¹ Ndoj ajlüy meawan ag ayaj, ag a teat natang nenajiüt tatepich minajiüt Amán micual Hamedata Agagueo, ndoj tayac nej natang ocuejiw mi monrang najiüt nej. ² Meawan mi mos teat natang nenajiüt leaw alchetemoj teombeay iüm aquejliw micosüw nejiw atmien aguejriw omalüw teombas Amán, atnej landoj lamasaj nejiw teat natang nenajiüt. Nganüy Mardoqueo ngo maquel micos nej at ngo manguer omal nej. ³ Quiaj ajcüw mi mos teat natang nenajiüt leaw aliwquiaj tasajüw a Mardoqueo: "¿ Neol ngo mitar andeac teat natang nenajiüt?" ⁴ Meawan nüt tengüial masajüw nej, nomban ngo mandiüm mayar nej andeacüw. Quiaj tasajüw Amán nguineay tengüial marang Mardoqueo majüq ampacül mien atquiaj, cos Mardoqueo landoj masaj nejiw Judío nej. ⁵ Wüx tajaw Amán naleaing Mardoqueo ngo maquel micos nej at ngo manguer omal nej, Amán xeyay tajcüy. ⁶ Tien tiül nej mambiy ag mien Mardoqueo, cos ag mos ocueaj natang nenajiüt lamasajüw nej ngün mi cambaj Mardoqueo. Amán andiüm mambiy meawan ajcüw Judíos, mi cambaj Mardoqueo, ajcüw aliw tiül mi iüt Asuero. ⁷ Wüx mien amelich caaw (ag a ayaj caaw ocueaj Nisán) tiül pajpic neat ocueaj natang nenajiüt Asuero, nejiw tasütiw nieng ajlüy Amán, meawan nüt at meawan caaw nejiw asütiw, ndoj tajawüw tiül gajpic caaw tajmiec asütiw nejiw (caaw ocueaj Adar). ⁸ Quiaj Amán tasaj teat natang nenajiüt Asuero: "alningüy tiül mi iüt noic ajlüy wijchien cambaj. Ag a cambaj ne alinoic andüjpiw, ndoj ngo mayariw ag a poch altiül mi nawiig teat natang nenajiüt, ngo metam macüliw ningüy. ⁹ Ndot teat majmiec imal imeats, indeac mandeowüw, xique sanangüy gajpowüw mil tomien plata teowixaw ajcüw nipilan najlüyiw wüx majawüw mitomien teat natang nenajiüt." ¹⁰ Quiaj tawün iquial owix nej ndoj tüüch Amán micual Hamedata Agagueo, moncüy aweag Judíos. ¹¹ Teat natang nenajiüt tasaj Amán: "Sanandilil ag a tomien quiaj nüüch iq mi quieb mi cambaj. Ndoj irang wüx leaw que indiüm." ¹² Quiaj ajcüw monrang mi nawiig teat natang nenajiüt tajpajüw tiül gajpar nüt wüx amelich caaw, quiaj tarangüw tiül nawiig andeac tiül meawan leaw Amán landoj lamandeac masaj monjier najiüt tiül nimix mine mi cambaj teat natang nenajiüt, ajcüw monlüy wüx nimix mine cambaj, at monjaw wüx nadam quiriw cambaj, atmien quiaj ajcüw monrang najiüt todo ag nadam quiriw cambaj, meawan nimix nine cambaj at nadam quiriw cambaj tarangüch wüx nawiig atnejiw andeacüw. Tayacüch wüx nawiig minüt teat natang nenajiüt Asuero ndoj tambün naag iquial owix nej. ¹³ Ag a nawiig tambüw mayacüw nejayej müjchiw meawan cambaj ocueaj teat natang nenajiüt, mandrojchiw ombas nomban ag a nipilan judíos, naw wüx monguich ndoj wüx natang ombas, nimix nine at montaj, tiül mien noic nüt - amb gajpar nüt ocueaj gajpic caaw (ag ayaj caaw ocueaj Adar) at xeajguiam meawan leaw ajiüruw. ¹⁴ Meawan ag a nawiig quiaj tüjchiw nembeat tiül meawan cambaj. Nejiw tasajüw meawan nipilan tiül cambaj, netam majlüyiw mien meawan. ¹⁵ Ajcüw a monjaich nawiig najen jen mien tojoyiw mam mi poch teat natang nenajiüt. Ag a nawiig quiaj atmien tajayichaw tiül nadam iüm ocueaj Susa. Tapots müjchiw angüniw ag natang nenajiüt maqüieb Amán, nganüy cambaj Susa ngo majawüw cuane najlüy.