¹ Lawku, David sasti kamastogpa pogtu lakchixkuin ti xatalasakni xla Israel, puxamakáwmilh. ² David tayalh cho katalh pogtu xlakchixkuin ti xtawlakgocha nak Baala nak Juda xpalakata nalimimkgoyacha pumakakin xla Dios, wa li mapakwikan xtakuwini PUCHINA xla magtakgalhnanin ti tawilay nak tlanka laktawilh la nak xlaknikan querubuines ³ Walikgolh pumakakin xla Dios nak putlaw xha sasti. Wa xlakan maxtukgocha nak xkilhtin xchik Abinadab, wantu anta xwi nak xakaxtum laksu sipi. Uza cho Ahío, xkaman, wa xpul´lenkgoy putlaw xha sasti. ⁴ Wa xlakan maxtukgolh putlaw xkgapun xchik Abinadab tu xwilacha nak xakaxtum laksu sipi tu xlakwi pumakakin Dios. Ahio xtlawma nak xlakatin pumakakin. ⁵ Wancho David cho pogtu xchik Israel tzukukgolh tlagnankgoy nak xlakatin PUCHINA, limkgapaxuwkgolh litlagna xla kiwi, arpas, liras, panderetas, cascabeles y címbalos. ⁶ Akan lakaplhkgolh nak xtachananin xla Nacón, wa wakaxs akgchaxkgolh, cho Uza makalh xmakan xpalakata ampi xchipal xpumakakin xla de Dios, cho chipalh. ⁷ Wancho PUCHINA snun sitsinilh Uza. Dios anta lakatawkalh xpalakata xtalakgalhin. Uza nilh anta nak xpaxtun pumakakin xla Dios. ⁸ David lu ksitsinit xpalakata ampi wa PUCHINA xlakatawkanit Uza, cho xla limapakwilh xtakwini tiyma pultaman Perez Uza. Wantiyma pultaman litamapakwikan Perez Uza chuna ku lanchiyu. ⁹ David lu pekuanilh PUCHINA tiyma kilhtamaku. Wa tiwa: “¿nantla cho tlan pumakakin xla PUCHINA nakilagmin?” ¹⁰ Chuna cho David ni xliputun xpumakakin PUCHINA nak xpulakni kachikin xla David. Wa cho uyma xlagxokgo, wa walih nak xpaxtun la nak xchik Obed Edom wa geteo. ¹¹ Wa xpumakakin PUCHINA anta ti xwi nak xchik Obed Edom wa geteo akgtutu papa. Wancho PUCHINA wa tiskulnatlawalh cho pogtu xchik. ¹² Akan cho wanikgolh puxku David: “Wa PUCHINA skulnatlawalh xchik Obed Edom cho pogtu tu wa tapagsaniy xpalakata xpumakakin Dios”, alh cho limilh xpumakakin Dios anta la nak xchik Obed Edom likaplhli nak xkachikin David lu chapaxuwana. ¹³ Akan cho wanti xchaxlinkgoy xpumakakin PUCHINA xtlawkgonita akgchaxán tatlaw, wa xla mastakgolh tantum wakax cho kgachu xhaskgata toro. ¹⁴ David tantlilh nak xlakatin PUCHINA xlipogtu xlitlawkga; wa xla kaxmawa xlilhakganan talhakgan xla lino. ¹⁵ Wancho, David cho pogtu xchik Israel chapaxuwana liminkgolh xpumakakin PUCHINA cho makasanekgolh trompetas. ¹⁶ Lawku cho, xlimagwa wa xpumakakin PUCHINA xtanumacha nak kachikin xla David, Mical, xtsumat Saul, ukxilhna la nak xkilhtin ventana. Wa xla ukxilhli puxku David xtalinkxma cho xtantlima na xlakatin PUCHINA. Wancho xla tsumat lu lagmakgalh nak xnaku. ¹⁷ Wa xlakan linkgolh nak xpulakni xpumakakin PUCHINA cho anta walikgolhnak xputawlan, nak xpunan chiki wantu David xmakinit xpalakata. Wancho Davdid mastalh ofrendas xalhkuni cho likakni xla tagtsiyagni nak xlakatin PUCHINA. ¹⁸ Akan wa David mastakgolh likakni xa lhkuni cho likakni xla takgalhchuwin, wa xla skulnatlawalh kacchikin nak xtakuini PUCHINA xla magtakgalhnanin. ¹⁹ Wancho xla pogtu magpitzilh na xlagstipan tachixkuitat, xli pogtu lilhuwa xla Israel, chuna la lakchixkuin cho lakpuskatna, maktum kaxtilanchu, pagtsu liway, cho pastel xla pasas. Wancho pogtu tachixkuitat ankgolh, chatunu taspitpa nak xchik. ²⁰ Wancho, David tapuspitli xpalakata skulnatlawalh xlitalilakgapasni. Mical, xtsumat Saúl, taxtulh xpalakata tatanoglhputulh David cho wanilh: “¡lutlan tasiyuy tu tlawalh puxku xalh nak Israel lanchiyu, tapuxtunkgolh xlakatin lakpuskatni skitinin, xtachuna la chatum chixku la tlawakgoy akgwitinin ti xalakayijin lu nimaxankgoy mana tapuxtuntaykgoy!” ²¹ David kgalhtih Mical: “kit chuna ktlawalh nak xlakatin PUCHINA, wantinta kilaksakli xlagxokgo mintlat cho xlipogtu militalkgapsni, wantinta kilimapakwilh xlakapul´lina xla xkachikin PUCHINA, xla Isarel. ¡Nak xlakatin PUCHINA akit lu chapaxuwana nak tawlay!. ²² Akit liwka lu ni tlan kit la uma, cho litlawat nakintlawkat nak xtakatin kintalkawan. Ampi wancho uma xpalkata skitinin ti kalichuwinanti, akit na kinkaknikgoy”. ²³ Wancho Mical, xtsumat Saúl, nitu kgalhilh xkaman xliputum kilhtamaku.