¹ Yanna ra zididi' Jesús biiya' ti badunguiiu nache'pa lú de dxi gule. ² Ca discípulo xtibe gudxica laabe sicari', maistru, ¿tu laa bichee para bedagalebe zaca pue, laabe la? o jñaabe ne bixhozebe ? ³ Bicabica Jesús laacabe sicari', nin laabe, nin jñaabe ne bixhozebe qui nucheedicabe, laabe gulebe zaca la? ti guihuinni ca xhiiña Diuxi luguiabe. ⁴ Laanu naquiiñe' guninu ca dxiiña' xti' ni biseenda naa laga nuuru xpiaani' dxi. Ma qui candaa saxhinni ne ma guiruti' zanda guni dxiiña'. ⁵ Laga nuaa' ndaani' guidxilayú la? naa nga biaani' xti' guidxilayú. ⁶ Ra biluxe guni' Jesús ca diidxaque la? bichaxhinnibe layú, bi'nibe beñe ne nisaxhinnique la? ne guxubibeni lú badunguiiu nache'pa luque. ⁷ Raque gudxibe laa, guyé yanna, yetibilú ra tanque lá Siloé. Raque ze badunguiiuque, gudibilúbe la? ne biguetabe ma ruuyabe. ⁸ Raque ca binni dxaaga lidxibe ne ca ni binibia'ba laabe ora nache'pa lubeque la?, guni'ca, ¿ñee cadi ndi ngue ni gurí canaba' gunaque la? ⁹ Guyuu tu laa guni', laabe ni, ne zaqueca tu guni', co', huaxa guiza' rului'be laa. Huaxa laabe gudxibe laaca, naa ndi'. ¹⁰ Para gudxicabe laabe, yanna, ¿xi modo ndi beedaguixale ca bizalulu'ca ya'? ¹¹ Bicabicabe laaca sicari', badunguiiu lá Jesúsque la? bi'ni beñe, guxubini ca bizalua' ne gudxi naa, guyé ra tanque Siloé ne gudibilu'. Ne guyaa', gudibelua' ne oraqueca bizulua' cayuuya'. ¹² Raque gudxicabe laabe, ¿paraa nuube ya'? para bicabibe laaca, qui gannadia' na'. ¹³ Laacabe yenecabe badunguiiuque ra nuu ca fariseu. ¹⁴ Yanna dxi bidii Jesús guendaruuya' badunguiiuque la? bedagacani lu dxi guendarizila'dxi'. ¹⁵ Raque ma ca fariseu gunabadiidxaca laabe xi modo gucuaabe guendaruuya' xtibeque. Para rabibe laaca, laabe guxubibe beñe lua', raque yetibelua' la? ne yanna ma ruuya'. ¹⁶ Oraqueca ná caadxi fariseu, nguiiudi' la? cadi xpinnidi Diuxi laabe, ti que rapadibe dxi guendarizila'dxi'. Ne xcaadxi ná, ¿xi modo zanda ti binni rucheene Diuxi guni guirá' ca guendanandxo'ca pue? ngue runi gulaasaacabe. ¹⁷ Raque gunabadiidxacabe badunguiiuque xti bieque, ¿yanna ma bisiandabe luluca, xi zanda guiniu' de laabe yanna? badunguiiuque guni', nacabe ti profeta. ¹⁸ Yanna ca judiu que cayunicreca pa dxandi' ngue gulebe nache'pa lube ne bisianda Jesús lubeque, de ra bisendacaaca bixhozebe ne jñaabe. ¹⁹ Ne gunabadiidxacabe laaca sicari', ¿ñee xiiñitu badunguiiu ni nacabe gule nache'pa luca la? ¿xiñee ndi ma randa guuyabe yanna? ²⁰ Para bicabi jñaabe ne bixhoxebe ca binnique sicari', laadu nannadu xiiñidu nga badunguiiuca ne gulebe nache'pa lube, ²¹ Xiñee ndi ma ruuyabe yanna la? qui gannadidu, tu laa bisianda ca lubeca la? laca qui gannadidu tu laabe. Laguinabadiidxa laabe, ma huaniisibe, ma zanda guini'be pur laabe. ²² Guni' bixhozebe ne jñaabe zaqué ti cadxibica ca judiu, ti maca guni' xtiidxa' ca Judiu zabeeca de ndaani' ca yuduhuiini' ni guini' Jesús nga naca Cristu. ²³ Ngue runi guni' jñaabe ne bixhozebe sicari', ma huaniisibe, laguinabadiidxa' laabe. ²⁴ Raqué bisendacaabe badunguiiuque xti bieque ne gudxicabe laa, bisisaca Diuxi na', laadu nannadu nguiiuca la? rucheenebe Diuxi. ²⁵ Para bicabi badunguiiuque laacabe sicari', naa qui gannadia' pa cucheenebe Diuxi , huaxa ni nannasia' nga, dxiqué nache'pa lua', yanna ma ruuya'. ²⁶ Raque gudxicabe laabe, ¿xi bi'nibe lii ya'? ¿xi modo ndi bisiandabe ca luluca ya'? ²⁷ Laabe bicabibe laaca, cadi ma gudxe ni laatu la? nin que lica nucaadiagatu naa, ¿xi ñee ndi cátu gunadiagatuni xti bieque pue? o laca racala'dxitu gacatu discípulo xtibe la? ²⁸ Oraque gudindenecabe laabe ne rabicabe laabe, lii nacalu' discípulo xtibe, huaxa laadu nacadu discípulo xti' Moisés. ²⁹ Laadu nannadu guni'ne Diuxi Moisés, huaxa laabe la? nin que gannadidu de padé zeedabe. ³⁰ Para bicabi badunguiiuque laacabe ne ná, nganga guendaridxagayaaca, laatu que gannatu padé zeedabe, ne neca zaca naa bisiandabe ca lua'. ³¹ Laanu nannanu qui rucaadiagadi Diuxi ca ni rucheene laa, huaxa pa tobi ridxibi laabe ne runi ni nabe la? laabe rucaadiagabe laa. ³² Dede dxi bizulu' guidxilayúdi la? nin que lica huayuudiaganu gusianda tuuxa lu ti ni gule nache'pa lu. ³³ Pa ñaca cadi diuxi biseenda' laabe la? gaxtidi' que lica ñanda ñunibe. ³⁴ Oraque bicabicabe laabe, lii gulelu' lu guendaruchee, ¿ne yanna racala'dxu' gusiidilu' laadu la? Raqué guladxicabe laabe de ndaani' yu'duque. ³⁵ Binadiaga Jesús guladxicabe laabe de ndaani' yu'du'que, ne ra bidxela laabe la?, ná rabi laabe sicari', ¿ñee runi crélu' xiiñi' Diuxi la? oraque nábe rabibe Jesús, ³⁶ ¿Tu laabe ya' xpixuaana', ti naa gunecré laabe? ³⁷ Para ná Jesús, ma biiyalu' laabe, ne laabe nga ni cani'ne lii nagasidi'. ³⁸ Guni'ca badunguiiuque sicari', runecré laabe, xpixuaana', ne bizulu' bisisaca laabe. ³⁹ Ne oraque ná Jesús, naa benda' guidxilayúdi para gune ni xneza, ti zaca ca ni que ruuya' la? ganda guuyaca', ne ca ni ruuya' la? guiche'pa luca'. ⁴⁰ Caadxi de ca fariseu ni nuu gaxha de laabeque la? binadiagaca' ca diidxa' guni'beque, ne gunabadiidxaca laabe, ¿laadu laca nache'pa ludu la? ⁴¹ Bicabica Jesús laacabe sicari', pa ñaca nache'pa lutu la? qui ñapaditu guendaruchee, huaxa laatu nátu, ruuyadu, ngue runi zaparutu guendaruchee.