¹ Wa uma xtachiwin Puchina nikuma kgaxmatli Joel, xkgawasa Petuel. ² Kakgaxpatit uma, wixin lajkgólon, chu kakgaxpatit, wixin putum latamanin xalak jkatiyatni. ¿Titaxtunita la uma kminkilhtamakukan o nak xkilhtamaku xalakgmakgan? ³ Kakalitachiwinantit uma min lajkgawasan, chu xlajkgawasan minkamanan. ⁴ Tuku wa xtuki makgxtajkgolh, lakjlanka xtuki wakgolh; tuku lakjlanka xtuki makgxtakglhi, silankgni wakgolh; chu tuku silankgni makgxtakglhi, aktsu luwa wanit. ⁵ ¡Kastakuanantit, kgachinin, chu katasatit! Pulhkatasatit, putum tiku kgotkgoy xkuchu uva, xpalakata xa sakgsi xchuchut uva kamakglhtikanintit. ⁶ Wa xpalakata akgtum pulataman takinit xakgstin kinkatiyatni, tliwekge chu nitu kgatli xtaputlakgan. Kgatli xtatsan lapanit. ⁷ Naj kinkatukuxtu lixkan katlawalh chu wakgonit kintachanan. Makglhtikgonit xtuwan chu kamakganit; xpakgan laksnapapa. ⁸ Kapulhtasatit la xtachun tiku katsumatku lata niy xchixku. ⁹ Chu xlilakgatay taltsi chu lilakgatay xkuchu uva nitu nak xchik Puchina. Palakachiwinanin, xlakskujnin Puchina, kakatasatit. ¹⁰ Naj kakiwin makasputukanit chu katiyatni tatlajinit. Wa xpalakata taltsi laktlawaka, xa sasti kuchu skajnit, chu aceite laklalh. ¹¹ Kamaxanantit, kuxtunanin, chu kapulhtit, puxnanin, xpalakata tachanan. Waxla xpalakata tachanan tsankgakgolh. ¹² Tachanan skajkgolh, putum kiwi nikuma mastay xtawakat skajkgolh. Xtapaxawan latamanin taskajkgolh. ¹³ ¡Palakachiwinanin, kalitlakganantit lhakgat nikuma litasiyayatit jkatasan! Kapulhtasatit, palakachiwinanin. Katantit, kalilakgatankuitit milhakgatkan, wixin xlakskujnin ki Dios. wa xpalakata lilakgay taltsi chu lilakgatay likgotna kamapanukanit nak xchik Dios. ¹⁴ Kalichiwinantit akgtum takilhtsinksni, chu kakamastokgtit latamanin. Kakamastokgtit lajkgolon chu putum latamanin xalak jkatiyatni anta nakj xchik Puchina mi Dios, cha kakilhpinitit Puchina. ¹⁵ Wa xkilhtamaku Puchina hay talakatsuwinit. Xlá natamín kalhakgsputni xpalakata tlakg xatliwakga. ¹⁶ Mapanukanit taway nak kilakatinkan, chu tapaxuwan chu talitsin nak xchik Puchina. ¹⁷ Taltsi mastaju nak tiyat, tachanan tsankgakgo, xchik kitsistankan lakglhakgonit, wa xpalakata nitu taltsi. ¹⁸ ¡Kitsistankan kilhtsinksmakgolh! nitu sakgat tuku tlan xwakgolh kitsistankan. Nachuna kgalhnilos kilhtsinkskgoy. ¹⁹ Puchina, akit jkilhtasaniyan. Wa lhkuyat masputunit sakgat, na masputulh kakiwin. ²⁰ nachuna kitsistankan tiku lamakgolh jkakiwin kilhtasanikgoyan, wa xpalakata taxtunut skajkgolh, chu lhkuyat masputunit sakgat.