¹ Hetshi tshikhathi tshetshitatu tshandinovhuya kamuli."Ulandu umwe noumwe unofanigwa mkumirigwa nemilomo mivhiri kana mitatu yevhutanzi." ² Ndakambomuvhuja ndikati vhose vhakatshinya kale nevhose vhatshinya ndiripo gwetshipiri,ndikati kavhali futhi:Kana ndovhuya futhi,handitshadovha ndikavhalegerera. ³ Ndomuvhuja hezwi nokuti munotalira sumbijo ya Khirisito unolevhereka mandiri.Iye asingakomwi simba kamuli.Asi,unesimba mamuli. ⁴ Nokuti wakalovhegwa patshipambano nokukomwa simba ,asi unolalamisiwa nesimba la Mwali.Nesuvho hatina simba maali, asi titshalalama pamwepeji naye nesimba la Mwali kamuli. ⁵ Muzwiyejeni imwi vhenevhazwo,kuti muvhone kana muli pakutenda.Muzwiyejeni imwi mumene.Hamuzivhi naa imwi mumene,kuti Jeso Khirisito uli mamuli?-kana kuti,zweshuwa,makomwa kuzwiyeja. ⁶ Asi mutshazivha zwenu kuti imwi hamuli vhakalasiwa. ⁷ Zwino tinorabhira kuna Mwali kuti tilege kuyeta tshinhu tshimwepeji tshakayipa .Hatirabhiriri kuti isu tivhoneke kuti takatendeka.Asi kuti imwi muyete zwakalulama tshero isu titsheta setikalasiwa. ⁸ Nokuti hatikoni kuyeta tshinhu tshinopambana neshuwa,asi tshinothusana neshuwa. ⁹ Nokuti tinofala kana isu titshikomwa simba imwi mutshivha nesimba.Tinorabhira kuti mukwanise. ¹⁰ Ndinomwala zwinhu yezwi ndirikule nemwi kuti kana ndavhapo ndilege kuyeta neswiri - sezwandakapiwa na Ishe simba lokukhwatisa,lisiri lokuphutsha. ¹¹ Pakupejisira ,vhakulu vhangu,falani! Shumani, munyalajiwe,ivhani nomoyo umwepeji, galani mulugale.Mwali weludo nolugale utshavha nemwi. ¹² Mukisani vhamwe nokukhisa kutswene. ¹³ Vhatswene vhose vhatshamumukisa. Kuda ka Ishe Jeso Khirisito, noludo gwa Mwali, nokuhwisisana ke Mwiya Utswene ngazwivhe nemwi mose.