¹ Pablo, wolwanej puk k´op, ma ta swenta ants-winik ma ta swenta sk´ap ants-winik ja ta swenta te Jesucristo sok te Dios tatil, te mach´a la sjatsestel ta ba almeletik, ² sok spisil te kermanotatik te joineje, jich nix te ch´unjeletik ta Galicia: ³ Te yutsil ot´anil ayuk ta atojolik sok te lamal k´inal yu´un te Dios jtatik sok te kajwaltik Jesucristo, ⁴ te la yak´ sba ta k´abal yu´un te jmultike, jich me ya xju yu´un skoltayotik lok´el ta ora to swenta te ma ba lekix te k´a-ale, te jich sk´anjel yot´an te Dios tatil ku´untike, ⁵ aka yich ich´el ta muk ta ora to sok ta sbat´el kinal, jichuk. ⁶ Yan nax ya jkay te bit´il te ja-exe yakatik ta lok´el bael ta stojol te mach´a la yik´ex tel ta yutsil yot´an te Cristoe. Yan nax ya jkay te bit´il te ja-exe yakatik ta k´atbujel ba-el ta yan yach´il k´op. ⁷ Ma ja´uk ya jk´an ya jkal te ay yan yach´il k´ope, ja´uk me to ay winiketik te yakalik ta xjachel k´op ta atojolik sok ya sk´anik syantesik te lek yach´il k´op yu´un te Cristoe ⁸ Machuk me jo-otik, sok ch´ul abatetik ta ch´ulchan, ya yalbeyex yan lek yach´il k´op te bit´il la jkaltike, ya me yich bol k´opteyel yu´un. ⁹ Jich nix ya kalbeyex te bit´il la jkal ta ne-elal, jich ya cha kalbeyex: "Te me ay mach´a ya yalbeyex yan yach´il k´op te ma jau´úk te bit´il la awich´ik albeyel ta snelaltoe, aka me yich bol k´ópteyel yu´un". ¹⁰ jich yu´un , ¿ja ba yakon ta sle-el te lek jk´oplal yu´un te ants-winike ja ba te ja´uk lek jk´oplal yu´un te Diose?¿Ja ba yakon ta sle-el te lek nax yot´an jku´un te ants-winike? te me ja ya xbajt kot´an te binax yot´an jku´un te ants-winike, ma ba abaton yu´un Cristo abi. ¹¹ Melel ya jk´an te yakuk anaik stojol, kermanotak, te yach´il k´op te la kalbeyex awayike ma sk´opok ants-winik. ¹² Sok te jo´one, ma la jkich´ akbel yu´un tuluk ants-winik, ni ma la kich nojptesel. Ja´uk me to la kich ak´bel jna stojol yu´un te Jesucristoe. ¹³ Te ja-exe ja awayajik stojol te namey jkuxinel te bit´il Judio-on, te bit´il bajt´ ta jkot´an snutsel te ch´unjeletik yu´un te Diose sok la jk´an te k´axeluk laj sk´oplalike. ¹⁴ Te jo´one jelawen jbijil xan-a te mach´a pajal jch´iel, te pajal Juidio-on sok, jich nix ta stojol te mach´a pajal jlumal soke. Jich me k´ax jelawen sk´oplal jku´un te stalel skuxinel te jme jtate. ¹⁵ Ju´uk me to te k´alal Dios, te ja la stsa-on k´alal ta xch´ujt jme, sok ja la yik´on ta swenta yutsil yot´an, ¹⁶ la smulan yot´an te la yak´bon jkil te snich´ane, jich me te jo´one ya me jchol bey sk´óplal ta stojolik te mach´atik yan lume, ma ja´uk ba jle te ch´ich bak´et te yakuk xcholbon jkaye. ¹⁷ Ma ba bo´on ta Jerusalen ta sle´el te mach´atik ne´el wolwanej puk´ k´opetike, ja´uk me to bo´on ta Arabia sok ta patil sujt´on tel ta Damasco ¹⁸ Patil te k´axix oxe jawil-a bo´on ta Jerusalen ta snabel sba te Cefas, sok la jokin jo lajuneb k´aal. ¹⁹ Ja´uk me to ma la jkil te yantik wolwanej puk´ k´opetike, janax te Santiagoe, te yits´in te kajwaltike. ²⁰ Te bit´il yakon ta sts´ibubelexe, jamal ya kalbeyex ta stojol te Dios te ma ba yakon ta spasel lote. ²¹ Ta patil bo´on ta sk´inal Siria sok Cilicia. ²² Te Jo´one ma to sna bon jba-a te ch´unjeletike te ayik ta Judea te ayikix ta stojol te Cristoe. ²³ Ja nax yakalik ta yayel stojol: "Te winik te jun k´a-al la snutsotike, ta ora to yakix ta yalel te xch´unjel ot´anil te jun k´a-al sk´anuk slajinbey sk´oplale". ²⁴ Jich yakalik ta yich´el ta muk´ te Diose ta swenta yu´un te bila yak ta spasel ta jtojole.