¹ Tinotanga kulumbijiwa kamuli futhi naa?Totswaka naa lunwalo ngunoyenda kamuli, kana gunobva kamuli, sevhamwe vhavhu, tingalimbijiwa? ² Imwi muli lunwalo gwakanwagwa mumoyo yedu, gunozikanwa nokuvhagwa navhanhu vhose. ³ Makavhoneka kuti muli lunwalo gwa Khirisito, gwakagajigwa nesu.Gusina kunwagwa ne ingi asi ne Mwiya Utswene wa Mwali.Gusina kunwagwa pamoyo weihwe, asi mumoyo wounhu. ⁴ Kutenda kakadlali tinako kuna Khirisito kusanhu kavha Mwali. ⁵ Hatiti takakwana isu timene kuti titeme tshinhu timene.Asi, kukwana kedu kunobva kuna Mwali. ⁶ Ndi Mwali wakayeta kuti tivhe vhalanda vhesungano itswa.Isungano itswa isi yolunwalo asi ndiye Mwiya.Lunwalo gwakanwagwa zwinovhulaya,asi Mwiya unopa vhupenyu. ⁷ Zwino kana kushumira kakavhuyisa lufu kakatemwa nolunwalo gwemahwe - gwakavhuya nokupenya kakadlalo kevhanatukana vha Izirayeri vhkakonwa kutala kumeso ka Mozisi.Nokuda kokupenya ketshiso tshitshe,kangakutshi phenyesesa. ⁸ Saka kushumira ke Mwiya hakugavhi nokupenya kukugwane naa? ⁹ Nokuti kana kushumira kokutongisa kakavhuyisa kupenya kukugwane,seni kushumira kokolulama kutshakunda pakupenya! ¹⁰ Nokuti,nayitsho tshakapenyisa hatshina kupenyisa kana patshinhu itshi, titshifananija nokupenya kunokunda. ¹¹ Nokuti kana itsho tshinopinda tshanga tshiri tshokupenya,zwikugwane seni itsho tshinogala itsho tshiri pakupenya! ¹² Nayezwo zwinetalisiro, yakadlalo tinolevha tisingahli nepatuku. ¹³ Tisingayeti sa Mozisi,wakayesa tshifukijiro kumeso kuke kuti vhana vha Izirayeri vhalege kutalira vhukuma kuguma kezwi nopenya zwitshipinda ¹⁴ Asi vhakakhwatisiwa mufugwa javho.Nokuti kuswiki pa zuvha lanasi, pavhayivhala thesitamendi yakale,tshifukijiro tshinogovhapo.Hatshina kubvisiwa, nokuti muna Khirisito tshofanigwa kubvisiwa. ¹⁵ Asi nanasi, kana Mozisi atshivhala,tshifukijiro tshiripo pa moyo yavho. ¹⁶ Asi kana unhu atshitendevhukira kuna Ishe, tshifukijiro tshinobvisiwa. ¹⁷ Zwino Ishe Mwiya.Zwino pane Mwiya wa Ishe,ndipo panesununguko. ¹⁸ Zwino isu tose,tiniti titshatalila nemeso asina kuthivhijigwa, kupenya ka Ishe.Tino sandugwa titshifanana noufananijo iyowo titshibva pakupenya kumwe titshiyenda kune kumwe kupenya,sezwinobva kuna Ishe, iye Mwiya.