الفصل 15
1
وْ كَانُوا ڤَاعْ الْعَشَارِينْ وْ لْخَاطيِينْ يْڤَدْمُوا لْعَنْدَهْ بَاشْ يَسَمْعُوهْ .
2
زَعْفُوا الفَرِيسيِينْ وْ مُعَلِمِينْ الشَرِيعَة : " هَذَا يْرَحَبْ بِالْخَاطْيِينْ وْ يَاكُلْ مْعَاهُمْ !".
3
وْ كَلَمْهُمْ بْهَذَا لْمْثَلْ وْ ڤَالْ:
4
شْكُونْ فِيكُمْ عَنْدَهْ مْيَاتْ خْرُوفْ، وْ ظَاعْلَهْ وَاحَدْ ،مَيْخَلِيشْ تْسْعَ وْ تَسْعِينْ فْلَخْلَا ، وْ يْرُوحْ يْحَوَسْ عْلَى لْخْرُوفْ الضَايَعْ حْتَى يَلْقَاهْ ؟
5
و كِي يَلْقَاهْ يَفْرَحْ ،
6
وْ يْجِي لْدَارَهْ وْ يَعْرَضْ صْحَابَهْ وْ جِيرَانَهْ وْ يْڤُولَلْهُمْ : اَفَرْحُوا مْعَايَا ، لَخَاطَرْ لْقِيتْ لْخْرُوفْ لَي ضَاعْلِي !
7
نْڤُولَلْكُمْ : هَكَا يْكُونْ فَرْحْ فِي الْسْمَا بْخَاطِي وَاحَدْ يْتُوبْ أَكْثَرْ مَنْ تَسْعَة وْ تَسْعِينْ صَالَحْ مَيَسْحَقُوشْ الْتُوبَة .
8
شْكُونْ هَادْ لْمْرَة لَي عَنْدْهَا عَشْرة دُورُو، وْ إِدَا تْوَدَرَلْهَا دُورُو وَاحَدْ ، مَتْنُوضْشْ تَشْعَلْ الْمَصْبَاحْ وْ تَصْلَحْ ڤَاعْ الْدَارْ وْ تْفَتَشْ ڤَاعْ جْوَايَهْ حْتَى تَلْقَاهْ ؟
9
وْ كِي تَلْقَاهْ تَعْرَضْ صْحَبَاتْهَا و جَارَاتْهَا و ْ تْڤُولضلْهُمْ افَرْحُوا مْعَايَا لَخَاطَرْ لْقِيتْ الدُورُو لِي ضَيَعْتَهْ .
10
كِيمَا هَاكْ ،نْڤُولَلْكُمْ : يْكُونْ فَرْحْ كْبِيرْ ڤُدَامْ الْمَلَايْكَة بْخَاطِي وَاحَدْ يْتُوبْ .
11
وْ ڤَالْ : " وَاحَدْ لْبْنَادَمْ كَانْ عَنْدَهْ زُوجْ وْلَادْ .
12
وْ ڤَالْ صْغِيرْ لْبُوهْ : يَا بَويَا أَعْطِينِي حَقِي مضنْ الْوَرْثْ وْ ڤْسَمَلْهُمْ رَزْقَهْ .
13
وْ بَعْدْ شِي يَمَاتْ لَمْ لْوَلْدْ الْصْغِيرْ كُلْ شِي وْ سَافَرْ لْبْلَادْ بْعِيدَة ، وْ تْمَ ضَيَعْ ڤَاعْ رَزْقَهْ .
14
وْ كِي ضَيَعْ ڤَاعْ دْرَاهْمَهْ ، صْرَى جُوعْ كْبِيرْ فِي دِيكْ لْبْلَادْ بْدَا يَسْحَقْ دْرَاهْمَهْ .
15
رَاحْ وْ تْلَاقَا بْوَاحَدْ مَنْ هَادِيكْ لْبْلَادْ ، وْ رَسْلَهْ بَاشْ يَرْعَى لْحْلَالِيفْ .
16
وْ كَانْ يْشْتْهَى بَاشْ يءعَمَرْ كَرْشَهْ مَنْ لْخَرُوبْ لِي كَانَتْ تَاكْلَهْ لْحْلَالِيفْ وْ مَا عْطَاهْ حْتَى وَاحَدْ .
17
رْجَعْ لْعَقْلَهْ وْ ڤَالْ : شْحَالْ مَنْ خْدَّامْ عَنْدْ بُويَا يَاكُلْ الْخُبْزْ بْلَا شَحَة وْ أَنَا هْنَا رَانِي ضَايَعْ بَلْجُوعْ! .
18
نُوضْ وْ نْوَلِي عَنْدْ بُويَا وْ نْڤُولَهْ : يَا بُويَا ، غْلَطْتْ ڤُدَّامْ رَبِي مْعَاكْ ،
19
وْ مَانَسْتَاهَلْشْ بَاشْ نْتْسَمَى وَلْدَكْ وْ حْسَبْنِي كِيمَا وَاحَدْ مَنْ خْدَامْ تَاوْعَكْ .
20
نَاضْ وْ جَا عَنْدْ بُوهْ. وْ شَافَهْ بُوهْ مَنْ بْعِيدْ ، تْحَنَنْ عْلِيهْ وْ جْرَى عَنْدَهْ وْ عَنْڤَهْ وْ سَلَمْ عْلِيهْ .
21
وْ ڤَالَهْ وَلْدَهْ : يَا بُويَا ، غْلَطْتْ ڤُدَامْ رَبِي وْ ڤُدَّامَكْ، وْ مَا نَسْتَاهَلْشْ بَاشْ نْتْسَمَى وَلْدَكْ .
22
وْ ڤَالْ بُوهْ لَلْخُدَامْ : جِيبُوا لْبْسَة لْمْخَيْرَة وْ لَبْسُوهْلَهْ ، وْ دِيرُولَهْ خَاتَمْ فِي يَدَهْ ، وْ صْبَاطْ فِي كَرْعِيهْ ،
23
وْ جِيبُوا فَرْدْ مْلِيحْ وْ ذَبْحُوهْ نَاكْلُوا وْ نَفَرْحُوا،
24
لَخَاطَرْ وَلْدِي كَانْ مَيَتْ وْ عَاشْ وْ كَانْ ضَايَعْ وْ رْجَعْ وْ بْدَاوْ يَفَرْحُوا .
25
وْ كَانْ وَلْدَهْ لَكْبِيرْ فِي لْفِيرْمَا .وْ كِي رْجَعْ وْ ڤَرَبْ لْدَارْ ، سْمَعْ لْغْنَى وْ رْڤِيصْ .
26
وْ عَيَطْ لْوَاحَدْ لْخَدَامْ و سَقْسَاهْ : شَا رَاهْ صَارِي هْنَا ؟
27
ڤَالَهْ : خُوكْ صْغِيرْ رْجَعْ وْ بُوكْ دْبَحْلَهْ الْفَرْدْ لَمْلِيحْ ، لَخَاطَرْ رْجَعْ بْخِيرْ وْ عْلَى خِيرْ.
28
زْعَفْ خُوهْ وْ مَبْغَاشْ يضدْخُلْ لْدَّارْ . وْ خْرَجْ عَنْدَهْ بُوهْ بَاشْ يْحَاوْلَهْ .
29
جَاوَبْ وْ ڤَالْ لْبُوهْ : رَانِي نَخَدْمَكْ شْحَالْ مَنْ عَامْ ، وْ عُمْرِي مَا عْصِيتَكْ ، وْ عَنْزِي صْغِيرْ مَا عْطِيتْنِيشْ بَاشْ نَفْرَحْ بِيهْ مْعَ صْحَابِي .
30
وْ بَصَحْ كِيجَا وَلْدَكْ الْصْغِيرْ لِي كْلَا رَزْقَكْ فَلَحْرَامْ ، ذْبَحْتْلَهْ الْفَرْدْ لَمْلِيحْ !
31
ڤَالَهْ : يَا وَلْدِي أَنْتَ مْعَايَا كُلْ يُومْ، وْ ڤَاعْ لِي عَنْدِي هُوَ تَاعَكْ .
32
وْ بَصَحْ كَانْ يْلِيقْ نَفَرْحُوا ، لَخَاطَرْ خُوكْ كضانْ مَيَتْ وْ عَاشْ، وْ كَانْ ضَايَعْ وْ تَلْقَا ".