¹ Gudiidi si candi la? naa biiya tapa ángel zuhuaa cá lu guidapa ndaa xti guidxi layú nadipa cucueeza ca' guidapa bi xti guidxilayú ti ti zacá nin ti bi gundúbi ndaani guidxilayú, lu nisa do', nin ca guniná nin ti yága. ² Naa biiya xti ángel zeeda de neza riasa gubidxa ni napa firma xti Diuxi ni nabáni. Laabe bicaabe ridxi nadipa' guidápa ángel ni laaca ma biaana lu náca' guniná ca' guidxilayú ne nisa do'. ³ "Cadi guniná tu guidxilayú, nisa do' nin ca cá yága, guiluxe sidú de gucádu' ti firma lucuá ca ni rúni xiiña Diuxi xtinú. " ⁴ Naa bina diága xigába xti ca ni laaca gucuaca' firma: 144,000, cani gucuá firma de guira ca ni zá de cada tobi de ca lisaa xti guidxi Israel. ⁵ Chii ne chupa bixiapa de ca lisaa xti Judá gucuáca' firma, chii ne chupa bixiapa cani zá de Lisaa xti Rubén, chii ne chupa bixiápa ni zá de lisaa xti Gad. ⁶ Chii ne chúpa bixiapa de ca lisaa xti Aser, chii ne chupa bixiapa de ca lisaa xti Neftalí, chii ne chupa bixiapa de ca lisaa xti Manasés. ⁷ Chii ne chupa bixiapa de ca lisaa xti Simeón, chii ne chupa bixiapa de ca lisaa xti Leví, chii ne chupa bixiapa de ca lisaa xti Isacar, ⁸ chii ne chupa bixiapa de ca lisaa xti Zabulón, Chii ne chupa bixiapa de ca lisaa xti José, ne chii ne chupa bixiapa de ca ni zá de ca lisaa xti Benjamín, gucuá ca firma. ⁹ Ne udidisí ca ndi' naa biiya', raqué nuu xtale binni ni guíruti que zanda ugába'- de ira xixe ca guidxi ro', tribu, guidxi huiini' ne ira xixe diidxa-suhuaa ca' xañee bangu ndxo', ne neza lú Dendxu huiini'. Laacabe nacu cabe lari naquiichi' ne naaze cabe ti rama zíña lu ná cabe, ¹⁰ ne laacabe cucaa cabe ridxi ne ti ridxi nadipa': "¡Ni bilá laanu nga Diuxi xtinú ni laa súba lu bangu ndxo', ne Dendxu huiini!" ¹¹ Guira xixe ca ángel suhuaa ca interu buelta bangu ndxo' qué ne interu buelta de ca ni nagóla ne guidapa' ca guenda ni nabáni ni bisa' Diuxi, ne laaca bisuxibi ca layú ne gulaqui lucuá ca' xa ñee bangu ndxo' qué. Lacabe bisisaca cabe Diuxi, ¹² Ne ná cabe: " ¡Zacá gaca ní! ¡Guenda rusizáca, guenda nandxo', guenda riuu xpiaani', guenda rapa tí guénda, guenda rusuxibícabe xa ñee, guenda nadipa, ne guenda rusuhuaa dxichi', gacani para Diuxi pur ira dxí ne para ira xixe dxí! ¡Zacá gaca ní!" ¹³ Oraque tobi de ca ni nagóla qué gunaba diidxa naa: "¿tuu ca ndi, ni nacu cá lari quichi' di', ne de padé seeda cabe pue?" ¹⁴ Naa gudxe laabe: "Xpixuaana', lii nána lu'" ne laabe gudxibe naa: "Ca ndi nga ca ni beeda ante que guiaba Guenda Naná ndaani guidxilayú. Laacabe ma gudiibi cabe ca xlari cabe, ne ma bisaana cabe ca ní naquichi' lu ríni xti Dendxu huiini qué. ¹⁵ Ne pur ndí la?, laacabe nuu cabe neza lú bangu ndxo' xti Diuxi, ne laacabe cusizaca cabe Laabe dxí ne gueela' ndaani yu'du' xtibé. Ni Laa súba lu bangu ndxo' qué zuchiaabe yoo huiini de lari xtibe luguiá ca'. ¹⁶ Laacabe ma que sandaana ru cabe, nin ca ma que sati cabe nísa. Ma que susidxága gubidxa laacabe nin ru xti guenda nandá xaata'. ¹⁷ Purti Dendxu huiini ni suba galahui bangu dxo' qué záca ni sá nanda laacabe, ne laa siné laacabe ra nuu ca nisa de guenda nabaní, ne Diuxi suchaa nisa lú cabe."