¹ Ta buen sab ta sbabialan k'aal yu'un te semanae, te antsetike bajt'ik ta mukenal, la yichbeyik bael te perfumeetik te la xchajp'anike. ² Balch'unbilix lok'el k'ot staik te ton te makbil a te mukenale. ³ Ochik bael, jauk me to ma la stabeyik te sbak'etal te kajwaltik Jesuse. ⁴ Te k'alal mayuk mach'a ya sna' te beluk k'ot ta pasele,ajk' nax ay cha' tul winiketik tek'atik k'oel ta sts'eelik, te slapojik sk'u-spak'ik te xlememetnaxe. ⁵ Te antsetike bayal axiwik yu'un sok la stinan sbaik koel ta lum, te cha' tul winiketike jich la yalbey te antsetike: "¿Bistuk ya aleik ta bay animaetik te mach'a kuxulixe? ⁶ ¡Ma le ayix to, la yich'ix cha' kusesel! Juluk ta awot'anik te bit'il la sk'oponatik te k'alal ay to ta Galileae, ⁷ te la yal, te nich'anile ya me yich' ak'el ta sk'ab te mulawil ants-winiketike sok te ya me yich' jijp'anel ta cruz sok ta yoxebal k'aal, ya me xcha' kux tel. ⁸ Te antsetike jul ta yot'anik te sk'ope ⁹ jich sujt'ik bael sok la xcholbey yayik te bulucheb ta tul sok uuk te yantikuke te beluk k'ot ta pasele. ¹⁰ Jich yu'un te Maria Magdalenae,Juana,Maria te sme' te Santiagoe sok te yantik ants te sujenike, la yalbeyik yaiy te wolwanej puk-k'opetik te beluk k'ot ta pasele. ¹¹ Jauk me to te wolwanej puk-kopetike jich la skuyik te bit'il jowil k'opnaxe, ma la xch'uunik te beluk albot yu'un te antsetike. ¹² Jauk me to te Pedroe la stejk'an sba jajch'el sok bajt' ta alimal ta ba ay te mukenale, te k'alal la stejk'an sbae sok te k'alal la yil ochel te mukenale, janax la yil te k'uul pak'al te pasbil ta linoe. Jich yu'un te Pedroe bajt' ta snaj, sok yak bael ta snopel te beluk k'ot ta pasele. ¹³ Jich yu'un, janix sk'alelal te ay mach'a cha'-tul te bajt'ik ta bay ch'in lum te Emaus sbi'ile, te bulucheb kilometro xan te snajtil te bit'il te jerusalene. ¹⁴ Jich jajch' ya'anik bael spisil te beluk k'oem ta pasele. ¹⁵ Jich k'ot ta pasel, te k'alal yak ta yalbeyel sbaika sok te yakik ta sjok'ebel sbaika te beluk k'ot ta pasele, Te Jesuse nopts'aj tel ta stojolik sok la sjun bael, ¹⁶ Jauk me to ma la sna' bey sbaik, melel makbil te sitike. ¹⁷ Te Jesuse la yalbey yaiyik: "¿Beluk yakatik ta ya'anel ta achebalik te k'alal yakatik tel ta be'ele? La smel yot'anik yu'un. ¹⁸ Ay tul, te Cleofas sbi'ile, la sutbey: "¿Yu'un bal ja'at xanix atukel ta bay lum Jerusalen te ma ana'oj te beluk yak ta k'oel ta pasel in k'aal to?" ¹⁹ Te Jesuse la yalbey yaiyik: "¿Beluka? la sutik: "ja ta swenta te Jesus te nazarenoe, te ja' tul alwanej, te bayal yu'el ta spasel at'eliletik sok te sk'op ta stojol te Diose,sok ta spisil te ants-winiketike. ²⁰ Te bit'il te wolwanej sacerdote'etike sok te ajwaliletik ku'untike la yak'ik ta milel sok la sjip'anik ta cruz. ²¹ Jauk me to te jo'otike ja yakotik ta smaliyel a te ja'uk ya skoltay te lum Israele. jauk me to, ta spisil in to, yoxebalix k'aala to t ²² Janix jichuk, ay antsetik te junetike cham nax la kaytika te beluk la yalike, te k'alal bajt'ik ta mukenal ta buen sabe. ²³ Te ma la stabeyik te sbak'etale, sujt'ik tel, te la yalik te la yilik ch'ul abatetik te albotik yu'un te jesuse kuxul. ²⁴ Ay cha'-oxtul winiketik te junebatik soke bajt'ik ta mukenal sok jich k'ot staik te bit'il la xchol te antsetike. Jauk me to ma la yilik." ²⁵ Te Jesuse la yalbey yaiyik: "¡winiketik te ma anaik k'inale sok te wokol ya xk'ot ta awot'anike te ya ach'unik te beluk yalojik te alwanejetike! ²⁶ "¿Ma bal jich ya sk'an-a te ya xk'ax swokol ta spisil in to sok te ya x-och ta bay te yutsilale?" ²⁷ Ta patil,te Jesuse la xcholbey yaiy spisil te bit'il ay sk'oplal te beluk ts'ibubil ta stojol te Cristoe, Ja nel jach' sok te Moisese sok ta stojol te alwanejetike ²⁸ K'alal yakik oxtajel bael ta bay te ch'in lume, le ta bay snopojik te xbakt'ike, te Jesuse k'anuk jelawuk bael yilel. ²⁹ Jauk me to la sk'ambeyik wokol te yukuk xjil xane, jich la yalbeyik: " Joinawotik jilel ", melel malix te k'aale sok yakix ta ik'ubel te k'inale. ³⁰ Jich k'ot ta pasel, te k'alal te Jesus la snajk'an sba ta we'el sok te mach'a sjuytake, la stsak te kawlan waje, la xchu'ultes sok la xet' sok kaj spukbey te mach'a sjoineje. ³¹ Ajk' nax la yich'ik jambeyel te sitike sok jich la sna'beyiksba te ja' te Jesuse, janix jich te Jesuse ajk' nax a tub' bael ta sitik. ³² Jich kaj yalbey sbaik: "¿ Ja' ni wan swentail te binup' jkot'antik te k'alal kaj sk'oponotik te bay te bee, sok te bit'il kaj xcholbotik te sk'op te Diose? ³³ La stejk'an sbaik ta ora nax sok sujt'ik bael ta bay Jerusalen. K'alal k'otik stsoboj sbaika te bulucheb nopojeletik sok xan ay mach'atik le' ayikaa, ³⁴ k'o yalik: " Yu'unix melel a te Kajwaltik cha' kuxemix melel layilix te simone." ³⁵ Sok kaj xcholik spisil te beluk k'ot ta pasel ta bay te bee sok te bit'il la yilik te Jesus k'alal la xet' te kaxlan waje. ³⁶ K'alal yakalik ta ya'anel spisil into, te Jesuse la stejk'ansba ta yolilik sok jich la yal: " Ayuk me lamal k'inal ta atojolik". ³⁷ Jauk meto k'ax xiw yot'anik yu'un, la skuyik te yakik ta yilel tul xch'ulel ailmeel. ³⁸ Te Jesus la yalbey yayik: "¿ Bistuuk te yakatik ta mel ot'an? ¿ bistuuk te bayal bek yak ya'anel awot'anik? ³⁹ Jo'on, Ilawilik te jk'ab sok te jkakane. La' pikawonik sok la' ilawilik. Melel te ch'ulelalukone mayuk jbak'etal te jichuke sok mayuk jbakel te jichuke." ⁴⁰ K'alal la yal in to, te Jesus la yak'bey yilik te sk'abe sok te yakane. ⁴¹ K'alal ma to be xch'unik spisil te beluk yak k'oel ta pasel yu'un te sbujt' yot'anik sok te bit'il yanax la yilik spisil in to, te Jesus jich la yal: " ¿ Ay bal bek ya jlajintik ?" - xi'. ⁴² Jich la yak'beyik k'asuk wo'bil chay. ⁴³ Te Jesuse la stsak sok la we' ta komon sitil. ⁴⁴ Te Jesuse jich la yalbey yayik: "K'alal joenejex to a, la jkalbeyex te yejt'al ya xk'ot ta pasel te bit'il tsibubil ta mantaliletik yu'un te Moises sok te Chol k'opetik ta namey k'inal, sok te ay ta Salmoetik." ⁴⁵ Jich yu'un, te Jesuse la sjambey te snopjibal yu'unik, jich yakuk xk'ot yat'anik a te beluk tsibubil ta sk'op te Diose. ⁴⁶ Jich la yal xan: "melel jich tsibubil, te ya xk'ax swokol sok nix te ya xcha kux te Cristoe ta yoxebalan k'aal ta bay ailmeletik. ⁴⁷ Sok te yakuk yich' alel ta spisil lumetik te yakuk sujt'es yot'anik sok te ay perdon ta swenta sbi'il te Cristoe. Le' me ne'el ya xjach' ta bay lum Jerusalen. ⁴⁸ Jaex me testigoex yu'un spisil te beluk k'otix ta pasele. ⁴⁹ Ilawilik, te Jo'one yakon me jtikumbelex te beluk yaloj te jtate. Jich yu'un ainanik le' in to ta bay Jerusalén. Ja' to k'alal ya xjul ta awentaik te yu'el Dios te ya xtal ta toyole. ⁵⁰ Jich yu'un te Jesus la yik' bael ja' to ta bay nopol ch'in lum Betania. Te Jesús la stoy moel xchebal te sk'abe sok la xch'ultes te nopojeletik yu'une. ⁵¹ Te k'alal yak ta xchultesel te nopojeletike, la yich' ik'el moel ta chulchan jich jilik te nopojeletike. ⁵² Kajik ta yich'el ta muk' sok sujt'ik bael sok bayal sbujts' yot'anik ta bay Jerusalén. ⁵³ Spisil k'aal ya xbajt'ik ta sna te Diose, sok yakik ta xch'ultesbel sbi'il te Diose.