¹ Po tanto, ya ke suto atá rodiao po e ngande nube ri perito, suto ten ke rejá a un lao to peso y enrreo ri pekaro anchoba. Suto ten ke kolé ku kamma ma kampía ke atá pueta aí lande suto. ² Preteno tañío a Jesús, ma primó y ma perfesionaró ri ma fe. Po e chuchumeko ke jué pueto lande ri Ele, ele a aguantá ma kru, a ichá ri meno begguensa sí, y a sendá aí mano rerecha ri trono ri Rioso. ³ Asina ke pensá sobre ri Ele, aké ke a sopottá e oposisió ri ma pekarore kontra Ele memo, pa enú kansá nú endi korasone y ané rindí. ⁴ Enú a aguantá nú ni trompiao kontra ma pekaro ata e punto ri pola. ⁵ Y enú a obbirá ri e aliento ke a insiña kumo a moná: "MONÁ MÍ, NÚ PENSÁ KOLENDO SOBRE MA KUSA RI RISIPLINA RI ÑO NI KANSÁ KUANDI BO SEA KORREGÍO PO ELE. ⁶ POKKE ÑO A SÉ RISIPLINÁ A TO AKÉ KE ELE KELÉ, Y ELE A SÉ KATIGÁ A TO MONÁ KE RESIBÍ ELE''. ⁷ Aguantá ma sufrimiento kumo risiplina. Rioso tá tratá ku enú kumo moná. Pero, ¿ ke moná e ke pae sabé risipliná nú ? ⁸ Pero si enú tené risiplina, la kuá to ma gende kompattí, antose enú sendá legítimo y moná sí nú. ⁹ Asina ke, suto a tené pae endi tiela ke risipliná suto nú, y suto a repetá ané. ¿Nú rebé suto antose oberesé un pito má a pae ri ma epiritu, y bibí ? ¹⁰ Pokke po un mano, pae ri suto tan risipliná suto po un pito ría, kumo a paresé korretto pa ané. Pero po uto, Rioso sé aselo po bien ri suto pa suto polé kompattí santirá sí. ¹¹ Ningún risiplina a pesé jarocha endi momento, pero ngande ri doló. Pero, e memo tá prorusí un fruto ri jutisia pa aké kiene a sendá prattikao po ele. ¹² Asina ke fottalesé mano sí ke tá koggá y luría rébile sí. ¹³ Asé kaddume retto pa pié sí, pa lo ke sea kojo sea roblao nú sino ke sea sanao. ¹⁴ To enú ten pegsiguí ma pa, y tambié ma santirá e memo ke suto tá nesesitá pa miná a Rioso. ¹⁵ Tené kuilao pa ngrasia ri Rioso fattá nú a ninguno, y ke ningún raís ri amaggura kresé pa ndá poglema, pa ke un chochá sendá kontaminao po ele nú. ¹⁶ Tené kuilao pa nú abé ningún inmoralirá segsual o gende pringá kumo Esaú, kiene po un kumina a bendé rerecho ri nasimiento sí. ¹⁷ Pokke enú sabé ke repué, kuandí ele a resiá ererá ma lilenga, ele a sendá ichao, pokke ele a jayá pendolá nú pa ma arrepentimiento, aunke ele a buká ku lagrima. ¹⁸ Pokke enú a miní nú ri un montaña ke polé sendá tokao nú, un montaña ri kandela addiente, okurana y charraská. ¹⁹ Enú a miní nú ri un toke ri trompeta, ni un nboso ke sé jablá pablabra ke kiene a kuchalo a pirí ke ningún uto palabra fuera jablao pa ané. ²⁰ Pokke ané a polé aguantá nú kusá ke jué mandao pa ané: '' SI TAMBIÉ UN NIMAO TOKÁ MA MONTAÑA, TEN KE SÉ LEBANTAO PEÑÓN''. ²¹ Tan kobadde a sendá e bisión ke Moisés a risí: ''I ATÁ ATERRAO Y TEMBLANDO''. ²² En bé ri e kusa, enú a miní pa Monde Sión y ma siurá ri Rioso mbibo, ma Jerusalén ri nusulú, y a un chochá ri ángele en jarochería. ²³ Enú a miní ri ma asamblea de ri ma primó ke a ssendá regitrao endi nsulú. A miní a Rioso ma Jues ri to gende, y a ma epiritu ri ma justos ke a sendá pefesionao. ²⁴ Enú a miní a Jesús, ma meriaró ri un pakto, y ma pola sobá ke jablá mejó ke ma pola ri Abel. ²⁵ Miná pa enú ichá nú aké ke tá chitiando. Pue si ané a eskapá nú kuandi ané a ichá aké ke abbetí endi tiela, chochá meno suto tan eskapá, si suto tan alejá ri Aké ke tá abbetí suto renje nsulú. ²⁶ Endi un momento Mboso sí a etremesé ma tiela. Pero aora Ele a prometé a chitiá: ''UTO BEGÁ, I A TAN ETREMESÉ MA TIELA Y MA NSULÚ.'' ²⁷ E palabras: ''UTO BEGÁ'', tá signifiká ma eliminasió ri ma kusa ke polé sé etremesía, sendá e kusa, ri ma kusa ke jueba echo, pa ke ma kusa ke nú polebá sé etremesía polé durá. ²⁸ Po tanto, kujendo un reino ke nú poleba sé etremesío, suto te ke sé agraresío y ri e manera aroremo a Rioso ku reberensia y temó. ²⁹ Pokke Rioso ri suto sendá un fuego ke sabé konsumí.