gajpow apeic nembaag
1
Israel, indilil mejaw TEAT DIOS aag ayaj miDios, cos tejmiüc ajcan irang xeyay ngo majneaj.
2
Indeac naag mipoch aag a neseot leaw irang at indilil mejaw TEAT DIOS. Isaj NEJ: "Iwün tiül xicon meáwan ngo majneaj at ijaw iyar leaw najneaj, atquiaj alndom nüjchiün Ic leaw najneaj andeac xembeayiün natamüjchiün minüt.
3
Asiria ngome apmawün xicon wüx; xicona ngome sanajtepiün wüx cawüy namban tiül montsoj. Xicona ngome sanandililean napiüngan xenajiütan leaw sarangan naag xewixan: 'Icona xediosan xecuejaiün,' wüx Ique ajcüwa nipilan ndeoj ngo majiür miteat ndej apmaxeom monajneaj"
4
"Xique sanataag majneaj acuetaiw xic; Xique sanandiümüw xeyay, cos leaw Sajcüy najaw nejiw lanawün laáw tiül xic.
5
Xique sanajlüy atnej ajmiüc naquind wüx Israel; nej apmajpoet atnej mbaj najcül at apmayac mioxiich nej atnej monopoots xiül nacül Líbano.
6
Mipüüig nej aptsatsam; atsüjyay ombas apmarang atnej mixiül olivas, at ajmboc angan atnej ajmboc angan monopoots xiül najlüy Líbano.
7
Ajcüwa nipilan leaw acüliw quiaj tiül minden apmandilileaw; nejiw apmapacüw alinomb atnej tsatsaw osaab xiül at apmajpoet atnej cambeac. Apmajaraw majüic atnej nejiw namonts yow ocueaj Líbano.
8
¿Efraín, cuane Xic sajiür maquiüjpüw narangüch dios? Xique sananguiay indeac at sanajaw ic. Xique sajlüy atnej noic owil ciprés, leaw aop nej ngo mamong ateaic; imiün wüx Xique aw leaw najneaj temerang."
9
¿Jane nendüy leaw alndom maxeom omeaats tiül ajcüwa agüy cama? ¿Jane axeom omeaats wüx ajcüwa agüye nejay alndom mandüy? Cos ajcüwa mitiiüd TEAT DIOS naleaing ajlüy, at ajcüwa ambüw najneaj nejiw tiül apmajüyiw, nganüy ajcüwa nemejchiw najiw apmajtochiw maquiüjpüw.