¹ Yanna, bizaaca ti dxi guendarizi'ladxi de que Jesus ziza lu ca layú de biní ne ca discipulu xti', zi gutopa ca' espiga zee, zixuuba cabeni lu nácabe ne ziyocabe zee que. ² Peru cadxi de ca fariseu gunica': "¿Xiñee cayunitu ni que zanda gaca' dxi guendarizi'ladxi?" ³ Jesus, bicabi laacabe, ne guni': "¿Laatu caru guundatu ni bi'ni David ora bindaana, laa ne ca hombre zine laa que? ⁴ Laabe biuube ndani lidxi Diuxi ne gucuaabe pan ni nexhe' lu mexa xti Diuxi ne gudobe chupa ndaa, ne laca bidiibe chupa ndaa ni ca hombre nuu ne laabe que ti ñoo ca', neca pe ca sacerdote si nga zanda gooca ni. ⁵ Gudi'di si ndi' laabe rabibe laaca: "Xiiñi hombre nga naca xpixuaana de dxi guendarizi'ladxi" ⁶ Bizaaca xti dxi laca dxi guendarizila'dxi laabe guyu'be ndani sinagoga ne bisiidibe ca binni nuu raque. Raque nuu tobi hombre nabidxi ladu derechu na'. ⁷ Ca escriba ne ca fariseu cayapaca' laabe gaxha ti guuya ca pa laabe susiandabe tuuxa dxi guendarizila'dxi, ti guidxelacabe xi gudxiibacabe donda iquebe. ⁸ Peru laabe nannabe xi cani' ique ca' ne laabe rabibe xha hombre nabidxi ti chu na que: "Biasa, ne bizuhuaa rarí galaa de guiradu." Ora que hombre que biasa ne bizuhuaa ra que. ⁹ Jesus rabi laacabe: "Naa canabadiidxa laatu ¿zanda lu dxi guendarizila'dxi, guninu ni neza o guninanu, ti ulanu ti guendanabani o para guxhianu laa? ¹⁰ Ora que laabe biyadxibe lade guiraca' ne rabibe hombre que: "Bisigaa na." Laabe bi'nibe ni, ne nabe que bianda. ¹¹ Peru dxi'ba xiana laacabe, ne cani' lisaa cabe xi zanda guni cabe Jesus. ¹² Bizaaca ca dxi que bireebe guyebe lu dani ti guiniinebe Diuxi. Ne gudi'dibe guidubi gueela cani'nebe Diuxi. ¹³ Ora bira gueela, bisendacaabe ca discipulu xtibe ne gulíbe chii ne chupa de laaca, ca ni gulee laabe ca apostol. ¹⁴ Ca aposto que laaca' Simón (ni laca gula'quibe Pedro) ne bi'chi, Andres, Jacobo (Santiago), Juan, Felipe, Bartolomé, ¹⁵ Mateo, Tomás, Jacobo (Santiago) xiiñi Alfeo, Simón, ni gule' lacabe Zelote, ¹⁶ Judas xiiñi Jacobo (Santiago) ne Judas Iscariote, ni beda gaca ni bidxii deche laabe. ¹⁷ Ra que Jesus biete nebe laaca de lu dani que ne bizuhuaabe ti ra nayá, ne xtale de ca discipulu xtibe, ne xtale binni de Judea ne Jerusalen ne de ruaa nisado' xti Tiro ne Sidón. ¹⁸ Laacabe beda gucaadiaga cabe laabe ne siguianda cabe de ni huará cabe. Binni caziñe binidxaba laa laca bianda ca'. ¹⁹ Guira xixe ca binni que nuuca canaca' laabe purti xtipa ni rusianda caree de laabe ne cusianda de guira xixe cabe. ²⁰ Ti ora que laabe biyadxibe ca discipulu be, ne guni'be: "Chona tiru nayeche' nacatu laatu ca ni nazii, purti xtitu nga reinu Diuxi. ²¹ Chona tiru nayeche laatu ca ni candaana nagasi, purti laatu zadxa ndaani tu. Chona tiru neyeche' laatu ca ni cayuuna, purti laatu zixidxitu. ²² Chona tiru nayeche' laatu ora binni gaca nanala'dxi laatu ne gucaanacabe laatu ne cu'dicabe laatu, guni xiiñi Diuxi. ²³ Laguieche' dxi que ne laguichesa de guendanayeche', ti laatu dxandipe' ziaxatu iba', purti ca ni zaatu de laaca zacaca bi'nica' ca profeta. ²⁴ Peru, ¡lagapa gási laatu ca ni napa xtale bidxichi! purti ma gupatu ni bisieche laatu. ²⁵ ¡Laguya gási laa ca ni nagasi dxa ndani ca'!, purti zandaanatu huidxe. ¡Lagapa gási laatu, ca ni ruxidxi yanna!, purti zaguiche ruaatu ne zuunatu huidxe. ²⁶ ¡Lagapa gási laa!, ora guira' binni guini' didxa neza de laatu, purti zacaca bi'ni ca ni zaatu de laa ca profeta cadi dxandi' ²⁷ Peru naa cayabe laatu, ca ni cucaa diaga, laganaxhii ca ni que racala'dxi laatu ne laguni ni neza ne cani nanala'dxi laatu. ²⁸ Lacuu ndaaya ca ni ruguu di laatu ne la guini'ne Diuxi pur ca ni riguiñe laatu. ²⁹ Ni capa cue' xhagalu', la gudiicala xtobi ca. Pa chu' tuuxa gaxha laatu ni rendatu, cadi nica gucueezu nin xha'bu'. ³⁰ Lagudii guira' ni ginaba cabe laatu. Pa chu' tu gaxha laatu xiixa xtitu, cadi guinabadiou' gudxugetabeni. ³¹ Casi laatu nuutu guni binni laatu, zaqueca laguni laacabe. ³² Pa laatu nadxiitu ca ni nadxii si laatu, ¿xi cuguutu luni? ti dede ne ca ni ruchee nadxiica ca ni nadxii laaca'. ³³ Pa laatu runitu ni jneza ne ca binni si ni runi jneza ne laatu ¿xi cuguutu luni? Ti ca ni ruchee ngueca si runi ca'. ³⁴ Pa laatu rutiiñe tu xiixa ca binni ni cabezatu zudxigueta laatu, ¿xi cuguutu luni? Népe ca ni ruchee rutiiñe ca' ne cabeza ca' guiaxa ca' bia'queca. ³⁵ Peru laganaxhii ca ni que racalaadxi laatu ne laguni ni jneza ne laacabe. La gutiiñe, ne cadi cueza ditu gudxiguetacabe laatu, ne ni guiaxatu ca zacani narooba, ne zacatu xiiñi Diuxi, purti laapebe nacha'uibe ne ca ni que rudii xquixe ne ca binni nadxaba. ³⁶ Lagapa xhilase ne binni, casi ca bixozetu rapa xhilase. ³⁷ Cadi gului' nátu ti que gului'na guiruti laatu. Cadi gudxiibatu donda ti que quiba donda iquetu. La gusiaanda ni bi'ni xtuudxi, ne ziaanda ni bi'ni tu. ³⁸ Lagudii, ne zacaatu. Xtale, dede gui'chi', biniibi ti guidxa chaaui dede caxii, de zadxe ñee zuudi. Pue bia'ca ruguu bia'tu, bia'caca ziuubia'tu. ³⁹ De ra que la, laabe laca gudxibe laaca ti ejemplu; "¿Zanda ti ni que ruuya guinaaze na' xtobi laca que ruuya ne gului'be laa neza? Pa gunibe ni, iropa cabe ñaba cabe ndaani ti barranca, ¿cadi dxandi la? ⁴⁰ Ti ni caziidi cadi nanna di jma que maixtru xti, peru ora ma biziidi chaaui ca', ma zaca ca' casi maixtru ca. ⁴¹ ¿Ne xiñee laatu ruyadxitu guixi huiini cá lu bi'chi tu, peru que ruuya tu yagañee ni cá bezalu petu? ⁴² ¿Ximodo zanda ga'bu bi'chu: "Biche', dane cuee guixhi huiini ni cá lulu ca," ora nin lii caru gu'yu yagañee nuu bezalu piou ca? ¡Laatu binni rini' xiixa ne runi adxe! Prime lacuee yagañee nuu lupe tu ca, ne ora que ma zuuyatu naya'ni ti cueetu guixhi ni nuu lu bi'chi tu. ⁴³ Pue gaxti yaga nacha'ui ni gudii cuananaxhi ma biu'dxu, ninca gaxti ti yaga ma biu'dxu gudii cuananaxhi nagüi. ⁴⁴ Purti, cada yaga runibia'cabe laa pur cuananaxhi rudii. Ti, binni que rutopa higo lade guiichi', ne que rutopa uvas lu le' ⁴⁵ Xa hombre nacha'ui, ni izaa risaca ladxido' runi ni jneza, ne hombre nadxaba, ni nadxaba ladxido' runi laca si puru guendanadxaba'. Purti de guira' ni dxa ladxido'be riree de ruaabe . ⁴⁶ ¿Xiñee rucaaridxi tu naa, "Señor, Señor", ne nin ne nga que runatu cani rabe laatu? ⁴⁷ Guira xixe gueeda ra nua' ne rucaa diaga xtiidxa ne runa cani la, na zabe laatu ximodo laabe. ⁴⁸ Laabe casi tobi hombre rucui ti yoo, ni gundaa nabe xhaguete yu ne bicui lidxi lu ti guie nadipa'. Ora bilaahua, ca corriente nisa que bidxelasaani luguia yoo que, peru que nica ñanda nuniibini laa, purti zuhuaa chaahui yoo que. ⁴⁹ Pero binni ni rucaadiaga ca xtiidxa ne que runa cani la, naca casi ti hombre ni bicui lidxi lu yu sin nindaa base para nibi lidxi. Ora beeda nisa que luguia yoo que, oraqueca bixiani, ne escombro si biaana de guidubi naca yoo que".