¹ .-Jich yorail te nopojeletike talik ta stojol te Jesuse jich la yalbeyik: "¿mach'a-a te muk' sk'oplal ya xk'ot ta banti ay ta ajwalinel te Dios te ay ta ch'ulchane? xi-ik. ² .-Te Jesus la yik'tel tul alal, yu'un ya xtal ta stojol jich la stejk'an ta stojolik. ³ .-Jich la yal: Jamal ya jkalbeyex teme ma xa sujt'es te awo't'anike sok teme ma xa spajbeyik stalel jich bit'il te alaletike, ma xju' ya x-oches ta stojol ta banti yak ta ajwalinel te jtatik Dios te ay ta ch'ulchane. ⁴ .-Jich yu'un te mach'a pek'el ya yak' sba jich bit'il in alal to, ja me muk' ya xk'ot sk'oplal ta banti ay ta ajwalinel te Dios te ay ta ch'ulchane. ⁵ .-Chikan mach'a-a te ya yik'ta stojol tul alal ta jbi-ile jo'on la yi'k'onix abi, xi te Jesuse. ⁶ .-Mach'auk ate ya yak' yaluk ta mulil jtuluk te mach'atik pek'el ayik te xch'u-unejonike, ja lek te lajuk yich' chukel muk'ul cha' ta snuk' te la yich' ch'ojel ta sna'bilal te muk'ulja'e. ⁷ .-¡Ya me yil swokolik te mach'atik ayik ta balumilale, ta skaj te ay yalesel ta mulile! Puersa ay mach'atik ya syaleswan ta mulil, ja'uk me to ya me yil swokol te mach'a jich ya spase. ⁸ .-Teme ja' te ak'abe o te me ja' te awakane te ya syalesat ta mulile boja loklel sok te ch'oja ba'el ta namal. Ja lek te yakuk x-ochat ta kuxinel, manchuk me koxoat sok manchuk k'ojk'ol k'abat o k'ok'ol akanat, ja' wokol teme xchebal ak'ab sok xchebal awakan te ya xch'ojotat ochel ta k'ajk' te ma xtup' ta sbajtlel k'inale. ⁹ .-Teme ja sit te ya syaleswan ta mulile, jo'ts'a lok'el sok ch'oja bael ta namil. yu'un ja' lek te yakuk x-ochat ta kuxinel manchuk jp'ij xa nix asit ja wokol teme xchebal asit ya xch'ojotat ochel ta k'ajk' te ma xtup' ta sbajt'el k'inale. ¹⁰ .-Ilameawilik te mayuk mach'a ya yilay te mach'a pek'el ayike yu'un me ya kalbeyex awayik, te ch'ul abatetik spisil ora ya yilbeyik sit yelaw te jtate te ay ta ch'ulchane. ¹¹ .-Melel te nich'anile tal me skoltay te mach'a ch'ayemike. ¹² .-¿Beluk me anop yu'un? teme ay jtul winik te ay jo'winik ta kojt te xchije, teme ch'ay jilel kojt' ta be yu'une, ¿Ma bal yakuk yijk'itay jilel te balunlajuneb yo'winik (99) ta jkojt'e yu'un ya xba sletel te kojt' te ch'ayeme? ¹³ .-Teme la sta tel ta leele, jamal ya jkalbeyex, bin nax me yo't'an yu'un ate bit'il balunlajuneb yo'winik (99) ta kojt' te ma ba cha' yemuke. ¹⁴ .-Ja nanix jich ma sk'anjeluk yo't'an te jtatik te ay ta ch'ulchan teme ya xch'ay tuluk te mach'a pek'el ayike. ¹⁵ .-Teme ay mach'a la sta smul ta atojole, ba-an chapa sok ta stukel nax. Teme la yaiy bat stojol te ak'ope, jich lek ayatix sok te awermanoe abi. ¹⁶ .-Ja'uk me to teme ma la yaiybay stojol te ak'ope, ik'a bael cha'ox tuluk ermanoetik yu'un ja' ya och ta testik'oil te beluk ya awalbey ya-abaike. ¹⁷ .-Teme ma la sk'an yaiy stojole, albeya yaiy te ch'u-unjeletike. Teme ma la sk'an yaiy bey stojol sk'op te ch'unjeletike, jich me ak'a k'otuk awu'unik te bit'il ma ba xch'u-unej te Diose sok jichuk k'otuk te bit'il k'an patane. ¹⁸ .-Jamal ya jkalbeyex, te beluk ya jchuktik le' ta balumilalto, jich me chukul ya xk'ot ta ch'ulchan. Ja nix jich teme ya stilbatik le' ta balumilalto jich nix tilbil ya xk'o-otik ta ch'ulchan. ¹⁹ .-Sok te kalbeyex xan, teme ay chebex ya achap ak'opik le ta balumilal to te beluk ya ak'ambeyik te jtatik Dios te ay ta ch'ulchane, ya me x-ak'botex. ²⁰ .-Melel te banti stsoboj sbaik cha'oxtul ta swenta te jbi-ile: le'me ayona ta banti yolilik xi te Jesuse. ²¹ .-Ta patil tal te Pedroe jich la yalbey te Jesuse: kajwal, ¿Jayeb buelta ya sk'an te ya jpasbey perdon te kermano teme ya sta smul ta jtojole? ¿Ja' to bat ta jukeb buelta'e? ²² .-La yal te Jesuse: Ma xkalbat te jukeb nax bueltae, ja' te jukeb buelta ya x-esmaj ta lajuneb xchanwinik (70x7) ²³ .-Jich yu'un ta banti ay ta ajwalinel te Dios te ay ta ch'ulchane, jich k'oem te bit'il ay tul muk' ajwalil te ya sk'an yich'bey ta wenta te sbet te abatetik yu'une. ²⁴ .-K'alal jach yich'bey ta wenta te sbete: ik'otel tal abat te ay sbet lajun mil talento (Te ja' sbi-il sta'k'in te namey Romanoetike sok te Griegoetike) ²⁵ .-Te bit'il ma ju' yu'un stojel te sbete la yal mantal te ajwalil yu'une te ya yich' chonel sok te yiname, sok te snich'nabe sok spisil te bila ay yu'une jich me ya xtojob yu'una te sbete. ²⁶ .-Jich yu'un tsi'in te abate la skejan sba ta yalel wokol ta stojol te yajwale, jich la yal: kajwal, wokoluk maliy bon xan te jbete ya stoj spisil. ²⁷ .-Te ajwalile la snabey yo'bolil sba sok la skoltay bael sok la spasbey perdon yu'un te sbete. ²⁸ .-Ja'uk me to te abate lok'el to nax-a la stasba sok tul sjoy ta abatil te ay sbet jo'winik denario yu'une. Te abate la stsak te mach'a ay sbet yu'une la spich'bey te snu'k'e sok jich la yalbey tojbon me te abete la yut. ²⁹ .-Te sjoy ta abatile la skejan sba ta yalel wokol ta stojol jich la yalbey: maliy bon xan te jbete ya stojbat spisil. xita stojol ³⁰ .-Ja'uk me to ma la sk'an la smalibey la yak' ta chukjibal ja' to teme la stoj te sbete ³¹ .-K'alal la yilik te yantik sjoy ta abatile, bayal la smel yot'anik yu'un; Jich tal xchobeyil yaiy te yajwalik spisil te beluk k'ot ta pasele. ³² .-Jich yu'un te ajwalile la stikun ta ik'el tel te abate, sok jich la yalbey: Mero amenat ta abatil, jo'on la jpasbat perdon yu'un spisil te abete, skaj te la walbon wokol yu'une. ³³ .-¿Mabal jauk lek te la k'uxtayu-uk te ja joy ta abatile, jich bit'il jo'on te la k'uxtayate? ³⁴ .-Te ajwalile ilin yo't'an yu'un jich la yakbey ta sk'ab te majawetike ja'to teme la stoj spisil te sbete. ³⁵ .-Janix jichu-uk te jtat te ay ta ch'ulchane jich nix me ya spasbeyex u-uk teme ma sok awo't'anik ya apasbey abaik perdon ta juju-jtul sok te awermanoe xi te Jesuse.