¹ Pablu, Silvano ne Timoteu cucádu para yu'du' xti ca Tesalonicense lu Diuxi Bixozenu ne Xpixuánanu Jesucristu. Guendanacha'hui ne guendaratadxi ladxido' gáca' ne laatu. ² Laadu ira dxi rudi'du xquixe Diuxi pur de guira tú; cuze'tedu de laatu lu ra rininedu Diuxi. ³ Laadu rusietenala'dxidu laabe sin guidxagadu, neza lú Diuxi ne Bixozenú, ca ni cayúnitu lu guenda runi cre, ca dxiiña ne guendaranaxii ne que caree tu gana lú ni nana tu zacaa tu pur Xpixuánanu Jesucristu. ⁴ Hermanu ca' ni nadxiidu pur Diuxi, ⁵ runibia du ma ulídxibe laatu, casi ca Evangeliu ma beeda ra nuutu, cadi pur diidxa sí, sinu qué, biniibi ne xtipa lú Espíritu Santu ne nannadu zacá ní. Ne laca sacarí laatu runibiaa tu xi tipu binni gúcadu de dxi guyúdu ladetu pur guendaranaxii ni napadu pur laatu. ⁶ Laatu beda gaca tu ni runi casi ca runidu, ne de Xpixuánanu, laga cayunitu ndi' ucuaatu ca diidxa xti Diuxi ca dxi nagána xti tu, ne guendanayeche' xti Espiritu Santu. ⁷ Ne ndi bi'ni', que laatu bedagacatu ni biyadxí guiraxixe ca ni runi cre ni nuu Macedonia ne Acaya. ⁸ Purti ra laatu canaguiní tu, ca xtiidxa Xpixuánanu ma yenda bicaadiaga cabe ní, ne cadi ndaani si Macedonia ne Acaya, sinu que de guira ladu guendaruni cre xtitu lu Diuxi ma bireeche. Ne ndi bi'ni' que, laadu ma que naquiiñe guinídu xixa. ⁹ Purti laapecabe cayui' cabe, xi modo ucuaa tu ne binine tu laadu. Laacabe cayui' cabe xi modo laatu bichaatu de ca bido' a Diuxi, para gúnitu xhiiña Diuxi ni nabáni ne ni dxandi'. ¹⁰ Laacabe caní cabe deque laatu cabézatu xiiñibe ni dxíba' xaiba', ni Diuxi gundiza de lade ca ni ma gúti. Ndi nga Jesús, ni rulá laanu de xiaana ni nuu pur gueeda qué.