الفصل 18
1
وعَظْهُم ثَانِي مَثَل بَلِي يْلِيقْ يْصَلُو كُلْ وَقْتْ و ما يْمَلُوشْ،
2
ڤَالْ :"كَانْ فِي وَاحَدْ لَمْدِينَة قَضِ مَيْخَافْشْ رَبِي و مَيْهَمَهْشِ فِي بْنَادَمْ.
3
وْكَانَتْ فْهَدِيكْ لَمْدِينَة هَجَالَة .وْكَانَتْ تْجِي عَنْدَهْ وْتْڤُولَهْ جِبْلِي حَقِي .
4
وْمَكَاشْ يَسْمَعْ لْهَا بَصَحْ ڤَالْ مْعَ رُوحَهْ:وْحَتَى ويْلَا مَكُنْتْشْ نْخَافْ رَبِي وْ نْخَافْ مَنْ شِي بْنَادَمْ .
5
عْلَى خَاطَرْشْ هَادْ الهَجَالَة سَامْطَة عْلِيَا نْمَدَلْهَا حَقْهَا بَاشْ مَاتْجِيشْ دَايْمَا تْصَدَعْنِي .
6
وْڤَالْ الرَبْ:"سَمْعُوا شَارَاهْ يْقُولْ قَاضِي الظُلْمْ .
7
الَلهْ مَيْرَدْشْ الحَقْ لْمُخْتَارِينْ لِيَطَلْبُوهْ لِيلْ وْنْهَارْ وْهُوَ زَعْمَا يَبْطَا عْلِيهُمْ ؟
8
نْڤُولْكُمْ مَدَلْهُمْ حَقْهُمْ بَصَّحْ وِينْتَا مَا رْجَعْ اِبْنْ الاِنْسَانْ عَادِي زَعْمَا يَلْقَى الاِيمَانْ في الاَرْضْ ؟
9
وْڤَالْ لْوَحْدْ لْقَوْمْ عَنْدْهُمْ ثِقَة في رْوَاحْهُمْ بلِي هُمَا صَالْحِينْ وْيَحَڤْرُوا لُخْرِينْ هَدَا هُوَ لْمْتَلْ :
10
"كَانُوا زُوجْ بْنْيَادَمْ طَلْعُوا لَلْهَيْكَلْ بَاشْ يْصَلُوا وَاحَدْ مَنْهُمْ فَارسِي وْلَاخُرْ عَشَارْ .
11
بَصَحْ الفَارسِي وْڤَفْ وْيْصَلِي وْيْقُولْ مْعَ رُوحَهْ : الَّلهُمَّ نَشَكْرَكْ عْلَى خَاطَرْ مَنِيشْ كِيمَا النَّاسْ الطَّمَاعِينْ وْ الظَالْمِينْ وْ الزُنَاتْ ، وْلَا كِيمَا هَادْ العَشَارْ .
12
نْصُومْ يُومِينْ في السْمَانَة وْنَعْشَرْ منْعَنْدِي .
13
بَصَحْ هَادَاكْ العَشَارْ وْڤَفْ مَبْعِيدْ مَنَجَمْشْ حَتَى يَرْفَدْ عِينِيهْ لْسْمَا ، بَصَحْ ضْرَبْ عْلَى صَدْرَهْ وْڤَالْ : الَّلهُمَ ارْحَمْنِي انَا المَدْنُوبْ .
14
نْڤُولْكُمْ هَدَا هوَّدْ لْدَارَهْ صَافِي منْ دْنُوبْ عْلَى خَاطَرْ ڤَاعْ لِيَتْكَبَرْ يْطِيحْ وْڤَاعْ لِيَتْوَاضَعْ يتَعْلَى شَانَهْ .
15
جَابُولَهْ وْلَادْ صْغَارْ بَاشْ يْبَارَكْهُمْ ، وْ كِيشَافْهُمْ التَلَامِيذْ حَاوْزُوهُمْ .
16
بَصَحْ يَسُوعْ عَيَطَلْهُمْ وْڤَالْهُمْ :"خَلُوا لَوْلَادْ يْجُوا عَنْدِي مَتَمَنْعُوهُمْشْ عْلَاخَطَرْ مَلَكُوتْ الَّلهْ مَخْدُومَة لْكِيمَا هَادُو .
17
الحَقْ نْڤُولْكُمْ :"لِمَيَقْبَلْشْ مَلَكُوتْ الَّلهْ كِيمَا هَادْ الوَلْدْ مَيَدْخُلْشْ" .
18
وْسَقْسَاهْ وَاحَدْ مَتْرَفَهْ وْ قَالْ : "يَا مُعَلِمْ الصَالِحْ شَانْدِيرْ بَاشْ نَوْرَثْ مَلَكُوتْ السَمَوَاتْ ؟"
19
وْڤَالَهْ يَسُوعْ عْلَاهْ سَمِيتْنِي صَالِحًا مَاكَانْ حَتَى وَاحَدْ صَالِحْ مَنْ غِيرْ وَاحَدْ هُوَ الَّلهْ .
20
رَاكْ تَعْرَفْ الوَصَايَا :مَتزْنِيشْ . مَتسْرَقْشْ . مَتَقْتَلْشْ . مَتَشْهَدْشْ بْزُورْ . وْكْرَمْ بُوكْ ومُكْ."
21
وْڤَالَهْ :"هَادُوا ڤَاعْ حْفَظْتْهُمْ مَلِي كُنْتْ صْغِيرْ ."
22
كِي سْمَعْ لَهْ يَسُوعْ ڤَالَهْ: بَاقِيلَكْ حَاجَة وَحْدَة تْدِيرْهَا : "بِيعْ ڤَاعْ شَاعَنْدَكْ وْڤَسْمَهْ عْلَى ڤْلَالِيلْ وْيْكُونْ لَكْ كَنْزْ فْسْمَا وْمْبَعْدْ تَبَّعْنِي."
23
وْكِي سْمَعْ دَاكْ الشِي حْزَنْ عْلَى خَاطَرْ كَانْ مْرَفَّهْ بَزَافْ .
24
كِشَافَهْ يَسُعْ حْزِينْ ڤَالْ: شْحَالْ وَاعَرْ بَاشْ يَدْخَلْ المْرَفَهْ لْمَلَكُوتْ الَّلهْ!
25
عْلَى خَاطَرْ سَاهَلْ يَدْخُلْ لْجْمَلْ في ثُقْبْ تَاعْ لَبْرَا وْوَاعَرْ بَاشْ يَدْخُلْ المْرَفَهْ لْمَلَكُوتْ الَّلَهْ ."
26
ڤَالُولَهْ لِسَمْعُوا :"شْكُونْ لِيَقْدَرْ يَدْخُلْ لْمَلَكُوتْ الَّلهْ؟ "
27
ڤَالْ :"لِمَيْقْدَرْشْ عْلِيهْ النَّاسْ يَقْدَرْ عْلِيهْ رَبِي".
28
ڤَالْ بُطْرُسْ :"رَانَا خَلِينَا كُلْشِي وْتَبَعْنَاكْ"
29
ڤَلهُمْ :"الحَقْ نْقُولْكُمْ : مَكَاشْ حَتَى وَاحَدْ خَلَّى دَارَهْ وَلَا وَالْدِيهْ وَلَا خَاوْتَهْ ولَا مَرْتَهْ وَلَا وْلَادَهْ عْلَى جَالْ مَلَكُوتْ الَّلهْ .
30
رَاهْ غَادِي يَتْرَدْلَهْ كُلْشِي لِسْمَحْ فِيهْ الزْمَانْ فَلَخْرَا يَتْرَدْلَهْ الحَيَاةْ الاَبَدِيَة .
31
وْدَا التَلَامِيذْ الاثْنَا عَشَرْ طَلْعُوا لْاُورْشَالِيمْ وْغَادِي يَصْرَا الشِي لْمَكْتُوبْ بلْاَنْبِيَاءْ عْلَى اِبْنْ الاِنْسَانْ .
32
عْلَى خَاطَرْ يْمَدُوهْ لَلْمَسْؤُولِينْ ، يْزَعْقُوا عْلِيهْ ، يْعَايْرُوهْ وْيَشَتْمُوهْ وْ يَدَفْفْلُوا عْلِيهْ .
33
وْيَجَلْدُوهْ وْيَقَتْلُوهْ في النْهَارْ الثَالَثْ يَحْيَا .
34
بَصَّحْ مَفَهْمُوا حَتَى حَاجَة وْكَانْ هَادْ الشِي مَخْفِي عْلِيهُمْ وْمَفَهْمُوشْ لِي ڤَالَهْ .
35
وْكِي ڤَرْبُوا مَنْ اَرِيحَا كَانْ وَاحْدْ لَعْمَى مْجَمَعْ فْطْرِيقْ يَطْلَبْ .
36
كِي سْمَعْ بَلِي جْمَاعَة فَايْتَة مَنْ تَمَا سَقْسى وْڤَالْ :"شَاكَاينْ هْنَا ؟"
37
خَبْرُوهْ بَلِي يَسُوعْ النَّاصِرِي فَايَتْ مَنْ تَمَا .
38
زَڤَا وْڤَالْ :"يَايَسُوعْ اِبْنْ دَاوَدْ اِرْحَمْنِي !"
39
بْدَاوْ يْسَكْتُوا فِيهْ وْهُوَ يْزَڤِي وْيْقُولْ :"يَايَسُوعْ اِبْنْ دَاوَدْ اِرْحَمْنِي !"
40
وْڤَفْ يَاسُوعْ وْقَالْهُمْ جِيبُوهْ لَهْنَا وْ كِي ڤَرَبْ لْعَنْدَهْ سَقْسَاهْ
41
وْڤَالَهْ:" شَارَاكْ بَاغِي نْدِيرْلَكْ ؟ " ڤَالْ :"يَاسِيدِي نِ بَاغِي نْشُوفْ "
42
ڤَالَهْ يَسُوعْ :"شُوفْ. اِيمَانَكْ هُوَ لِبَرَّاكْ"
43
تَمْتَمْ وَلَّا يْشُوفْ وْتَبْعَهْ وْيْمَجَّدْ الَّلهْ وْڤَاعْ لِي شَافُوا هَادْ الشِي حَمْدُوا رَبِّي .