¹ Ta patil la jkil jun yach'il ch'ulchan son jun yach'il balumilal, melel te sbabial ch'ulchan sok te sbabial balumilal jilikix, sok te muk'ul ja'e lajix sk'oplal. ² La jkil te muk'ul ch'ul lum, ja' te yach'il Jerusalén, yak tel ta koel ta ch'ulchan, ja te ch'ulchan yu'un te Diose, buen chapal jich bit'il tul ach'ix te ya xnujp'in te buen ya xchajp'ansba yu'un te smamlale. ³ Laj jkay stojol jun tulan k'op te lok'tel ta bay te muk'ul naktijibale jich la yal: " Ilawilik ! te sna te Diose ay ta yolil te ants-winik sok ya xkuxin sok. Ja' me slum ya xk'ot sok ya me yich'ik joinel yu'un te Diose sok ja me Dios ya x-k'ot yu'unik. ⁴ Ja' nix me ya yich'ik kusbel yu'un te yalel sitike sok mayukix lajel le'a, mayukix ok'el le'a, sok mayukix mel ot'an, mayukix wocolil le'a. Melel spisil te spokol kuxinel lajix sk'oplal. ⁵ Te mach'a nakal ta muk'ul naktijibal jich la yal: " Ilawilik ! La jpasix ta yach'il spisil te bitik aye." Sok jich la yalbon: " Ts'ibuya ta jun spisil in to melel smelelil k'op te ya xch'uun awot'ane." ⁶ Sok jich la yalbon xan: " Juix jku'un ! jo'on te mach'a ay ta sneelal to sok te kuxul ta sbajt'el k'inal, te mach'a ay ta xjajch'ibal sok mach'a ay ta slajibal. Spisil te mach'a ay ta takin ti'il, Jo'on ya me jka'bey yuch'ik lekil ja' te mayuk stojole sok te ya yak' kuxinele. ⁷ Spisil te mach'a ya yay tsalawej ya me yich' ak'beyel yu'unin spisil in to sok Jo'on me Dios ya xk'oon yu'unik sok ja me jnich'an ya xk'ot. ⁸ Yan te mach'atik xiwelike, te mach'atik mayuk lek xch'uunjel yot'anike, te mach'a ilabil sba te bek ya spasike, te milwaletik, te mulwejetik, ak' chameletik, sok te mach'atik ya xchu'unik lok'ombaetik sok spisil te pas lotetik, ta spisilik in to, ya me xbajt'ik ch'ojel ta bay pamal k'ajk' te yich'oj azufree. Ja' me te xchebalan lajele. ⁹ Ay tal ta jtojol Tul ta sjuk tulul ch'ul abatetik, ja te mach'a yich'oj te jukeb kopaetik te nojelik yu'un te juk chajb wokoliletik ta slajibal k'aal sok jich la yal: " Laik le' in to. jo'on ya jkabeyex awilik te ach'ix te ya xnujp'ine, ja' te ya xnujp'in sok te alal chije." ¹⁰ Te Espiritue la yik'on bael ta bay jun muk'ul najt'il wits sok la yak'bon jkil te Ch'ul lume, Jerusalén, te yak tel ta koel ta bay ch'ulchan yu'un te Diose. ¹¹ Te lum Jerusalén yich'ojbey te yutsilal te Dios sok te xojobil jich k'oem te bit'il jun ch'en te k'ax t'ujbilnaxe, jich bit'il te jun ch'en te jaspe sbi'il te ya xk'ax jsitik ta yilel k'inal jich te bit'il te cristale. ¹² Juytabil ta najt'il ts'ajk' sok te ay lajchayeb ta kum muk'ukal ti'nailetik, ta jujun ti'nail ay tul ch'ul abat le'a. Ta bay jujun ti'nail ts'ibubil te sbiilik te lajchay chajb' sts'umbal Israel. ¹³ Ay oxeb muk'ukal ti'nail ta slok'ib k'aal, sok nix ay oxeb ta Norte, sok oxeb ta bay sur sok oxeb ta stojol smalib k'aal. ¹⁴ Ta bay ts'ajk' yu'un te muk'ul lume ay lajchayeb yuyal te pasbil ta muk'ukal ton, te le' ts'ibubil a te sbiilik te lajchay tul puk k'opetik yu'un te alal chije. ¹⁵ Te mach'a la sk'oponone ay stsakoj jun jawubil te' te pasbil ta oro yu'un ya yich' bisel a te muk'ul lume, sok te muk'ukal ti'naile, sok te tsajk'etike. ¹⁶ Te muk'ul lume la yich' najk'anel koel; te snajt'ile pajal sok te sjamalule. La sp'is te muk'ul lume sok te jawubil te' te pasbil ta oroe, lok' jo' bajk' sok lajunwinik (2200) kilometro ta p'isel yu'un (te sjamalule sok te snajt'lejale pajal snajt'ilik). ¹⁷ Janix jich la sp'is spisil te sts'ajk' yu'un te lume,wakeb xchanwinik (66) metros. Te jich sp'isil yu'un te ants-winik te pajal nix sok te sp'isil yu'un te ch'ul abatetike). ¹⁸ Te tsajk' pasbil ta jaspe sok te muk'ul lum pasbil ta oro te mayuk skap, te pajal sok te espejoe. ¹⁹ Te yuyal te ts'ajk'etike ch'albil ta cha'oxchajp' ch'enetik te chajp'ix yutsilal a. Te sne'elale ch'albil ta jaspe, te xchebal ja' safiro, te yoxebale ja' ágata, te xchanebale ja' esmeralda, ²⁰ te sjoebalan ja' ónice, te swakebale ja' sardio, te sjukebalan ja' crisólito, te xwaxukebalan ja' berilio, te sbalunebal ja' topacio, te slajunebal ja' crisopraso, te xbuluchebal ja' jacinto, te slajcheyebal ja' amatista. ²¹ Te slajcheyeb muk'ukal ti'nailetik ja' lajcheyeb ch'enetik te chajp'ix st'ujbilal a, ta jujun ti'nail pajal te ch'en te yich'ojik ta pasel. Te calleetik pasbilik ta oro te mayuk skape, jich bit'il te ya xk'ax jsitik ta yilel k'inal a. ²² Te jo'one mayuk la jkil Templo le' ta bay te muk'ul lume, melel te Jkajwaltik Dios te spisil ya xju' yu'une, sok te alal chije jaix templo yu'unik . ²³ Te muk'ul lume ma xtu'unix yu'un te xojobil k'aale sok te xojobil te u melel te yutsilal te Diose ja ya xojop' tes, sok te alal chije ja' sk'ajk'ik. ²⁴ Te lumetik ya me x-ainik ta sakil k'inal yu'un. Te muk'ukal ajwaliletik yu'un te balumilale ya me yich'ik tel yutsil sk'ulejalik ta stojol. ²⁵ Te muk'ukal ti' nailetik ma ba yich'ik makel ta k'aleltik sok mayukix ajk'ubal le'a. ²⁶ Sok spisil ta chajp' lumetik ya me yich'ik tel te yutsilalik sok te yak'ik ta ich'el ta muk' a te muk'ul lume, ²⁷ sok mas tak' ya x-och te beeluk ma' lekuk ta pasel sok ma stak' ya x-och te beeluk ilebil sbae sok te mach'atik ya spasik lot ma' xju' ya och le'a. janax te mach'a ts'ibubil sbi'ilik ta bay libro yu'un te kuxinel te yich'oj te alal chije.