¹ Patil la jkil chantul (4) ch'ul abat te tek'atik ta xchanxujk'ul te balumilale, te ja skomojik te chanchajb (4) ik' te ya xbeenik ta balumilale, swenta yu'un ma xbeenik ta bay sba te lum k'inale, ta mar, sok jich ma stij sba pejt'uk te te'etike. ² La jkil yan tul ch'ul abat te mo-talel ta bay slok'ib k'aal , te ja yich'oj ta sk'ab te sello yu'un te kuxul Dios. Tulan la yawtey te chantul ch'ul abatetik te ja ak'bilik sjinel te lum k'inal sok te mar. ³ ''Ma to xa jinik te lum k'inale, te mar, sok te te'etik ja to k'alal te jkak'betik sello ta sti'baik te abatetik yu'un te Dios jku'untike.'' ⁴ La jkaiy stojol te jayeb ta tul ta spisil te mach'atik la yich'ik te selloe: ay waxuklajunwinik ta bajk' (144,000 mil), te mach'atik la yich'ik te sello ta spisil ta chajb te israeletike: ⁵ Ay lajuneb xcha'winik ta bajk' (12,000 mil) ta tul te sts'umbal te Judá te la yich'ik sello, ay lajuneb xcha'winik ta bajk' (12,000 mil) ta tul te sts'umbal te Rubén, ay lajuneb xcha'winik ta bajk' (12,000) te tul te sts'umbal Gad. ⁶ Ay lajuneb xcha'winik ta bajk' (12,000 mil) ta tul te sts'umbal Aser, ay lajuneb xcha'winik ta bajk' (12,000 mil) ta tul te sts'umbal Neftalí, ay lajuneb xcha'winik ta bajk' (12,000 mil) ta tul te sts'umbal Manasés. ⁹ Ta patil ay bi yan la jkil, ja la jkil te ay bayal stsoboj sbaik ants-winiketik te mayuk mach'a ya stak' yajtey, te talemik ta yanyantik lumetik, ts'umbaliletik, ta ch'in lumetik, ta bay yanyantik sk'opik, te le' tek'atik ta bay stojol te muk' naktijibal sok ta stojol te alalchij. Te slapojikix sak sk'u'-spak'ik sok stuchojik ch'ib ta sk'abik, ¹⁰ jich tulan yakalik ta k'op: ''¡ Ay jkoleltik ta swenta te Dios jku'untik te le' nakal ta smuk'ul naktijib, sok ta swenta te alachije!'' ¹¹ Spisil te ch'ul abatetik tek'atik ta sjuyubal te muk'ul naktijibale sok ta sjuyubal te chane'scha'winik (24) ta tul te mamaletike sok te chankojt' te bintik kuxatike jich la spajk'an sbaik ta lum ta stojol te muk'ul naktijibale. La slajin sbaik ta stojol te Dios, ¹² jich la yalik: ''¡Jichuk! ¡te Dios jku'untik ja yu'un spisil te k'ayojetik, utsilal, p'ijil-ot'anil, albeyel wokol, ich'el ta muk', yu'el, sok yip sbajt'el k'inal! ¡Jichuk!'' ¹³ Jich yu'un ay tul te mamaletik te la sjojk'ibone: ''¿Mach'atik a in to, te slapojik sakil sk'uike , sok banti te talemike? ¹⁴ La jkalbey te mamale: ''Mamtik, ja'at nax ya ana'' Jich la yalbon: ''Jaik te mach'atik k'axemix yu'unik te tulan woklajele. Ja sak'ojikix te sk'u' spak'ik sok la saktesikix ta swenta te xch'ich'el te alalchije. ¹⁵ Ja swenta yu'un, te tek'atik ta stojol te muk'ul naktijibal yu'un te Dios, jich k'aal-ajk'ubal ayik ta abatinel ta bay te stemploe. Te mach'a nakal ta bay te muk'ul naktijibal ya me yich'ik kananteyel yu'un. ¹⁶ Ma ba ya xk'axix swokolik ta winal sok ma ba ya yaiyikix takinti'il. Sok ma ba ya yaiyikix sk'uxul te k'aale, sok ma ba ya xwoklajikix yu'un te sk'ixnale. ¹⁷ Melel te alalchije ay ta bay yolilal te muk'ul naktijibale ya me xkanantayotik yu'un, jich ya me x-ik'otik bael ta bay te slok'ib ja' swenta yu'un kuxlejal, sok ya me xkusbotik te yalel sitik yu'un te Diose.''