¹ Ja in to ja sjunal sts'umbal te Jesucristoe, sts'umbal to tel David, k'alal to tel sts'umbal yal snich'an te Abrahame. ² Te Abrahame ja snich'an te Isaac, te Isaac ja snich'an te Jacob, sok te Jacob ja snich'an te Judas sok te yisnabe. ³ Juda te stat te Fares sok Zara, ja smeik te Tamar, Fares te stat te Esrom, Esrom te stat te Aram, ⁴ Aram ja la statin te Aminadab, Aminadab te stat te Naasón, Naasón te stat te Salmón. ⁵ Salmón te stat te Booz ja sme te Rahab, Booz te stat te Obed ja sme te Rut, Obed te stat te Isaí, ⁶ Isaí te stat te David te k'ot ta ajwalil. Te Davide ja stat te Salomón, te ja sme te yinam Urías. ⁷ Salomón te stat te Roboam, Roboam te stat te Abías, Abías te stat te Asa, ⁸ Asa te stat te Josafat, Josafat te stat Jorám sok te Jorám ja stat te Uzías. ⁹ Uzías te stat te Jotam, Jotam te stat te Acaz, Acaz te stat te Ezequías. ¹⁰ Ezequías ja la statin te Manasés, Manasés te stat te Amón, Amón te stat te Josías. ¹¹ Josías te stat te Jeconías sok te sbankiltak te k'alal yorail te la yich'ik ik'el ba-el ta Babilonia. ¹² Sok te k'alal ayikix ta Babilonia, Jeconías ja stat te Salatiel, Salatiel ja sts'umbal te Zorobabel. ¹³ Zorobabel te stat te Abiud, Abiud te stat te Eliaquim, Eliaquim te stat te Azor. ¹⁴ Azor ja la statin te Sadoc, Sadoc ja la statin te Aquim, Aquim te stat te Eliud. ¹⁵ Eliud te stat te Eleazar, Eleazar te stat te Matán, Matán, te stat te Jacob. ¹⁶ Jacob te stat te José te ja smamlal te María, te ja sme te Jesuse te Cristoe xi sbi-ile. ¹⁷ Spisil te ts'umbalil k'alal ta Abraham ja to ta David ja yajtalul chanlajun kum ts'umbalil, k'alal ta David ja to te k'alal la yich'ik ik'el ba-el ta Babilonia ja chanlajun kum ts'umbalil, sok te k'alal la yich'ik ik'el ba-el ta Babilonia ja to ta Cristo ja chanlajun kum ts'umbalil. ¹⁸ Te bit'il ayin te Jesucristo jich ay in to. Te sme-e ja te María chapalix-a te ja ya xnujp'in sok te José, ja'uk me to ma to ba yik'oj sbaik-a, ayix ta yan chamel-a ja ta swenta te ch'ul Espiritu. ¹⁹ Te José smamlal ja toj ta winikil stukel, jich ma la sk'an yak' ta kexlal ta komon sitil. Jich la snop ta yot'an te muken k'anuk yijk'tay jilel. ²⁰ Jich te k'alal yak ta snopel ta spisil in to, tul ch'ul abat yu'un te kajwaltike tal yak' sba ta na'el ta swaech te la yal: "José, sts'umbalat David, ma axi' awik' awinamin te María, melel te bit'il ay sba-ale ja ta swenta te ch'ul Espiritu-e. ²¹ Te k'alal ya xbek'aj te yal-e te ja'ate ya awak'bey sbi'il Jesús, mele ja ya skoltay te slum yu'un te smule." ²² Spisil in to k'ot ta pasel swenta yu'un k'ot te bina yaloj te kajwaltike ta stojol te alwanej, te jich la yal: ²³ "ILAWILIK, TE CH'IEL ACH'IX TE MA TABIL TA WINIK YA ME XBEK'AJ SKEREM-AL, SOK YA ME YAK'BEY SBIIL EMANUEL, TE YA SK'AN YAL, 'SJOINEJOTIK TE DIOSE'." ²⁴ Te José wijk' sit yu'un te swaeche jich la spas te bit'il albot yu'un te ch'ul abat yu'un te kajwaltike sok jich la yik' yinamin. ²⁵ Ja'uk me to, ma la sjokin ta wayel ja to te bejk'aj te alale. Sok jich la yakbey sbiilin Jesús.