¹ Pedru, ti apostol xti Jesucristu, para ca binni nabani xti guidxi ni bireche ndase, ca ni ma bibii, de guidubi Ponto, Galacia, Capadocia, Asia ne Bitania. ² Pur guenda runibia Diuxhi bixhoze nu pur guenda ruzia xti Espiritu Santu, Pur guenda ruzuuba didxa xti Jesucristu ne pur ra bixhi rini xtibe. Guenda nachahui gaca luguia tu ne guenda rata dxi xtitu guiroba. ³ Diuxhi ne bixhoze xhaiquenu Jesucristu chú ndaya. Lu naroba guenda ria' xtibe, laabe bidii be laanu galenu xti tiru para ganadxichi nu de que saca ni chi gudi Diuxhi laanu pur ra bibaani Cristu lade gue'tu, ⁴ Ti purti ni chi gudi Diuxhi laanu, ni que rati, que saca mucu ne que saxhia. Cayaa'pa ni iba' para laatu. ⁵ Pur guenda nadipa xti Diuxhi laatu nu dxichi tu pur guenda runi cre' para guenda rilá ni ma nu chahui para guihuini lu ca dxi ra ira iluxhe. ⁶ Laatu laguieche lu ndi', neca nagasi naquiiñe laatu tiidi tu guenda nana lu xtale ra naxho'. ⁷ Ndi naca para giuhuini pa dxandi guenda runi cre' xti tu, guenda runi cre'ni jma risaca que guiba risaca, ni rati lu guí ni ruya pa dxandi guenda runi cre' xti. Ndi raca ti guenda runi cre' xtitu guidxela cabe laa casi ti ni beda gudii guenda rusisaca, guenda nandxo' ne guenda risaca ra gihuini jesucristu. ⁸ Laatu cáru guuya tu laabe, peru laatu nadxi tu laabe. Laatu cadi cayuya tu laabe nagasi, peru laatu runi cre' tu laabe, ne laatu nuutu nayeche ne ti guenda nayeche ni que sanda guienenu ne didxa ni dxá tipa de guenda nandxo'. ⁹ Laatu cacaatu ni beda gudii guenda runi cre' xtitu, guenda rila' xti xquenda tu. ¹⁰ ca profeta biyuubi ca ne gunabadidxa chahui ca de guenda rilá di', de guenda nachaui ni zaca xtitu. ¹¹ Laacabe biyuubi cabe para gana cabe xhi guenda rilá nga gueeda. Laacabe laaca biyuubi cabe ti gana cabe pora nga Espiritu xti Cristu ni nabani luguia cabe caníi ne laacabe. Ndi cazaaca laga laabe cuza niru be lú ca de ca guenda nana xti Cristu ne ca guenda nandxo' ni gueeda nanda. ¹² Bihuini be ra lú ca profeta ni cayuni ca dxiña lu ndi', cadi para laaca, laga para laatu, guenda rui' ca ndi pur ca ni redane ca xtidxa Diuxhi ra nuutu pur Espiritu ni bizeenda cabe de iba', ca ni dede ca angel pe' ñacaladxi ca ñana ca'. ¹³ Laguxhi ndani tu de guenda riene xtidu. Lacuaqui dxi xquendabiani tu. Laguni cre' dxichi lu guenda nachahui ni zeeda ra nuutu ra guihuini jesucristu. ¹⁴ Casi xcuidi ruzuuba didxa, cadi chu' dxi ne tu ca ni gucaladxi tu ni guzaa nandatu dxi que gana tu. ¹⁵ Jma ru pe', casi ca ni gulidxi laatu ca nandxo', laatu laaca lagaca nandxo' lu guira jmodo runi tu lu xquenda nabani tu. ¹⁶ Purti maca cá: "LAGACA NANDXO', TI PURTI NAA NACA NANDXO'". ¹⁷ Ne pa laatu rabi tu "Bixhozé" ni ridxela donda luguia de guira pur xhiiña guira binni, latiidi guidubi neza ca caguudetu ra luube. ¹⁸ Laatu nana tu de que cadi guca di' de guiba risaca de oro o plata, o xhixha ni rati, de que laatu bidxigueta Diuxhi laatu de lu ca guenda nahuati ni biziidi tu de ca bixhoze tu, ¹⁹ Peru rini sicaru xti Cristu, casi ti dendxu ni que gapa guenda ruche nin guenda namucu ²⁰ Cristu nga bibíi dede ante chá guidxilayu', peru yana ra ma siluxhe ca dxi di', laabe ma bihuini be ra lú tu. ²¹ Laatu runi cre' tu Diuxhi pur laabe, ni Diuxhi gundisa lade gue'tu ne ni bidii be guenda rusisaca para guenda runi cre', ne guenda rana dxichi gata ca ni lú Diuxhi. ²² Laatu biini tu xquenda tu naya pur guenda ruzuuba didxa lu ni dxandi para ni racaladxi guendaranaxhi bichi sin guenda rusiguí, nga runi laganaxhi lisa ne ti guenda ranaxhi de ladxido'. ²³ Laatu ma gule tu xti tiru, cadi de biidxi ni rati, laga de biidxi ni que rati, pur didxa ni nabani ne ni que rati xti Diuxhi. ²⁴ "TI PURTI GUIRA BINNI GUIDXILAYU NACA CASI GUIXHI. GUIXHI CA RATI NE GUIE' RIABA, ²⁵ PERU XTIDXA XHAIQUENU RIAANA DEDE GUIRA DXI". Ndi nga ca didxa ni bireche casi xtidxa Diuxhi para laatu.