¹ ¿Yu´unbal ma anaik, kermanotak (te bit´il yakon sk´oponel te ants-winik te snaobey sbaik te mantalile), te mantalil te ya xkomot yu´un te ants-winik te k´alal kuxule? ² Te ants nujp´ineme chukbil yu´un mantalil sok te smamlal teme kuxule, jauk te me laj te smamlale, libre ya xk´ot yu´un te smantalil nujp´inele. ³ Jich yu´un teme kuxul te smamlale, te me bajt´ nainel sok yan winike, jich ya xk´ot te bit´il mulawil antse. Jauk teme laj te smamlale, libre ya xjil yu´un te mantalile, jich yu´un maba mulawil ya xk´ot teme nujp´in sok yan winike. ⁴ Jich yu´un, kermanotak, te jaexe la awich ´ik milel yu´un te mantalil ta swenta te sbak´etal te Cristo. Ja yu´un jich ya stak´ yu´uninex te yane, ja´ me, te mach´a jajch´ixtel ta bay aelmeletik, jich te jo´otike yame sitinotik ta stojol te Diose. ⁵ Jauk te k´alal ayotik to ta jbak´etaltika-e ya smulan spas te mulile, jich bit´il la yal mantalile, la spas te kok k´abtik ta swenta te mantalile sitinaj ta lajel. ⁶ Jaukmeto kolotikix ta libre yu´un te mantalile. Te jo´otike lajix spisil te beluk chukojotike. Ja´ yu´un te ya xu ku´untik pasbel yach´il yat´el te Espiritu, ma jauk te spokol yayejul. ⁷ ¿Beluk me ya jkaltik te jo´otik jiche? ¿Te mantalile ja´bal mulil? Ma jauk stukel. Jaukmeto, ma´ la jnabey sba te mulil, te manchuk ay te mantalile. Melel ma´ jnabey sba te sbik´tal ot´anil te manchuk jich ya yal mantalile: ¨MA ME XBIK´TA AWOT´AN¨. ⁸ Jaukmeto te mulile, la stsak yip yu´un te mantalile sok la stijbon jach´el te beluk ya jmulane. Te manchuk ay te mantalile, te mulile lajemix. ⁹ Ay k´aal kuxulon te ma la jch´un te mantale, jaukmeto te k´alal tal te mantalile, te mulile cha kuxin jicha lajon te jo´one. ¹⁰ Te mantalil, te ya yich tel kuxinele, ja´la yak´on ta lajel. ¹¹ Te mulile, la yich yip yu´un te mantalile sok la slolayon. Ta swenta te mantalile, lajon. ¹² Jich yu´un te mantalile ch´ultesbil, sok te mantalil ch´ultesbile, toj sok mero lek. ¹³ ¿ Jich yu´un te beluk leke ja´bal tal yak´on ta lajel? ¡Ma jauk! Jaukmeto te mulile, ya xchikna ta ilel jich bit´il mulil te belukl leke, jich alajon. Ta swenta te mantalile, te mulile k´axel chikna ta ilel te ma lekuke. ¹⁴ Te jo´otike ya jnatik te mantalile ja te espiritue, jaukmeto te jo´one ch´ich´ bak´eton. Chonbilonix ta abatinel yu´un te mulile. ¹⁵ Te beluk ya jpase, ma xk´ot ta kojt´an. Te beluk ya jk´an jpase, ma jauk ya jpas, sok te beluk ya jkilaye, ja´ya jpas. ¹⁶ Jauk teme ja´ la jpas te beluk ma k´ane yakon ta xch´uunel te mantalilabi, melel te mantalile lek stukel. ¹⁷ Jaukmeto ma jaukonix te ya jpase, ja´te mulil te kuxul ta jtojole. ¹⁸ Jich ya jna´ te jo´one, ja´te jbak´etale, te ma´ lekuk te xkuxinele. Ja´ya jk´an jpas te beluk leke, jaukmeto ma xju´ jku´un spasel. ¹⁹ Ja´ te beluk lek ya jk´ane ma jauk ya jpas, ²⁰ Jaukmeto te beluk ma lekuke sok te ma jk´an jpase, ja´ya jpas. Jich yu´un te me ja´ya jpas te beluk ma k´ane, yu´un ma jo´okon te beluk yakon ta spaselabi, ja´te mulil ay ta jtojole. ²¹ Ya jna´ te ya sk´an kot´an te ya jpas te beluk leke, jaukmeto te beluk ma lekuke ay to ta jtojol ²² Jich ya yaibey yuts´il te smantal Dios te winik ay ta yutil jkot´ane. ²³ Jaukmeto ya jkil te yan beluk ya spas te jbak´etale. Ja ya stsak sba sok te yach´il snop´ijibal ku´une. Ja´ le ya xchujkona-a te mulil te ay stojol te jbak´etale. ²⁴ ¡ jo´on te winik mayuk jtu´ulale! ¿Mach´a me ya skolteybon lok´el te jbak´etal ta bay lajele? ²⁵ Jaukmeto wokol la yal te Dios ta swenta te Jesucristo te Kajwaltik. Jich te jo´one ya ch´uun te mantal yu´un Dios sok spisil jol. Yan, te jbak´etale ja ya spas te mulile.