¹ Witu en zaman em baya ne akim nu maperenta wawean kelalenan waki tana’ Israel. Laa o mea mouw siesa tou waki Betlehem-Yehuda ma’an si ka’awuna wo se rua oki’na tuama mea waki daerah Moab kaa laa mena-ena’ maname tanume se tou wo’oseiy. ² Ngaran ni tou i ti’i nyi’a mouw e Elimelekh, ngaran ni ka’awuna e Naomi wo ngaran ne rua oki’na Mahlon wo si Kilyon, em baya nea se tou-tou Efrata waki Betlehem-Yehuda; wo sea nu neiy mouw i ka’ayola waki daerah Moab, mena’ mouw sea maname. ³ Kamurian mate mouw si Elimelekh, ka’awu ni Naomi, i ka’ayo si wewene i ti’i neiy i katele’u ampit se rua oki’na. ⁴ Sea nu rua se minedo wewene Moab; si kasa ketare-tare si mekengaran Orpa, si karua si mekengaran Rut; wo nisea se maena’ witu wo’o wona’na mapulu’ nge te’un eng keurena. ⁵ Laa o mate mouw kangkasi nisea nu rua, nyi’a i yi’i si Mahlon wo si Kilyon, i ka’ayo si wewene i ti’i si kinaliongan se rua oki’na wo si ka’awuna. ⁶ Kamurian mantalouw sia ampit se rua manuangna wo sia marengi waki daerah Moab, karengan waki daerah Moab nisia si liminga kaa si TUHAN si minee mola ghenang se umat-Na wo meela kekaanen wia nisea. ⁷ Takar rumo’u momi sia waki paena’anna i ti’i, mewali-wali ampit se rua manuangna i ti’i. Eng katoroan nisea nu kasuatan witu lalan kaa laa mewewareng mea waki tana’ Yehuda, ⁸ lumila’ mouw si Naomi wia se rua manuangna i ti’i: “Mea mouw, marengouw siesa o siesa mea waki wale ni ina’na; TUHAN satorona si mapa’atola nupus-Na wia nikoo, tanu neiy i papa’ato miouwla wia se tou-tou minate mouw i ti’i wo wia niaku; ⁹ satorona witu eng karunia ni TUHAN kouw maka’ato tampa paterungan, siesa o siesa waki wale ni ka’awuna.” Laa o sionganna mola sea, ta’an nisea se maame’ ampit eng kaente’na ¹⁰ wo lumila’ wia nisia: “Reiy’, nikeiy keiy kumi’it ampit nikoo mareng wia se bangsamu.” ¹¹ Ta’an si Naomi si limila’: “Marengouw, oki-oki’ku, ka’a ku’a re’en kouw mekeki’it ampit niaku? E reiy’ ku’a re’en e reiy’ mouw laa wawean kasi sioki’ tuama si laa i patoukula kaa laa siwonla ka’awumu ee sangari? ¹² Marengouw, oki-oki’ku, mea mouw, karengan taleusouw tu’a niaku mekeka’awu. Sa wona’na eng genangku: Wawean arapan i wee niaku, wo ma’anouw tu’u em bengi i yi’i ku makaka’awu, awesla ma’anouw tu’u ku tumimea’pe’la oki’ tuama, ¹³ ma’an tu’una kouw ma’ena’ i ka’ayo sea taretumou? Ma’an tu’una karengan e ni’itu kouw lewo’ sa reiy’ tumaang en tou reiy’ sika’awu? Te’a mouw satorona tuana, oki-oki’ku, e reiy’ ku’a re’en e wa’akat lebe pe’it em pine’ankumi ta’an nikouw, karengan e lawas ni TUHAN neiy i ka’ayayat witu niaku?” ¹⁴ Mame’ mouw kasi sea ampit eng kaente’na, o laa si Orpa sumiong si manuangna i ti’i kaa melelaa mouw, ta’an si Rut si minena-ena’ kimaput wia nisia. ¹⁵ Lumila’ mouw si Naomi: “Minarengouw si kawulengmu wia se bangsana wo wia em baya se empungna; marengouw kumi’itla si kawulengmu i ti’i.” ¹⁶ Ta’an em pokeiy ni Rut: “Te’a mouw mase’esek niaku metetele’ula nikoo wo mareng ampit e reiy’ kimi’itla nikoo; karengan wisa koo mea, witu mouw kangkasi aku mea, wo wisa koo mapawengi, witu mouw kangkasi aku mapawengi: bangsamu mouw se bangsaku wo Empungmu mouw si Empungku; ¹⁷ wisa koo mate, niaku tu’u ku mate maname, wo manamome aku i le’osla. Teinti’i mouw satorona si TUHAN mukum niaku, awes tare e lebepe’ kasi ta’an e ni’itu, sa wona’na sapa tu’u en tuma’atasla niaku wia nikoo, reiy’ si walina ta’an i te em patean!” ¹⁸ Eng katoroan si Naomi nu limoo’, kaa si Rut si makete i te laa kumi’it mewali-wali ampit nisia, mena’ mouw sia mengila-ngila’ wia nisia. ¹⁹ Wo kumelangouw sea nu rua i ka’ayo sea i ka’ayola waki Betlehem. Eng katoroan nisea nu maghorem mea waki Betlehem, ringka’ mouw se minapekasa eng kota i ti’i karengan nisea, wo se wewene-wewene se limila’: “Naomi ku’a re’en si ti’i?” ²⁰ Ta’an nisia si limila’ wia nisea: “Te’a mouw patotorela niaku Naomi; totorenola aku Mara, karengan Si Makakuwasa si timuana mola kelaker em pe’it wia niaku. ²¹ Ampit lawas e wuta ku minea, ta’an ampit e lawas memayos si TUHAN minarengi niaku. Ka’a ku’a re’en kouw matotorla niaku Naomi, karengan si TUHAN si limongkotouw sairi mapero niaku wo Si Makakuwasa si minapa eiy mola en cilaka wia niaku.” ²² Tuana mouw si Naomi minareng mewali-wali ampit si Rut, wewene Moab i ti’i, manuangna, si kimi’it minarengi waki daerah Moab. Wo i ka’ayo mola sea waki Betlehem witu eng ketareani e noras meupu jelai.