¹ Isajüw michijquiaw micojow monxey, "¡Xecambaj!" at michijquiaw micojow montaj, "Icona teajndiün mejawan xeyay monajneaj" ² Iyacan asoet mimüman, iyacan asoet, cos nej ngome xentaj, at miün xique ngome minoj nej xique. Ijchan mawün tiül nej ajüyjüy ngo majneaj arang, at mawün tiül mijiw nej meáwan ajiür naxey. ³ Tengwüy, xique sanasoond tiül apix nej at sanajüquich miotaag miün atnej wüx wijquiat. Sanüüch majlüy atnej nawaag iüt, atnej noic iüt ngo majiür yow at sanüüch mandeow wüx mind anganeow yow mawaag teonic nej. ⁴ Ngome sanandiümüw nicuajind micual nej, cos acual wüx ajüyjüy. ⁵ Cos mimüman najüyjüy najtaj nej, at nej tajiür icon wüx ngo maxing teajüyjüy. Nej tapiüng: "Xique sanayamb xemonxey, cos nejiw üjchiw xic süet at sanganeow, sapix milan sap at nelitlit jael, nejüneay nüeteran at leaw namonts apmanganeowaran." ⁶ Wüx aag ayaj, Xique sanarang noic otüing coet naag sats ngome sanüüch mamong. Xique sanarang noic otüing iüm mapal teombas nej atquiaj ngo maxeom mitiiüd nej. ⁷ Nej apmayamb monxey mimonxey nej, nej ngome apndom matüch majaw nejiw. Nej apmayamb nejiw ngome apndom maxeom. Ndoj nej apmapiüng: "Xique sanandilil najaw ombas xenoj, cos najneaj samongoch naquiiüb ngome atnej samongoch nganüy." ⁸ Nej ngo majaw Xique leaw tenguial nüüch nej mitrigo nej, jayatsüy mivino nej, at miaceite nej, at miün jane teamawün majiür miplata nej at mioro nej, leaw ndoj miün nejiw lamüjchiw Baal. ⁹ Nganüy xique sanüüch majiür linomb mitrigo nej wüx apmaxaing apiür at Saneay Xicueaj a vino wüx apmatüch majlüy. Xique sananood leaw Saneay milan sap at nelitlit jael leaw tayar mepojchay ombas nej. ¹⁰ Ndoj miün xique sanasoond tiül apix nej majawüw nej mimonxey nej, at Sanaxaing Xewix nejinguind ngome apndom mawün nej wüx. ¹¹ Xique at miün sanüüch ndom meáwan apac omeaats, minangosnüt nej, wüx natang caaw apac omeaats, wüx Nüt Axeodaran, at meáwan nangosnüt atiiberan majlüy. ¹² Xique sanajarrich niüng apiürüw uva at najneaj mixiülüw nej, wüx ayaj leaw nej tapiüng: 'Ajcuwa agüy leaw tangüyiw xic monxey leaw sajiür.' xique sanarang nüuuch noic peat, ajcüwa nimal nacüliw tiwajchiüc apmüetiw. ¹³ Wüx amb tiül minangosnüt Baales Xique sanayac ngo majneaj wüx ombás nej, wüx nej andocooch pomb teombasüw nejiw, wüx nej asojquiay najneaj ayac ombiüm micual owix nej at nelitlit andiig nej at laáw mandüuub minaxey nej atquiaj landroj omeaats wüx Xic, aag ayaj nembeat poch andeac Teat Dios." ¹⁴ Xique sanatüch alinomb nawüywüy mandilil. Xique sanaquiüüb mamb andüy tiül nawaag iüt at sanasaj nangan poch. ¹⁵ Xique sanandilil nüüch linomb niüng apiürüw uva, at püjchiün iüt minüt Acor atnej noic lejquian apal nden maxeom omeaats mamong. Nej müm najtaj apmendeac masaj xic atnej wüx arang nüx, atnej andeac wüx ajcüwa nüt taw Egipto. ¹⁶ Wüx aag a nüt quiaj, nembeat poch andeac Teat Dios, ique Apmepaj Xenüt mesaj xic, 'Xenoj ic', at nomiün ique langome apmepaj Xenüt, mendeac 'XeBaal'. ¹⁷ Xique nganüy sanawün tembeay minütiw Baales; minütiw nejiw nomiün langome apmleaam imeaats." ¹⁸ Wüx aag a nüt quiaj sanayac xepoch nandeacanaag napat nimal nacüliw tiwajchiüc, at naag quiec ocueaj mbas acats. Xique sanambiülüüch mitiiüd jeng, ocueaj nendojquiay nembiyay, at montsoj wüx moncüy wüx iüt, at nejiw apiüjmoj mameayiw najneaj. ¹⁹ Xique sanayac xepoch narang minoj nomiün. Xique sanayac xepoch narang najneaj naxey, arang palan, ayac mipoch nej mandiüm xeyay, at mambeol mbich meáwan. ²⁰ Xique sanayac xepoch naquiiüb ic nomiün noic miün ximeaats, at a ique apmejaw jane nej Teat Dios. ²¹ Wüx aag a nüt quiaj, Xique sanandeac nangoch, aag agüy nembeat poch ocueaj Teat Dios, Xique sanandeac nasaj ajcüwa mbas acats, at apmendeacüw masajüw ajcüwa iüt. ²² Aag a iüt apmasaj osaab soex, aag a jayats vino at aceite ndoj at nejiw apmasajüw Jezreel. ²³ Xique Sananeay sanayac wüx a iüt cam, at sanandiüm alinomb wüx Lo Ruhamá. Xique sanasaj Lo Ammí: 'Marrey icona Ammí Attá, at nejiw apmasajüw xicon,' "Ique Xeteatiün Teat Dios"