¹ Te k´alal laj yot´an te Jesús ta spasel ta mantal te lajchetul nopojeletik yu´un, lok´bael le-a sok ba xcholbey sk´op kajwaltik ta bay te lum lum tik yu´une. ² Jich into te k´alal chukul te Juane la yaiy stojol te beluk yak ta spasel te Cristoe, jich la stikunbael sk´op sok te nopojeletik yu´une. ³ Jich la yalbey:¨ ¿ Ja´atbal te albil ak´oplal te ya xtalata, yan bal ants-winik te ya jmalitike? ⁴ Te Jesús la sut sok la yal: ¨ Ba-anik albeyaik yaiy te Juan te beluk ya awilik sok te awayik stojole. ⁵ Te masitetik yakik yich´el jambel sitik, te koxoetik ya xbe-enik, te k´ael chameletik ya yich´ik sapel te sbak´etalike, te mach´atik kojk´etike ya yaiyik stojol k´op, te ailmeletike yakalik ta cha kuxel sok te mebaetik yakik yich´el yach´il k´op. ⁶ Sok ch´ultesbilukme te mach´a ma xk´ojch´in yakan ta jtojole¨. ⁷ Te k´alal sujt´ikbael ta sbeik te winiketik, te Jesús kaj ta xcholbel te ants-winiketik yu´un te Juan: ¨¿ Beluk ba awilik ta bay takin jochol k´inal, jabal ba awilik te jalal té te yak ta tijulayel yu´un te ik´e? ⁸ Jaukmeto, ¿ já bal baawilik te jtul winik te slapo k´unil pajk´? Ta smelelil, te mach´atik slapojik k´unil pak´etik nainemik ta snaj te muk´ul ajwaliletik. ⁹ Jich yu´un, ¿ bek lok´ awilik jiche já bal te jtul alwaneje? Jich, ya kalbeyex sok te k´axem to xan yat´el te bit´il alwaneje. ¹⁰ Ja yu´un te mach´a jich ts´ibubil sk´oplal: ¨ ILAWILIK, YA ME JTIKUN BAEL TA SIT AWELAWIK TE TUL TE MACH´A YA YAL TE K´OPE, TE MACH´A YA XCHAJBAN TE ABEIKE¨. ¹¹ Ya kalbatik ta jamal, te mach´atik bejk´ajemik ta jtul ants, mayuk tuluk te muk´ k´ax skóplal jich bit´il te Juan ak´ich´ ja´e. Jauk meto te mach´a pek´el sk´oplal ay ta bay ajwalinel yu´un te ch´ulchane ja´ me kajal ay yu´un te Juane. ¹² K´alal yorail te Juan ak´ich´ja´e sok ta ora to te ajwalinel ta ch´ulchan bayal ay sbolk´opte-el , sok te winiketik te ya yich´ sbaik ta muk´ sok te yipik yot´anuk ya yu´uninik. ¹³ Jich yu´un te alwanejetik sok te mantaliletik ja´to yak ta cholela te k´alal taluk te Juane. ¹⁴ Jich te ja-exe teme jun awot´anik ya awik´ik te ja´ into ja´ te Elias, te ja´ k´an taluk. ¹⁵ Te mach´a ay xchikin te ya yaiy stojole, aka me yaiy stojol ta lek. ¹⁶ ¿ Mach´a me ya jpa sok te mach´atik kuxulik in ora to? jichik te bit´il aletik te yakik ta tajimal ta bay ch´iwich, te ya snak´an sbaik sok ya sjech yawtay sbaik. ¹⁷ Jich ya yalik:" Te jo´otike ya jtitik te jkamaytik ta atojolike, yan te jaexe ma ajk´tajatik. La jmel kot´antik, yan te jaexe ma ok´atik". ^{18 19} Melel te k´alal tal te Juane ma yakuk tel ta swe-el kaxlan waj, sok ma yakuk yuch´el pajal ts´usub, jich la yalik:" Ay pucuj ta yot´an". Xi-ik. ¹⁹ Te k´alal tal te nich´anil yak tel ta we-uch´ajeljich la yalik: ¡ Ilawilik, te winik meto to-ol ya xwe sok ya xyakub ja´ sjotak te mach´atik k´an patanetik sok te mach´atik ya yayik mulwej! Jaukmeto te sbijil ya xchikna ta ilel ta banti yat´elik. ^{20 21} Jich te Jesús kaj sk´opon tulan te lumetik te banti bayal beluk k´ot ta pasel yu´une, ja yu´un te ma sutojik yotá nika-e. "¡ Obolaba lum Corazin! ¡ Obolaba lum Betsaida mele ta jauk ya yich pasel ta Tiro sok ta Sidon te beluk tulan k´ot ta pasel ta atojolike, namey la sujt´esikix yot´anik sok la slapikix pak´ yu´un mel-ot´an sok la snak´an sbaikix ta stanil te k´ajk´e. ²² Jich yu´un pek´el kastiku ya yich te lum Tiro sok te Sidon te k´alal ya sta sk´alelal ich´el ta k´op te bin ut´il ya awich´ik te jaexe. ²³ Te jaex, Capernaum, ¿ ya akuy te toyol ya xk´oat ta ch´ulchane? Jo-o, melel te ja´ate ya awich´ ik´el ta bay stsobjibal aelmeletik; te lajuk yich´ pasel ta Sodoma te beluk tulan k´ot ta pasel te jich bit´il la yich´ pasel ta atojole, kuxul to ta k´inal te jichuke. ²⁴ Jich ya kalbeyex in ora to te k´alal ya sta sk´alelal te ich´el ta k´op ja pek´el xan kastiku ya yich´ te Sodoma, te bit´il awich´ te ja´ate. ^{25 26 27} La sta sk´alel te Jesús la yal: " Ya kalbat awutsilal, jtat, yajwalat te ch´ulchan sok balumilal, melel Ja´at la mukbey spisil te beluk ay ta stojolte mach´a ay sbijilike sok te mach´a ya xk´ot ta yot´anike, jich´la awak´bey snaik stojol te mach´atikma nojbesbilike, jich bit´il te aletik te tsaelikto-e. Jich, Jtat, melel Ja lek la wil ta sit. Spisil te beluk ay, Ja ay ta jwenta yu´un te jtate. Jich mayuk mach´a ya snabesba te nich´anil ja nax te tatile, jich mayuk mach´a ya snabesba te tatile ja nax te nich´anile, chikan mach´aya sk´an yak´bey sna stojol yu´un te nich´anile. ^{28 29 30} La-ik ta Jtojol, apisilik te mach´a ya x-at´ejike sok te mach´atik xkuchojik yijk´atsike, jich ya jkak´beyex ich lewa. Ich´aikba-el te yugo-te´ jku´une sok noponik jtalel, melel te jo´one manso sok pek´el kajk´oba, jich yu´un te jaexe ya sta lewa te ach´ulelike. Melel te yugo-te´ jku´une maba wokol ta ich´el sok te ijk´atsil jku´une maba al ta kuchel, xi te Jesuse.