bi'ya cabe belegui que nabe biechecabe ne bisisaca cabe. ¹¹ Laacabe guyecabe ra yoo que ne biiya cabe xcuidi que, ne Maria ñaa. Laacabe bisuxibicabe ne bisisaca cabe laabe; bixalecabe ca ni zineecabe que, ne bidiicabe laabe regalu de oro, gu'xu ne nisa ziizii xti mirra. ¹² Diuxi bisaniruca lucabe lu ti bacaanda ma que ibigueta cabe ra nuu Herodes; ngue runi guye cabe xquidxi cabe xti ladu neza. ¹³ Zeesicabe que, ti Ángel xti Señor biree lu José lu ti bacaanda ne rabi laabe: "Biasa, gucuaa xcuidi ca ne ñaa, ne laguxooñe lache Egipto. La guiaana raca de ora naa gabe laatu, purti rey Herodes zuyubi xcuidi ca para guutibe laa". ¹⁴ Gueela que José biasa, gucuaa xcuidi que ne ñaa que, ne zeecabe Egipto. ¹⁵ Laabe guyuube raque de bedanda dxi guti Herodes. Sacari bizaa ni guni' Diuxi gudxi profeta que, "DE GUIDXI EGIPTO NAA BIZENDACAA XIIÑE". ¹⁶ Ora gunna Herodes gudxite ca hombre nuu xpiaani que laa, nabe bidxiichibe. Laabe biseenda guutibe guira ca hombre huiini nuu Belén ne guira' ca guidxi que, ni ñapa chupa iza o xcaadxisi nahuiini', bia'si pe iza gudixe xa hombre nuu xpiaani que. ¹⁷ Ti ora que biza' guira ni maca guni' profeta Jeremias que: ¹⁸ "BINADIAGA CABE TI RIDXI DE RAMÁ, GUENDARUUNA NE TI RIDXIYUUBA, RAQUEL CAYUUNA PUR CA XIIÑI, NE QUE NINNABE NIGANIBE RA CUSIGANICABE LAABE PURTI MA GUTI CA DXIIÑI BE". ¹⁹ Dxi Herodes guti', ti Ángel xti Señor biree lu ti bacaanda lu José, Egipto ne rabibe laa. ²⁰ "Biasa ne gucuaa xcuidi ca ne ña, llene laacabe guidxi Israel purti ca ni canayubi guuti laabe que, ma guti ca' ". ²¹ José biasa ne gucuaa xcuidi que ne ñaa, ne guyé guidxi Israel. ²² Peru ora laabe binadiagabe naca Arquelao xaique guidxi Judea, luxcar bixoze Herodes , bidxibi ñe ra que. Ra ma gudxica Diuxi laabe lu ti bacaanda xi chi izaaca, bireebe zebe ca guidxi Galilea, ²³ ne llebi'be guidxi Nazaret. Ne ndii bisaani ni maca guni' ca profeta, laabe zareelabe Nazareno.