¹ Aag agüy mipoch Teat Dios leaw tiün wüx ombas Oseas micual Beeri wüx nüt almapac Uzías, Jotam, Acaz at a Ezequías, montangtang nenajiüt ocueaj Judá at wüx nüt almapac Jeroboam micual Joás, natang nenajiüt ocueaj Israel. ² Wüx anomb andeac Teat Dios amb wüx ombás Oseas, Nej tasaj nej: "Carriür, iyamb nop najüyjüy najtaj ndoj iquiiüb. Nej apmajiür micual nej naw wüx ajüyjüy. Aag a cambaj cam atnej najüyjüy najtaj ajlüy cos landroj omeajtsüw Teat Dios." ³ Atquiaj, Oseas tamb taquiiüb a Gomer micual Diblaim at nej tajiür nop micual nej. ⁴ Teat Dios tendeac masaj Oseas: "Iich manüt Jezreel. Cos Xique sanayac ngo majneaj wüx ombas aniüng Jehú cos tambiyaw xeyay nipilan tiül Jezreel at Xique wüx aniüng montangtang monajiüt ocueaj Israel sanatondoch nomiün arangüw natang. ⁵ Apmatüch a nüt wüx Xique sanajmbaj nejenguiay ocueaj Israel tiül püjchiün iüt ocueaj Jezreel." ⁶ Gomer tajiür micual nej alinomb wijquiat nop nine nüx. Ndoj Teat Dios tasaj a Oseas: "Iich manüt Ruhamá, cos Xique langome sanandiümüw aniüng Israel, cos Xique ngome sanawün wüx ximeaats leaw arangüw. ⁷ Atan miün quiaj, Xique sanandiümüw xeyay aniüngüw Judá at Xique sanawüniw wüx, Xiquiay, Nejay Teat miDiosüw nejiw. Xique ngome sanawüniw wüx naag nejenguiay, naag nendojquiay, wüx montsoj, naag cawüy tengwüy monjtep cawüy." ⁸ Nganüy, wüx landoj lamacueat achech Lo Ruhamá, nej tajiür alinop micual nej wijquiat nench. ⁹ Quiaj Teat Dios tasaj nej: "Iich manüt Lo Ammí, cos icona ngome Xecambaj icon at miün Xique ngome sanarang MiDiosan." ¹⁰ Atan miün quiaj, minipilan Israel apmateowaran atnej wiiüd najlüy mbeay ndec, aag ayaj ngome apndom mapeaxaran mateowaran. Aag ayaj apmajlüy nguiane nejiw tasoiquiw: "Icona ngome xecambaj icon", nejiw nganüy apmasoiquiw: "Icona nganüy micambaj Teat Dios leaw almapac." ¹¹ Micambaj Judá at micambaj Israel apcanchiümoj alinomb. Nejiw apmarriüjtüw nop minatangüw nejiw at apmajtepiw wüx iüt apmarang noic najneajay nüt minüt Jezreel.