¹ Oh Empung sumesuli’, ee TUHAN, ee Empung sumesuli’, mapa’ato mouw! ² Tumo’orouw, eeh Akim em bumi, i suli’ mouw wia se tou-tou tingkeiy sapa en tinuana neala! ³ Pirape’ eng keure kasi se tou-tou fasik, eeh TUHAN, pirape’ eng keure kasi se tou fasik merio-rio? ⁴ Nisea se makero’mi e lelila’an-lelila’an e reiy’ siadat wo em baya ne tou se matuanala eng kalewo’an i ti’i se timingkeiy. ⁵ Umat-Mu, eeh TUHAN, se rinimu’umuk neala, wo se kapunya’an-Nu nuesa se neiy i lotoiy nea; ⁶ balu wo se tou wo’oseiy se rineret nea, wo se oki-oki ula se winunu’ nea; ⁷ wo nisea se limila’: “TUHAN si reiy’ limoo’ nyi’a, wo si Empung ni Yakub si reiy’ mepadungla nyi’a.” ⁸ Weeanola ghenang, heiy tou-tou we’engel witu e nelet ne rakyat! Heiy tou-tou ba’abal, kawisa ku’a re’en kouw make eng kelali’iketan em budimu? ⁹ Nisia si timanemla en talinga, ma’anouw tu’u reiy’ luminga? Nisia si minentuk em beren, ma’anouw tu’u reiy matu’us? ¹⁰ Nisia si simiasa se bangsa-bangsa, ma’anouw tu’u reiy’ laa mukum? Nisia si minajarla en tine’u wia se tou? ¹¹ TUHAN si mete’ula en tetiro’an-tetiro’an ne tou; eng kaulitna em baya nyi’a e reiy’la sipenoron waya. ¹² Ma’aruiyola se tou se siniasa-Mu, eeh TUHAN, wo se tinuru’-Mula waki Taurat-Mu, ¹³ kaa laa melelomponla nisia witu e nendo-nendo kacilaka’an, i ka’ayo kiaren eng ko’okor i wee se tou fasik. ¹⁴ Karengan si TUHAN si reiy’ laa tumea’ se umat-Na, wo se kapunya’an-Na nuesa se reiy’ laa i tele’u-Nala; ¹⁵ karengan e nukum e laa mareng wia eng ka’adilan, wo e laa ki’iten em baya ne tou se ulit e nate. ¹⁶ Seiy ku’a re’en si timo’or i wee niaku mesaru se tou-tou lewo’, seiy ku’a re’en si minapa’ato i wee niaku mesaru se tou-tou se matuanala eng kalewo’an? ¹⁷ Sa reiy’ si TUHAN si timulung niaku, ta’are’ aku mena’ waki tampa kapenesan. ¹⁸ Eng katoroan niaku nu maghenang: ”Ne’aku e maoghe,” takar e nupus lale’-Mu, eeh TUHAN, en timobol niaku. ¹⁹ Sakawisa maawes eng kelaker eng genang witu em batinku, em pangiboran-Nu e masenaangla si imukurku. ²⁰ Ma’an tu’u e maasa’an ampit Nikoo en takhta kawurukan, en timiro’la em bencana timo’otolela eng katataapan? ²¹ Nisea se minaasa’an mesaru e imukur ne tou ulit, wo mapaloo’o-loo’ola fasik e raa’ ne tou se reiy’la siselok. ²² Ta’an si TUHAN si kota bentenku wo si Empungku nyi’a mouw si kuntung watu teterunganku. ²³ Nisia si laa sumuli’ wia nisea em pasiwo-siwon lewo’ nea, wo karengan eng kalewo’an nea Nisia si laa munengla nisea; TUHAN, Empung ta, si laa munengla nisea.