¹ Guca, gudiidi si cadxi dxii, Jesus bizulu guye' guira guidxhi ne ca guidxihiini, ne canayui' ne cana uca' riidxi de ca nacubi ni galan de guenda runi mandar xti Diuxhi. Ca chii ne chupa que' guye' ca ne laabe, ² ngaca cadxi guná ni biándaca de cadxhi guenda ni nadxaba ne guendahuara: maria ni raabi cabe Magdalena, ni bire' gadxe binidxaba de la', ³ Juana xheela Chuza, ni ribaquichaui ca xti Herodes, Susana, ne xtale guná, ca ni de lu' xtiica rudii´ca para ni caquiiñe. ⁴ Laaga xtale binni que cadxiña, ne binni zeeda ra nuube de guira ca guidxhi, laabe guyui' be ti ejemplu: ⁵ "Tobi hombre rudxhiiba bire sigudxiiba cadxi biidxi. Laaga laabe cudxiiba be, caadxi de laacani biaba guria' neza ne bixata ñé' cabe laaca, ne ca maní' ripapa gudo'ca ni'. ⁶ Caadxi biabaca lu guie', ne casi guche ndu' ca' bibiidxi ca' purti que gapaca gudxa. ⁷ Ne xcaadxi biabaca laade guiichi, ne ca guiichi que bigáa' ca cue' ca biidxhi que, ne bichii' cani. ⁸ Peru caadxi biaaba ca layu' sicaru', ne bidii ni bia' ti gayua' tiru jma'." Guni' si Jesus ca ndi' Laabe Guni' be: "ni napa diaga para gunadiaga la? guca' diaga." ⁹ Ca discipulu gunabadidxa ca' laabe xhi rini' ejemplu di'. ¹⁰ Laabe guni' be:" guenda runibia' de ca ni naga'chi xti guenda runi mandar xti Diuxhi ma gucua tu, peru xcaadxi naa rinie nia laaca ne ejemplu, ti para, NECA CAYUUYA CA, QUE SANDA GU'YACA, NE NECA CUCA DIAGA CA', LAACA QUE GUIENE CA'. ¹¹ Yana ndi' nga ni rini' ejemplu di': biidxi ca' naaca ni xtiidxa Diuxhi. ¹² Ca ni biaaba lu neza nga' ca ni ma binadiaga , peru oraca' reeda binidxaba ne raxha diidxa di' de ndani ladxido'ca, para laaca que guni cre' ca ne que guila' ca. ¹³ Ne ca ni biaba lu guie', ora runadiaga ca diidxa, rica ca ni ne xtale guendanayeche'. Peru que gapa ca xcu' ca, laaca runi cre' ca ti tiempu si' ne ora gueeda guenda nagana rixhale ca'. ¹⁴ Ca biidxi biaaba lade guiichi que nga' ca binni ni runadiaga ca diidxa, peru laaca rinanda ca' neza xti' ca. laaca que rica'ca ratixhie' ca pur guira enda riu xhizaa', ne guira ni rizaca napa ca', ne ca guenda rusieche xti guidxilayu', ne xcuananaxhi ca que rigüi'. ¹⁵ Peru ca biidxhi ni biaba lu layu' sicaru que' nga' ca ni bica' diaga ca ne ti ladxido' naya' ne nacha'hui, ne rinaaze dxiichi ca ni' ne rudi' ca cuananaxhi gati ga'. ¹⁶ Yana, guiruti ni ma bicaagui ti biaani, ruchi' ni ne ti jarru de yu' o rugu' ni xhana luuna'. Laaga ruga'nda ni' ra randa biaani lugia' para guira ni chu' ganda guuya biaani. ¹⁷ Ti purti gaxti ni nagachi, siiana sin guihuini, ne gaxti ni naca secretu, que siiana sin guihuini ne seda re' lu biaani. ¹⁸ Nga runi la guca'diaga chaahui, ti purti tutiica ni gápa, sacáa jmá, ne ni que gaapa, dede ni sacaxa naapa, siaaxa." ¹⁹ Oraque ñá' be ne ca biichi be beeda ca ra nu be. peru que ñanda nidxiñaca guni xtale binni que'. ²⁰ Ne gudxi cabe labe:"ña' lu ne ca biichi lu zuhua ca fuera ca, ne napa gana gu'ya ca lii." ²¹ Peru Jesus bicaabi laacabe ne na': "ñáa' de ca biiche nga ca ni ruca diaga xtiidxa Diuxhi ne rúni ca ni'." ²² Yana ti dxii, laabe guyu' be Ndani ti barcu ne ca discipulu xti be, ne raabi be laaca:"chuu xti ladu niza di'." Oraque laacabe biaaxa cabe. ²³ Peru laga laacabe zee cabe lu nisa que', laabe gúsi be, ne Beeda ti bii yoxho lu niza que' ne xparcu cabe cadxa de niza ne laacabe nu' cabe nashoo. ²⁴ Oraque' ca discipulu xti Jesus beeda ca ra nu' be ne bicuáni ca laabe ne na' ca: " ¡Maistru, Maistru! ¡ma yaca gati nu'!" laabe bibaani be ne gudindeneba ca bii que ne ca niza duxhu que' ne laaca gulezadxi ca' ne guyu' ti guenda ratadxhii. ²⁵ Oraque' laabe rabi be laaca: " para' nu guenda runi cre' xti tu pue'? ne laaca bidxiibi ca, ne laga cadxibi ca laca cadxagaya ca ne canabadidxa liza ca: "tu'ndi ni runi mandar ca bii ne ca niza, ne laaca rusuuba ca diidxa di' pue?" ²⁶ Laacabe zee cabe lu niza que neza ca layu xti ca Gadarenu, ni nu' xti ladu niza xti Galilea. ²⁷ Ora Jesus biete ne bizua' yu', laabe bidxaaga be tobi hombre de ndani guiidxi que ni napa binidxaba. Ma raca xtale tiempu laabe que racu be lari, ne cadi nabeza be ndani lidxi be, laga nabezabe lade ba'. ²⁸ Ora biiya be Jesus; bicaabe riidxi ne biaba be ra lu' ne guni' be nadipa: "xhi napaneu naa Jesus, Xhiiñi Diuxhi ni nandxo'? ri naba lii cadi guchiiñalu naa." ²⁹ Ti purti Jesus biini mandar ca guenda ni nayudxu que' guire' ca nde ndani hombre que'. Ti purti ma xtale tiru ma guyu' ca laabe ne neca liibi be ne cadena ne zepu, ne cayapa cabe laabe, laabe ruchugu be ca cadena que' ne ca binidxaba que rine' ca laabe ca ra nabiidxhi ne gaxti nu'. ³⁰ Oraque' Jesus gunabadiidxa laabe: " tu lá'lu? ne laabe rabi be laa:"Legion" tu purti xtale binidxaba ma guyu' laabe. ³¹ Laaca canabaru ca laabe cadi guzendabe laaca gabia'. ³² Oraque', nu' caadxi bihui raque' cayo' ca lu dani' que. Ca binidxaba que canaba ca laabe gudii be chu' ca lu ca bihui que', ne laabe biddi lugar laaca. ³³ Ngue runi ca binidxaba que biree ca de hombre que ne guyu' ca ca bihui que , ne ca bihui que biete tii' ca dani' ndani niza ne gutixhie' ca. ³⁴ Ora ca ni cayapa ca bihui que biiya ca ni guca, bixhoñe lu' ca ne gudxhi ca ca binni guidxi ne ca binni de ca layu' que. ³⁵ Oraque bire' binni zi guuya ca xhi guca'. Ne ora laaca biiya ca Jesus ne bidxela ca' xha hombre ni bire' ca binidxaba que laa, suuba ra ñe' Jesus, nacu laari, ne ma nexhe dxi xpiani, laaca bidxibi ca'. ³⁶ Oraque ca ni bíiya ca ni guca, gudxi ca laacabe xhi modo hombre ni guyu' ca binidxaba laa que' bianda. ³⁷ Oraque guira ca binni de xquidxi ca Gadarenu gunaba cabe Jesus Che' de laade cabe, ti purti guyu ti raro'ba dxiibi laacabe. Ngue runi laabe gudxiiba be nadi barcu que', ti ma ganda guibigueta cabe. ³⁸ Xha hombre ni bire ca bibidxaba de laa, gunaba be Jesus gudii chi nanda be laa, peru jesus gudxi laabe che' be, ne na': ³⁹ "Bigueta ra liidxu ne guyui' de ca ni Diuxhi biini nee lii." Hombre que zee neza xti' zi gugua' riidxi de ni jesus biini pur laa. ⁴⁰ Yana ora Jesus bigueta, Xtale binni que' bichagalu' ca laabe, ti purti de guira ca cabeeza ca. ⁴¹ Yana tobi hombre lá' Jairu ni naaca tobi de ca xaique xti yu'du huiini, beeda ne bizuxhiibi xha ñé' Jesus ne gunaaba be laa che' ralidxi be. ⁴² Ti purti tobi lucha xhiiñi be de chii ne chupa iza , cayati. Laaga jesus zee neza, xtale binni que cuquiichi ca laabe. ⁴³ Ne raque' nu' ti guna' ni ma raca chii ne chupa iza nabe' riete rini, ne ma bisira' bidxichi xti lu ca medicu. Peru que ñanda nusianda nin tobi de laacabe laa. ⁴⁴ Laabe beeda be ra nu' Jesus ne gudaana be rua xhaba, ne oraque ca gulesadxii guenda riete rini que'. ⁴⁵ Jesus guni':"tu laa guda'na naa?", ora guiruti que nini', Pedru na´:" Maistru, xtale binni ri' lii, cuquiichi ca lii". ⁴⁶ Peru Jesus na':"gudaana tobi naa, naa nana de que guenda nandxo' bire de naa." ⁴⁷ Ora gunna que biiya que zanda guxhoñe lu sin guuya cabe laa, laabe beeda be cayacaditi be ne bixhiziibi be ra lu jesus. Laabe guni' be ra lu de guira binni que' xhi ñe' laabe gudaana be laa, ne biandabe oraqueca'. ⁴⁸ Oraque laabe rabi be laa:"Xhiiñe, guenda runi cre' xti lu bisianda lii, guyé ne guendaratadxii." ⁴⁹ Laaga cani' rube, beeda tobi de ndani lidxi xhaique xti yu'du huiini que' ne naa:" Ma guti xhiiñi lu, ma cadi guchiichu Maistru." ⁵⁰ Peru ora binadiaga jesus ndi', bicaabi be Jairu: "cadi guidxiibu, bini cre' si', ne laabe sianda be." ⁵¹ Ora laabe beeda be ra yo' que' que nina' be guiruti ñu' ne laabe, Pedru, Juan ne Jacobo(Santiagu) zii, ne bixhoze´dxapahuiiini que' ne ñaa'. ⁵² Yana guira' cayuuna, ne cayuuna nanaa' ca peru laabe rabi be laaca: "cadi guuna tu, cadi guti be, nisiaasi si be." ⁵³ Peru laaca bixiidxi ca laabe, ti purti nana ca ma guti be'. ⁵⁴ Peru laabe gucua' be ná' dxapahuiini que, ne bica' be riidxi ne naa be': "dxapahuiini, biaza". ⁵⁵ Ne guenda xtibe bigueta ra nu' be, ne oraqueca biaza be, ne bini mandar be gudii cabe ni go'. ⁵⁶ Ca bixhoze be cadxagaya ca', peru laabe bini mandar be laaca cadi guinii' ca ni guca'.