¹ Te k´alal bejk´a te Jesús ta lum Belén te ay ta sk´inal Judea k´alal ay ta ajwalila te Herodese, te p´ijil winiketik te talik ta slok´ib k´a-ale julik ta bay lum Jerusalen jich la yalik: ² ¨¿Banti ay te muk´ ajwalil yu´un te Judioetik te bejk´ajemixe? la kiltik te ek´ ta slok´ib k´a-ale jich yu´un tal kijchtik ta muk´u-uk¨ ³ Te k´alal la yaiy stojol te muk´ ajwalil Herodes nik´ yot´an yu´un sok ta spamal lum Jerusalén. ⁴ Te Herodese la stsob ta spisil te wolwanej sacerdote-etik sok te ts´ibjometik yu´un te lume, jich la sjok´iy:¨¿ Banti ya xbejk´a te Cristoe?¨ ⁵ Jich la yalik: ¨Ta lum Belén ta sk´inal Judea, yu´un jich ts´ibubil jilel yu´un te alwaneje: ⁶ TE JA´AT LUM BELEN, TE AYAT TA SK´INAL JUDA, MABA CH´IN TSAELAT TA STOJOL TE MACH´ATIK WOLWANEJ TA LUM JUDA, MELEL LE´ YA XTALA TE JTUL AJWALIL TE YA SWENTAINBON TE ANTS-WINIK TA BAY LUM ISRAELE¨ ⁷ Jich yu´un ts´i-in te Herodese muken la yik´tel te p´ijil winiketike yu´un ya sjojk´ibeyik yaiy ta lek te bi ora xchiknaj te ek´e. ⁸ Jich la stikun bael ta lum Belén la sjak´bey bael:¨Ba-anik sok le-aik ta lek te alale. Te k´alal ya-a taike yame xtal awalbonik, yu´un yame xba kich´ ta muk´u-uk.¨ ⁹ Te k´alal la yaiy beyik stojol sk´op te ajwalile jich bajt´ik in ts´i-in te ek´ te yilojik ta slok´ib k´a-ale ne-elaj be-el yu´unik le´ k´ot ta komela te banti ay te alale. ¹⁰ Te k´alal la yilik te ek´e, bayal bujts´naj yot´anik yu´un. ¹¹ Jich bajtik´ ta naj sok le´ la yilika-a te alale sok te sme-e ja te Mariae. La stinan sbaik koel sok la yichik ta muk´; jich la sjamik te yawil sbilukike jich la yak´beyik smajt´anin te k´anal tak´ine, te pome sok te bina xuk´et nax sbujts´ej. ¹² Te Diose la yak´ na-el ta xwaechejel te manchuk le´ ya sujt´ikixbe-ela te banti ay te Herodese; jich yu´un te k´alal sujtik´ bael ta slumalik yan bej la st´unik bael. ¹³ Te k´ala bajt´ikixa-e, chiknaj jtul ch´ul abat yu´un te kajwaltike ta stojol te Joseje sok jich albot ta xwaech ¨jach´an ik´a bael te alale sok te sme-e anan bael ta Egipto. Le´me ya x-ainata ja´ to teme ya jkalbate, yu´un te ajwalil Herodese ya xtal sle smil te alale.¨ ¹⁴ Ja´a te ajk´ubalabi jach te Joseje jich la yik´bael te alale sok te sme-e, sok bajtik´ ta lum Egipto. ¹⁵ Le´a a-inika-a ja´to te k´alal laj te Herodese. Into k´ot ta pasel te bina yaloj te Diose ta swenta te alwanej yu´une, TA LUM EGIPTO LA JKIK´ LOK´ELTEL TE JNICH´ANE.¨ ¹⁶ Jaukmeto te Herodese la sna stojol te la yich lolayel yu´un te p´ijil winiketik k´axem to xan ilin yu´un. La yal mantal te ya xba yich milel te alal keremetik te mach´atik che jawil yawilik sok te me ay tsailik xanabi, te ayik ta spamal lum Belén sok ta sjoylejal, ja´ la sna te bi ora ya xchikna te ek´te la yilik te p´ijil winiketike. ¹⁷ Jich k´ot ta pasel spisil te beluk yaloj ta stojol te alwane Jeremias: ¹⁸ ¨AY CHIKNA K´OP TA LUM RAMA, YAK TA OK´EL SOK YAK TA AJK´AN, JA´ TE RAQUEL TE YAK TA OK´EL YU´UN TE YA-ALTAKE JAUK METO MAYUK MACH´A MUK´TESBOT K´INAL YAIY YU´UN MELEL MAYUK MACH´A LE´AYIXA-A.¨ ¹⁹ Te k´alal laj te Herodese ay jtul ch´ul abat yu´un te kajwaltike te tal ta xwaech te Joseje ta banti Egipto sok jich albot: ²⁰ ¨Jach´an ik´a bael te alale sok te sme-e, baan ta sk´inal Israel yu´un te mach´a yak ta sle-el te alale lajemikix.¨ ²¹ Jich jach´ te Joseje la yik´tel te alale sok te sme-e jich talik ta sk´inal Israel. ²² Te k´alal la yaiy stojol te ja´ ochemix ta ajwalila te Arquelao ta Judea, te ja´ la sjelolin te stat te Herodese, xiw yot´an yu´un te le ya xbat´a-e. Ta patil te Diose albot yu´un ta xwaech, jich bajt´ ta sk´inal Galilea ²³ Jich bajt´ sok kuxin ta muk´ul lum te ja sbiil Nazaret. Jich k´ot ta pasel te bina yaloj te alwanejetik te janax och sb´i-ilin te Nazareno.