¹ Hama jangu, kuda kemoyo wangu nokukumbira kanga kuna Mwali,pausolo pa Israeli ndiko kuti vhapirisiwe. ² Nokuti ndino vhapupulira kuti vhanavhirayirira Mwali, asi havhayeti nokuzivha. ³ Nokuti, zwavhanga vhasingazivhi kunaka ka Mwali kavho vhamene, vhakasazwiyesa pasi pakunaka ka Mwali. ⁴ Nokuti Khirisito ndiugumo woulayo pakutswaka kunaka kuno umwe noumwe unotenda. ⁵ Nokuti Mozisi unonwala atshiti unhu unoyeta kunaka kunolehwa noulayo:"Utshapira nazwo." ⁶ Asi kunaka kunobva pakatenda kunolevha kudlali :"Usangoti mumoyo mumo ndiyani utshakwira kumakole?'(ndiko kujikitisa,Khirisito pasi); ⁷ kana ndiyani,'Utshajikitira kukajikajika?"'(ndiko,kubudisa Khirisito kuna vhakafa). ⁸ Asi zwinolevheni?"Ihwi iri pedlo newe, muulomo mumo nomu nomoyo."Mumo ndiro ihwi lokutenda, latinopalija. ⁹ Kuti kana utshipupula noulomo uwo kuti Jeso ndiye Ishe,nokutenda mumoyo mumo kuti Mwali wakawumusa kunevhakafa, utshapirisiwa. ¹⁰ Nokuti unhu unotenda, numoyo ndikho kunakisiwa, unopupula nowulomo ndikhopirisiwa. ¹¹ Nokuti mamwalo anoti,"Aninani utshatenda kaali hanga shonisiwi." ¹² Nokuti uJuta nowu Giriki havhasiyani.Nokuti umwe ndiye Ishe wavhose,wakafuma kunavhose vhanodana kaali. ¹³ Nokuti aninani unodana kuzina la Ishe utshapirisiwa. ¹⁴ Zwino vhatshadana seni kunaiye wavhasina kutenda kaali?Vhatenda seni kuna iye wavhasina kuhwa?Vhasthihwa seni kana kusina upalijiri? ¹⁵ Vhatshapalija seni, kana vhasingatumwi?-Sezwazwakamwagwa,"zwitshihwi zwakanaka seni soka javhanopalija evangeri wezwinhu zwakanaka!" ¹⁶ Asi vhose havhana kuyingira mahwi loufalo.Nokuti Isaya unoti,"Ishe, ndiyani wakatenda zwatakapalija?" ¹⁷ Nayezwo kutenda kunovhuya nokuhwa, nokuhwa kunovhuya neihwi la Khirisito. ¹⁸ Asi ndinoti,"Havhana kuhwa na?"Ehe,zwirikazwo."Ihwi lavho lakabuda kunyika yose,namahwi avho kumagumo enyika." ¹⁹ Hati ndinoti,"Vha Israel havhana kuzivha na ?" Pakutanga Mozisi unoti,"Nditshamusa kutshamwakenu noluji gusingahwisisi." ²⁰ Na Isaya asingahli unoti,"Ndikawaniwa navhasina kunditswaka.Vhanga vhasina ndavha nemi ndakasumbija kavhali." ²¹ Asi kuvha Israel unoti,"Ndika tambunuja mavhoko angu zuvha lose kuvhanhu vhasinga ingiri navhanokakavhaja."