¹ jich yu´un, ¿beluk me lok´em yu´una te mach´a Judio-e? ¿sok beluk me lek yak´oj te circunsicione? ² Ay bi muk´ k´oem lok´el-a. Ta sne-elale ta spisil, ja la yich´ik ak´bel te bila la yak´ na-el stojol te Diose. ³ ¿Sok te ay Judio mayuk xch´unjel yot´anik? ¿Te bit´il ma la snaik k´inale lajba sk´oplal te beluk yaloj te Diose? ⁴ Mayuk bi ora te jich ya xk´ote, te Diose ya sk´otes ta pasel te bila yaloje, machuk me pas lot te winike. Jich bit´il ts´ibubil jilel: "TE JA'EXE TOJ YA AWICH´IK ILEL TA SWENTA TE SK´OPE, SOK JICH YA XJU AWU´UNIK, K´ALAL YA AWICH´IK CHAJP´ANEL". ⁵ Ja´ukmeto te bek ma tojok ya jpastik le ya xchiknaj ilela te bek toj ya spas te Diose, ¿bek ya stak jkaltik te jo´otike? te Diose ma lek te bek ya spas te k´alal ya yak´ wokolil, ¿Ja ba jich? ( Jo´on me yakon sjok´iyel jich bit´il ch´ich bak´et). ⁶ ¡Manchuk me jichuk ya xk´ot! Jich yu´un jiche, ¿bit´il te Dios ya slikbey smul te balumilale? ⁷ Ja´ukmeto te ja te smelelil yu´un Dios ya yich´ bayal ich´el ta muk´ ta swenta te lotile, ¿Bistu´uk ya to jkich´tik likbel jmultik jich bit´il tul mulawil? ⁸ ¿Bistu´uk ma jkaltik, jich bit´il te jo´otik yakotik sleel jmultik ta swenta te bek ya jkaltik, sok te k´axel yakik ta yalel te jich la jkaltik ta sk´opike: "Ak´botik jpastik te bek ma lekuke, ¿jich me ya xtal te bek leke?" Spisilik te mach´atik jich ya spase stojilme te k´alal ya yich´ik ich´el ta k´ope. ⁹ ¿Bit´il ay jiche? ¿Ja nax ba ya xju jkoteybatik ta jtukeltik? Ma jichuk. Melel te jo´otike la jkaltikix te pajal ay smulik te Judioetike sok te Griegoetike, ¹⁰ jich bit´il ts´ibubil: "MAYUK TULUK TE MACH´A TOJE". ¹¹ MAYUK MACH´A TE YA XK´OT TA YOT´ANE. MAYUK MACH´A TE YA SLE TE DIOSE. ¹² TA SPISILIK JOWEJEMIK. JAIK TA SPISILIK MAYUK STULALIK. MAYUK MACH´A TE YA SPAS TE BEK LEKE, MAYUK, MAYUKNIX TULUKA. ¹³ TE SK´OPIKE JICH TE BIT´IL MUKENAL TE JAMATIKE. TE YAK´IKE YAK TA LOLEWANEJ. JICH BIT´IL TE SBENENO TE CHAN TE AY TA STI-IK´. ¹⁴ TE YE´IKE NOJEL YU´UN TE BOLK´OPTEWANEJ SOK TE MAYUK YUTSILAL TE SK´OPIKE. ¹⁵ JA ORA NAX YA SNUTSIK TE YA SMALIK CH´ICHE. ¹⁶ JINEL SOK WOKOLIL AY TA BA SBE´IK. ¹⁷ JA TE ANTS-WINIK TO MA SNABEY SBAIK TE SBELAL TE LAMAL K´INALE. ¹⁸ MA XYICH´IK TA MUK TE DIOSE ¹⁹ Ta ora ya jnatik te chikan bek ya yal te mantalile, te ja ya yalbey te mach´atik wentenbilik yu´un te mantalile. Ja swentail te aka me smakik yeik´, sok spisil te ants-winike sna´ojikix te beluk ya xkot ta swentaik ta stojol Dios. ²⁰ Swenta yu´un ni tuluk ch´ich bak´et te ya xju yich albel lek sk´oplal ta swenta te mantalile te k´alal ya xk´ot ta stojol . Melel ta swenta te mantalil ya xtal jnabesbatik te mulile. ²¹ Jich yu´un ta ora to lok´emotik ta swenta te mantalile, te bek stojil yu´un te Dios la yich´ix na´el stojol. Ja me testigo te mantalile sok te alwanejetike, ²² ja te bek toje ja swenta te xch´unjel ot´anil ta Jesucristo ta spisilik te mach´atik ya xch´uune. Melel mayuk macha nax tsabil. ²³ Melel ta spisilik la sta smulik jich ma staik te yuts´ilal te Diose. ²⁴ Ja´ukmeto spisilik la yich´ikix kolteyel ta swenta yutsil yot´an te Cristo Jesus te la skolteyotikixe. ²⁵ Jich te Diose la yak´botikix te Cristo Jesuse te ja majt´anil k´ot te xch´ichele jich ya jtatik xch´unjel kot´antik ta swenta-a. K´alal la yak´ ta k´abal te Cristo le la yak ilel te bek stojile, jich ma la yich´ix ta wenta te namey muliletike ta skaj te ay smalib yu´une. ²⁶ Spisil to k´ot ta pasel yu´un le yich´ ilel te bek stojil ta ora to. Ta swenta te ya yak´sba ilel te stalel toj stukele, sok ya yak´ ilel te Ja ya skoltey spisilik te mach´atik ay xch´unjel yot´anik ta stojol Jesus. ²⁷ ¿Jich´ yu´un jiche ay bal stulal te ya toybatike? Mayuk stulal ya xk´ot. ¿Bi stu´uk te jich ya jkale? ¿janax ba ta swenta at´elil? Ma jichuk, ja ta swenta te ay yiptijib te xch´unjel ot´anile. ²⁸ Te slajibal kayejtike ja, te tul ants-winik ya yich koltayel ta swenta xch´unjel yot´an, ma ja´uk ta swenta yat´el te mantalile. ²⁹ ¿Te Diose janaxbal Dios yu´un te Judio-etike? ¿Ma ba ja´uk Diosiku-uk te Yan lume? Ja nax Dios yu´unik te Yan lumetike. ³⁰ Jich te Diose janax tul stukel, ja ya skoltey te mach´atik yich´ojik circuncision ta swenta te xch´unjel yot´anike, sok te mach´atik ma yich´ojik te circuncisione ta swenta xch´unjel yot´aniku-uk. ³¹ Jich yu´un ¿ya ba lajimbeytik skóplal te mantalil ta swenta te xch´unjel ot´anile? ¡Ma jichuk! Te jo'otike ja ne-el yakotik ta xch´unel te mantalile.