¹ Aora, aún ma primó pakto a tené regulasió pa arorá y un santuario terrená. ² Pué un tabennakulo jué praperao. Ma primó kuatto, andi taba ma kandelabro, ma troja y ma pan ri ma presensia, jueba ñamao paraje santo. ³ Retrá ri ma segunda kottina a abé uto kuatto, ñamao paraje má santo. ⁴ A tené un attá dorao pa ma aroma. Tambié a tené ma arka ri ma pagto, ke taba yenito kubietto ku oro. Aí lendro taba un basija dorá ke teneba ma maná, ma bara ri Aarón ke a floresé, y ma tabla ri ma pakto. ⁵ Sobre ma arka ri pakto, kerubines ngloriosos a kubrí ma tapa ri ma ponina, ndando sombra ku ala sí, ri kuá suto polé chitiá nú aora ku retaye. ⁶ Repué ke to e ma kusa jueba prepará, ma saseddote siempre a lendrá pa ma kuatto ri lao guela ri tabernakulo pa asé ma sebbisio. ⁷ Pero solo ma sumo saseddote poleba lendrá pa segundo kuatto un begá endi año, ku pola ke ele a ofresé po ele memo y po ma pekaro ke ma pueblo a asé sin ané sabé. ⁸ Ma Espitu Santo a motrá ke ma kaddume pa paraje más santo a sendá rebelao nú mientra ma primó tabernakulo toabía taba aí. ⁹ E sendá un ilustrasió pa tiembo presente. Ambo, ma regalo y ma sacrifisio ke se tá ndando aora, sendá kapase nú ri pefesioná ma konsiensia ri ma aroraró. ¹⁰ Ané namá tá korrepondé ku kumina y bebía, y bario mo ri lebandamiendo seremoniale. E a sendá to ma regulasiones pa ma kanne, ke jueba bista ata kreá un nuebo odden. ¹¹ Kristo a miní kumo un saseddote ri ma kusa kaiko ke a miní. Ele a miní a trabé ri mejó y ma pefetto tabernakulo, ke jueba echo nú po mano ri gende, uno ke a sé patte a ete mundo kreao. ¹² A sendá nú po pola ri chibo y karnero, pero por propia pola sí, ke ele a lendrá pa un paraje ma santo, una be po to ané y a asegurá redensió etenna ri suto ¹³ Pue si ma pola ri chibo y toro y ma rusiao ri ma senisa ri nobilla sobre aké ke se asé imundo, a apattá ané ri Rioso, pa ma limpiesa ri kanne sí, ¹⁴ ¿ kuanto ma poleba sé ma pola ri Kristo, kien a trabé ri ma Espritu Santo Etenno a ofresé a ele memo sin macha a Rioso, limpiá konsiensia ri suto ri obra lungá pa sibbí a Rioso ku mbila ? ¹⁵ Po e memo kusa, Ele sendá meriaró ri un nuebo pakto. E kusa sendá, pa ke ya ke un muette tomá paraje, para libetta ri pekaro sí aké bajo ri primó pakto, aké ke sendá ñamao tan kujé ma promesa ri un rekao etenno. ¹⁶ Pokke andi a abé tetamento nú, ma muette ri ma gende ke a aselo, ten ke sé probá. ¹⁷ Pokke un tetamento ke tené bilanté numá kuandi a pasá un muette, pokke atá en bilanté nú kunadi kiene a aselo toabía ten mbila. ¹⁸ Asina ke tampoko ma primó pakto asé eteblesio sin pola. ¹⁹ Pa kuandi Moisés a ndá to ma rekao ri ma ley a to ma pueblo, ele bebé ma pola ri kannero y ri ma macho, ku apú, pita roja, y brocha y a jundalo to ané ndó; ma royo y a to ma gende ri e pueblo. ²⁰ Antose ele a chitiá: '' ETA SENDÁ MA POLA RI PAKTO KE RIOSO A MANDÁ PA ENÚ'' ²¹ Ri e memo manera, ele a jundá ma pola endi tabennakulo y po to e ma bangaño usao andi sebbisio. ²² Ri akueddo ku ma ley, kasi to sendá limpiao ku pola. Sin botá pola abé peddón nú. ²³ Po tanto, jueba nesesario ke ma kopia ri ma kusa endi ansulú jueran limpiá ku ma sakrifisio re e ma nimao.Sin embaggo, ma kusa ri ansulú memo teneba ke sé limpiao ku sakrifisio mejó. ²⁴ Pue Kristo a lendrá nú pa paraje santísimo echo po mano, ese ke sendá kopia ri ese ri belá. Pero Ele a lendrá a e memo ansulú pa motrá ele memo aora, endi presensia ri Rioso, po suto. ²⁵ Ele a bae nú pa ofresese un chochá ri begá, kumo a asé ma sumo saseddote, kiene lendrá pa paraje santísimo año po año ku ma pola ri uto. ²⁶ Si e jueba ma kaso, antose jueba nesesario pa Ele ke sufriera un chochá ri begá renje ma kreasió ri mundo. Pero aora, sendá numá un begá andi final ri ma edade, ke a sendá rebelao pa ichá ma pekaro po ma sakrifisio ri ele memo. ²⁷ To gende ten ke lungá un begá y repué juisio miní. ²⁸ Ri e memo manera, Kristo tambié, Kiene jué ndao un begá numá pa kitá ma pekaro ri un chochá, tan pesé po ndó begá, pa liriá ku pekaro nú, sino pa ma sabbasió re kiene atá eperá po Ele.