1 Haleluya! Lo’orenouw e ngaran ni TUHAN, lo’orenouw, heiy hamba-hamba ni TUHAN, 2 heiy tou-tou se meiy melayanla waki wale ni TUHAN, waki podol em bale ni Empung ta! 3 Lo’orenouw si TUHAN, karengan si TUHAN i ti’i si le’os, memazmurouw i wee e ngaran-Na, karengan e ngaran i ti’i e wangun! 4 Karengan si TUHAN si minelengola si Yakub i wee-Nisia, Israel e minamuali kasa i keupus-Na. 5 Eng kaulitna niaku ku mete’u, kaa si TUHAN i ti’i si kasa wangko’ wo si Tuhan ta i ti’i si lumantouwla se reiy’ sa mina’asa empung. 6 TUHAN si matuanala sapa ni’i kepa’ar-Nala, waki langit wo wia em bumi, waki tasik wo waki pakasa’an e lawanan wangko’; 7 Sia si minatasi e semu waki tempok em bumi, Sia si simiwo eng kerap maki’itla e naro, Sia si rimou’mi e reghes waki ghorem em penu’utu-nu’utulan-Na. 8 Nisia mouw si minewe minate se oki-oki’ polon Mesir, le’os se tou ka’apa se tekapen, 9 wo minapa eiy eng kowa’-kowa’ wo e mijizat-mujizat mea witu eng keunerannu, heiy Mesir, masu’usuk si Firaun wo masu’usuk em baya se pegawaina. 10 Nisia mouw si minewe minekala se kelaker bangsa, wo minunu’ se raja-raja ente’: 11 Si Sihon, raja ne tou Amori, wo si Og, raja em banua Basan, wo e reiy’ sa mina’asa keraja’an Kana’an, 12 wo mineela en tana’ nea tanume eng kapunya’an pusaka, kapunya’an pusaka wia se Israel, umat-Na. 13 Oh TUHAN, e ngaran-Nu nyi’a mouw i wee eng keure-urena; oh TUHAN, Nikoo koo ghenangen see’ o see’. 14 Karengan si TUHAN si laa mee ka’adilan wia se umat-Na, wo laa meupus wia se hamba-hamba-Na. 15 Berhala ne bangsa-bangsa nyi’a mouw em perak wo e mas, siniwo e lawas ni tou, 16 makapunya suma, ta’an e reiy’ mete’u meila-ila’, makapunya weren, ta’an e reiy’ mete’u lumoo’, 17 makapunya talinga, ta’an e reiy’ mete’u luminga, o kangkasi e nasengan e reiy’la witu en suma nea. 18 Tanu e ni’itu mouw e minamualina se tou-tou simiwo nyi’a, em baya ne tou se ma’eman wia nyi’a. 19 Heiy kaum israel, lo’orenouw si TUHAN! Heiy kaum Harun, lo’orenouw si TUHAN! 20 Heiy kaum Lewi, lo’orenouw si TUHAN! Heiy tou-tou se meide’la si TUHAN, lo’orenouw si TUHAN! 21 Lino’orouw si TUHAN waki Sion, Sia si maena’ waki Yerusalem! Haleluya!