¹ Jich k´axix xchanlajunebal jawil sujt´on moel ta bay Jerusalén sok Bernabé, janix jich la sjoinon bael te Tito. ² Ja´ moon bael yu´un te beluk la yak´bon jna stojol te kajwaltike jich ya cholbey yaiy te yan lum te lek yach´il kópe. La jcholbey yaiy ta stukelik nax te mach´atik wolwanejetik jich me jun kot´an yu´un sok te ma jontoloke. ³ Te Tito te griego te sjoinejon, ma la sujik yich´el te sirkunsisión. ⁴ Ay lotil kermanotak talik ta muken tsajtawane te bit´il ya jtatik te koltayel ta stojol te Cristo Jesúse. Ja´ ya sk´anika-a te yakuk xk´atbujotik ta mosoinel, ⁵ jauk me to te jootike ma la ch´uuntik te uts´inele ni xujt´uk ja´ yu´un te smelelil te yach´il k´op swenta jkoleltik te la xch´uunike. ⁶ Yan te mach´atik tulan sk´oplalikae, chikan biyilele, mayuk stulal jku´un, Dios mayuk mach´a ya sba, jaikbi, te joone ya jkal, te tulan sk´oplalike mayuk bi ya yalbonik. ⁷ Jauk me to la yilik te albilon te ya jchol te yach´il k´op ta stojol te mach´a ma yich´o sirkunsisión, jich te bit´il te Pedro te ya xchol te smelelil yach´il k´op ta stojol te mach´atik yich´o sirkunsisión. ⁸ Te Dios, at´e ta stojol te Pedro ta cholel te sk´op ta stojol te mach´a yich´o sirkunsisión janix jich la stikunon ta xcholbelu-uk te mach´a yan lume. ⁹ Te Santiago, Cefas, sok te Juan, nabil sbaik te ja´ la xjachik te chunjeletike, k´ot ta yot´anik te yutsil yot´an te kajwaltike te ay ta jtojole, jich la yak´botik ta swael sk´abtik te ya jokinba sok te Bernabe. Jich la spasik ta jtojoltik te jich ya xbootik ta stojolik te yan lume sok te jich ya xbat´iku-uk ta stojolik te mach´a yich´o sirkunsisione. ¹⁰ Janax la sk´anbotik te manchuk ya xch´ay ta kot´antik te mebaetike, ja toyol kot´an yuunbi melel ja yakon sk´anel pasela-a. ¹¹ Jaukmeto te k´alal tal ta Antioquía te Cefas la jsituy ta k´op ta komon sitil melel ma lekuk te beluk yak ta spasele. ¹² Ay chaox tul winketik te talik ta swenta te Santiago, te Cefas yak ta we´el sok te yan lume. Jaukmeto te k´alal tal te winketike la spit´esba jilel stukel ta stojol te yan lume. Yu´un la xi´ te mach´atik yakik ta sujwanel yich´el te sirkunsisione. ¹³ Te yantik Judioetik la sk´ainiku-uk te cha lam ot´anil. Sok u-uk te Bernabé ikot´ beel yuunu-uk. ¹⁴ Jaukmeto te k´alal la kil te ma jauk yakik ta spasel te beluk ya yal te smelelil yach´il k´ope, la kalbey ta komon sitil te Cefas: ¨Te me jaat Judioat jich yakat ta kuxinel te bit´il yan lume sok te ma´ jichuk te bit´il tul judioe, ¿ bist´il ya asuj te yan lum te jichuk ya xkuxin te bit´il Judioe?¨ ¹⁵ Te jootike judiotik ta jbek´tijibtik maba mulawilotik jich te bit´il yan lume; ¹⁶ jaukmeto te jootike ya jnatik stojol te mayuk tuluk ya xkoltayot yu´un teme la xch´uun spasel te at´elil albil ta mantalile, janax teme ay xch´unjel ot´anil ta stojol te Jesucristo. Jich ya xk´ootiku-uk teme ay xch´unjel kot´antik ta stojol te Cristo Jesús ta swenta nax xchunjel ot´anil ma ta swenta te yat´el te mantalile. Melel ma ta swenta yat´el te mantalile te ay mach´a lek sk´oplal ya xk´ot. ¹⁷ Jaukmeto te jootike ya ch´uuntik te Cristo, melel mulawil la staotiku-uk, ¿ yu´unbal ja´ ya yak pastik mulil te Cristoe? ¡Ma jauk! ¹⁸ Teme joon ya jcha pas te beluk kijteyojixe, ja´ya kak´ ilel te k´axin te mantalonabi. ¹⁹ Ta swenta te mantalile ja´ lajon ta stojol, yu´un jich ya xkuxinon ta stojol te Diose. ²⁰ Pajal la kijch´ix jijp´anel ta krus sok te Cristo. Ma jaukonix te kuxulone, ja´ te Cristo kuxulix ta jtojole. Te kuxinel te yak kuxintayel te bak´etal in ora to, yak ta kuxinel yu´un te jch´une ta jkotán te snich´an te Diose, ja´ te sk´anojone sok te laj ta milel jku´un jich ya xkolona. ²¹ Ma xch´ay ta jkot´an te yutsil yot´an te Diose, te yakuk jtatik te bila toj te bay mantalile, ¡ te Cristoe jon tol laj abi!