الفصل 16
1
وْ ڤَالْ تَانِي لْتْلَامَذْ تَاوْعَهْ : "كَانْ وَاحَدْ الْرَاجَلْ مْرَفَهْ وْ عَنْدَهْ وْكِيلْ ، جَابُولَهْ خْبَرْ بَلِي رَاهْ يْضَيَعْلَهْ فِي دْرَاهْمَهْ .
2
عَيَطْلَهْ وْ ڤَالَهْ : شَا رَانِي نَسْمَعْ عْلِيكْ ؟ عْطِينِي ڤَاعْ لْحْسَابْ مَنْ نْهَارْ لِي وَكَلْتَكْ عْلَى خَاطَرْ مَنْ دُوكْ مَاغَدِيشْ تْكُونْ وْكِيلْ .
3
وْ ڤَالْ لْوْكِيلْ فِي ڤَلْبَهْ : شَا نْدَيرْ ؟ عْلَى خَاطَرْ سِيدِي غَادِي يَڤْلَعْلِي لْوَكَالَة . وْ مَنْقَدْشْ نَخْدَمْ ، وْ نَحْشَمْ نَطْلُبْ.
4
رَانِي عْرَفْتْ شَا غَادِي نْدِيرْ ، وْ حَتَى اذَا حَاوْزُونِي يَقَبءلُونِي شِي نَاسْ فِي دْيَارْهُمْ .
5
وْ جَابْ ڤَاعْ نَاسْ لِكَانْ يْسَالَلْهُمْ سَيدَهْ ، وْ ڤَالْ لَلَوَلْ : شْحَالْ يْسَالَكْ سِيدِي ؟
6
جَاوْبَهْ وَ ڤَالَهْ : مِيَة بِيدُو زِيتْ . ڤَالَهْ : أَدِّي ضْمَانْتَكْ وْ خُفْ جَمَعْ وْ اكْتُبْ خَمْسِينْ .
7
وْ ڤَالْ لْوَاحَدْ آخُرْ . وْ نْتَ شْحَالْ يْسَالَكْ ؟ جَاوْبَهْ : مِيَة كِيلْ ڤَمْحْ وْ َالَه أَدِّي ضْمَانْتَكْ وَ كْتَبْ ثْمَانِينْ .
8
شْكَرْ الْسِّيدْ هَدَاكْ لَوْكِيلْ الِظَالَمْ عْلَى الْحِكْمَة تَاعَهْ ، عْلَى خَاطَرْ وْلَادْ هَادْ لْجِيلْ عَنْدْهُمْ حِكْمَة كْتَرْ مَنْ وْلَادْ الْنُّورْ فِي جِيلْهُمْ .
9
وْ أنَا نْڤُولَلْكُمْ : دِيرُوا صْحَابْ بَدْرَاهَمْ لَحْرَامْ ، بَاشْ اذَا كَمْلُولْكُمْ دْرَاهَمْ يْفِيدُوكُمْ فِي دْيَارْ لَبْدَة
10
لِي يْتْأَمَنْ عْلَى لَقْلِيلْ يَقْدَرْ يْتْأَمَنْ عْلَى بْزَافْ حْوَايَجْ وْ لِي ظَالَمْ فِي لَقْلِيلْ يَقْدَرْ يَظْلَمْ فِي بْزَافْ حْوَايَجْ .
11
وْ إِذَا مَتْأَمَنْتُوشْ فِي دْرَاهَمْ لَحْرَامْ ، شْكُونْ غَادِي يْأَمَنْكُمْ عْلَى لْحَقْ ؟
12
وْ اذَا مَكُنْتُوشْ مْأَمْنِينْ عْلَى صْوَالَحْ لْغِيرْ ، شْكُونْ غَادِي يْمَدَلْكُمْ شِي لِي هُوَ لِيكُمْ
13
مَايَقْدَرْشْ لْخَادَمْ يَخْدَمْ زُوجْ سْيَادْ ، إَما يْزَعَفْ لْوَلْ وْ يَرْضِي لَاخُرْ ، وْلَا يْكُونْ مْعَ وَاحَدْ وْ يَحْڤَرْ لَاخُرْ. وْ مَنَقَدْرُوشْ نَعَبْدُو رَبِي وَ دْرَاهَمْ ".
14
وْ تَانِي كَانُوا الْفِرِّيسِيِّونْ يَسَمْعُوا وْ هُومَا يَبْغُوا دْرَاهَمْ ، مَنْبَعْدْ تْمَسَخْرُوا بِيهْ .
15
وْ ڤَالَلْهُمْ : ". نْتُومَا لِي تْصَفُوا رْوَاحْكُمْ ڤُدَّامْ الْنَّاسْ بَصَحْ رَبِي يَعْرَفْ ڤْلُوبْكُمْ . وْ لِي يْتْكَبَّرْ حْدَا الْنَّاسْ هُوَ مضكْرُوهْ عَنْدْ الله .
16
" وْ بْقَاتْ الْشَّرِيعَة وَ الْأَنْبِيَاءْ حْتَى جَاءَ يُوحَنَّا . وْ مَنْ دَاكْ الْوَقْتْ بْدَا يْبَشَرْ بْلْمَلَكُوتْ تَاعْ الله ، وْ كُلْ وَاحَدْ كَانْ يَضْرَبْ بَاشْ يَوْصَلْ لَعَنْدَهْ .
17
سَاهَلْ بَاشْ تَفْنَى الْسْمَا وْ الْأَرْضْ بَصَحْ حْتَى حَرْفْ وَاحَدْ مَنْ الْشَرِيعَة مَايْتَمْحَاشْ .
18
ڤَاعْ لِي طَلَڤْ مَرْتَهْ وْ يَتْزَوَجْ بْوَاحْدُخْرَى هُوَ يَزْنِي ، وْ ڤَاعْ لِّي يَتْزَوَجْ مَنْ مْطَلْڤَة هُوَ رَاجَلْ زَانِي .
19
كَانْ وَاحَدْ لَبْنَادَمْ مْرَفَهْ يَلْبَسْ غِيرْ لَبْسَة الْغَالْيَة الْمَخْدُومَة بَلْأُرْجُوَانْ وْ هُوَ دَايْمََا يْتْنَعَّمْ بَالْرَزْقْ تَاعَهْ .
20
وْ كَانْ وَاحَدْ لْمَسْكِينْ سْمُوهْ لَعَازَرْ ، لِّي كَانْ طَايَحْ ڤُدَامْ دَارَهْ مَضْرُوبْ وْ مَجْرُوحْ ،
21
وْ هُوَ مَشْتَاڤْ يَاكُلْ حْتَى لَفْتَاتْ لِي طَايَحْ مَنْ طَابْلَة تَاعْ لْمْرَفَهْ ، وْ كَانَتْ لضكْلَابْ تْجِي وْ تَلْحَسْ جْرُوحَهْ .
22
وْ مَاتْ هَدَاكْ لْمَسْكِينْ وْ رَفْدُوهْ لْمَلَايْكَة لْعَنْدْ إِبْرَاهِيمْ وْ مَاتْ لْمْرَفَهْ تَانِي وْ دَفْنُوهْ ، وْ لْقَى رُوحَهْ فِي لْجَحِيمْ يْتْعَذَّبْ ،
23
وْ شَافْ إِبْرَاهِيمْ مَنْ بْعِيدْ وْ لِعَازَرْ مْعَاهْ فِي حَجْرَهْ
24
عَيَطْ وْ ڤَالْ يَا بُويَا إِبْرَاهِيمْ أَرْحَمْنِي، وَ رْسَلْ لِعَازَرْ بَاشْ يْشَمَخْ طَرْفْ صْبَاعَهْ بَلْمَاء وْ يْبَرَدْلِي لْسَانِي، عْلَى خَاطَرْ رَانِي مْعَذَّبْ فِي هَادْ نَّارْ .
25
ڤَالَهْ إِبْرَاهِيمْ يَا وَلْدِي ، تْفَكَّرْ بَلِي تْمَتَّعْتْ فِي لْحْيَاة تَاعَكْ وْ أَلِيعَزَرْ كَانْ مَغْبُونْ . وَ لْيُومْ هُوَ يْتْعَزَّى وْ نْتَ تَتْعَذَّبْ .
26
وْ فُوڤْ هَاذْ شِي ڤَاعْ ، بِينَّا وْ بِينْكُمْ حُفْرَة عَامْقَة ، مَا يَقْدَرْ حْتَى وَاحَدْ يَڤْطَعْهَا لَا مَنْ هْنَا لْعَنْدْكُمْ لَا مَنْ عَنْدْكُمْ لَعَنْدْنَا .
27
ڤَالْ : يَا بُويَا إِبْرَاهِيمْ ، أَنَا نْطُلْبَكْ بَاشْ تَرْسَلْ لْدَارْ بُويَا ،
28
لَخَطَرْ عَنْدِي خَمْسَ خُوتْ، بَاشْ يْخَبَرْهُمْ بْلِّي صْرَا بَاشْ هُومَا تَانِي مَيْجُوشْ يَتْعَذْبُوا فِي هَذا المَوْضِعْ .
29
ڤَالَهْ إِبْرَاهِيمْ : عَنْدْهُمْ مُوسَى وْ الْأَنْبِيَاءْ ، بَاشْ يَسَمْعُوا مَنْهُمْ .
30
وْ ڤَالْ لَا يَا بُويَا إِبْرَاهِيمْ ، بَصَحْ إِذَا رَاحْ وَاحَدْ مَنْ الْمُوتَى يْتُوبُو .
31
ڤَالَه : إِذَا كَانُوا مَيَسَمْعُوشْ مَنْ مُوسَى وَ الْأَنْبِيَاءْ ، وْ حَتَى إِذَا رَاحْ وَاحَدْ مَنْ المُوتَى مَيْأَمْنُوشْ ".