¹ Ja' in to, ja' te bila ya yak' ta na'el te Jesucristo te ja' ak'bot yu'un te Dios yu'un te ya yak'bey sna' stojol te abatetik yu'une te bila nopol ya xk'ot ta pasel. Ja la yak' ta na'es tojol ta swenta te xch'ul abat te la stikun tel ta stojol te yabat Juan. ² Te Juan la yalbey sk'oplal spisil te bila la yil ta swenta te sk'op te Dios sok te sk'oplal te Jesus. ³ Binaxme yutsil te mach'a ya sk'opon ta tulan k'op, sok te mach'a ya yay stojol te kopetik in to sok te mach'a ya xch'uunik spasel te bina ts'ibubil le'a, melel nopol ayix te sk'alelal. ⁴ Juan, te juk kum ch'unjeletik ta Asia : Te ja'exe ich'aik te yutsil ot'anil sok lamal k'inal yu'un te mach'a stalel aye, sok te mach'a ay ta sbajt'el k'inal, sok te mach'a nopol ya xtale, sok te jukeb ch'ulelaletik te ay ta stojol te muk'ul snaktijib, ⁵ sok te Jesucristo, ja te testigo te jun yot'an, te ja' snelal te chakuxtel yu'un te mach'atik lajeme, sok te ajwaliletik yu'un te muk'ul ajwaliletik ta bay balumilal. Ja te mach'a k'uxotik ta yot'an sok te la skoltayotik lok'el ta bay jmultik ta swenta xch'ul xch'ich'el, ⁶ Ja la xchajp'anbotik jun awilal, ja la spasotikixa sacerdote'il ta stojol te Dios sok te state - jelawenuk me yutsil sok ayuk me tulan yat'el ta ora to sok ta sbajt'el k'inal. Jichuk. ⁷ Ilawilik, ja me ya xtal ta bay tokaletik; spisil ants-winiketik ya me yilik, sok nixuk te mach'atik la slowike. spisil chajb tsumbalil ta balumilal ya me yok'tey sba'ik yu'un. jich, jichuk. ⁸ "Jo'on te mach'a stalel aye sok te kuxul ta sbajt'el k'inal," jich la yal te kajwaltik Diose , "te mach'a ay ta xjajch'ebal sok te mach'a ay ta slajibal sok te mach'a kechel ya xtal , te mach'a spisil ya xu yu'une." ⁹ Jo'on , Juan - te awermano'on sok te pajal ay ta jwentatik woklajele sok te pajal ya jointik ta ajwalil te Cristoe sok te jun kot'antik yakotik ta smaleyel ta swenta te Jesus - le ayon tabay ch'in k'inal te ay ta yolil muk'ul ja' te Patmos sbi'ile ta swenta te sk'op Dios sok te sk'plal te Jesus. ¹⁰ Te bit'il ayon ta wentainel yu'un te ch'ul espiritue ja k'ot ta pasel te bi k'a'alil yu'una te kajwaltike. La jkay stojol te ay mach'a tulan k'opoj ta jpat jich bit'il jun ok'es. ¹¹ La yal : Tsibuya ta bay jun te bek ya awile, sok tikumbeya bael te juk kum ch'unjeletike - ta Efeso, ta Esmira , ta Pergamo , ta Tiatira, ta Sardis, ta Filadelfia, y Laodicea" ¹² La jsutbabel jkil te macha yak ta 'oponbelone, sok te k'alal la jsutbabele la jkil jukeb stuch tijibal k'ajk te pasbil ta oro. ¹³ Ta yolil te stuch-tijibal k'ajk'e ay ch'a la jkil te jich yilel te bit'il snich'an winike, k'alal to ta yakan k'oem te palal pak' slapoje, sok jun xchujk'il chujt' te pasbil ta oro te bech'bil k'axel ta stan. ¹⁴ Te sjol sok te stsotsil sjole sak nax jich bi'til te tunim chije - mero sak jich bint'il te tu'ibe, sok te site jich bit'il te yat k'ajke. ¹⁵ Te yakane jich bit'il te bronce te xlem naxe, jich bit'il te lekubtesbilix ta k'ajk'e, sok te sk'ope jich bit'il te yip yok ja'etike. ¹⁶ Ja yich'oj ta swa'el sk'ap jukeb ek'etik, sok lok'tel ta yej jun espada te xcha mejch'el yej juxbile. Te sit yelawe xlemet nax xojobil jich' bit'il k'a-al te bayal yip ya xtile. ¹⁷ Te k'alal la jkile, ch'ayon koel ta yakan, jich bit'il jun winik te lajeme. La skajan te swa'el sk'ab ta jtojol sok la yal: "Ma xiwat. Jo'on ayon ta xjajch'ibal sok jo'on nix te slajibal, ¹⁸ sok te mach'a kuxul . Te jo'one lajemon a , ja'uk me to ilawil, ¡Jo'on te kuxulon ta sbajt'el k'inal! sok jo'on jkich'oj te sjamjibal te lajele sok te yawil ailmeletike. ¹⁹ Ja'uk me to, ts'ibuya te beluk la awile, ja te beluk ay ta ora to, sok te bek ya xk'ot ta pasel ta patile. ²⁰ Jich yu'un, te bila muken ay sk'oplal yu'un te jukeb ek'etike te la wil te ay ta swa'el jk'abe, sok te jukeb tuch tijibal k'ajk te pasbil ta oroe ja': Te jukeb ek'etike ja me te ch'ul abatetik yu'un te juk chajp' ch'unjeletike, sok te jukeb tuch tijibal k'ajk' ja me te juk chajp' ch'uunjeletike."