¹ Witu masa ni’itu e weteng-weteng waki kaol ni Musa neiy i wacala ampit lininga ne rakyat. Kina’atoala neiy i kepatik witu eng kaol i ti’i, kaa se tou Amon wo se tou Moab se reiy’ toro ghumorem jema’ah ni Empung i wee eng keurena. ² Karengan nisea se reiy’ simungkul se tou Israel ampit e roti wo e rano, awes tare se minee tetoro si Bileam sumaru se tou israel rio i kutoknala. Ta’an si Empung meiy si rimoba eng kutok i ti’i minamuali berkat. ³ Katoroan nisea nu liminga em binaca’an en Taurat i ti’i nisea se tima’atasla em baya ne peranakan waki se tou Israel. ⁴ Ta’an nu reiy’pe’ e masa ni’itu si imam Elyasib si pinopo kaa laa metetegha’la e ruragh-ruragh em bale ni Empung meiy, wo se makapunya em paato-atoan rebet ampit si Tobia, ⁵ se simadiala e nesa ruragh wangko’ i wee si Tobia i ti’i. Nu reiy’pe’ nyi’a se tou se maalime witu e ruragh i ti’i en tetule sesakeiy, kamania, em pakakas-pakakas wo en sesempe pa’esa nga mapulu’an waki gandum, nanggor wo e lana minamuali hak ne tou-tou Lewi, em baya ne kumekantar wo em baya ne menaang witu em pepalen leloangan, wo en sesempe wuntul i wee em baya ne imam. ⁶ Katoroan em peristiwa i ti’i nu minamuali niaku ku reiy’ waki Yerusalem, karengan witu en te’un katelu nga pulu’ o rua em paperenta’an ni Artahsasta, raja Babel, niaku ku limaa sumaru si raja. Ta’an reiy’ pirala eng keurena ku lumiwaghla wia si raja kaa ku me’a mouw. ⁷ O laa ku i ka’ayola waki Yerusalem wo lumoo’ eng kalewo’an siniwo ni Elyasib i wee eng kamang ni Tobia, karengan i wee si Tobia i yi’i en sinadiana mola e nesa ruragh witu em podol em bale ni Empung. ⁸ Niaku ku kasa mineupi’, o laa i lawaku em baya em perabot em bale ni Tobia mea witu luar e ruragh i ti’i. ⁹ Kamurian i reoku lenasen e ruragh i ti’i, nu reiy’ mouw i tu alingku sumoup maname em pakakas-pakakas em bale ni Empung, en tetule sesakeiy wo eng kamania. ¹⁰ O kangkasi e niatokula kaa en sesawang-sesawang i wee se tou-tou Lewi e reiy’ ma’an mekasa i weela, i ka’ayo se tou-tou lewi wo em baya ne kumekantar se malukar siesa o siesa se timingkas minea waki penguma’anna. ¹¹ Niaku ku mineneselela em baya ne makua-kuasa, pokeiyku: “Ya ka’a em bale ni Empung e neiy i te i wayala tuana?” O laa erurengkula se tou-tou Lewi i ti’i wo i warengkula witu en tampana. ¹² Takar se minapekasa tou Yehuda se minaali kasi en sesempe pa’esa nga mapulu’an waki gandum, nanggor wo e lana witu em penu’utu-nu’utulan. ¹³ Tanume se tumetegha’-tumetegha’ em penu’utu-nu’utulan pinopoku si imam Selemya wo si Zadok, siesa tou kasa sigha’ eng kaol, wo si Pedaya, tou Lewi, kasuatan si Hanan bin Zakur bin Matanya si neiy i pakisawangla wia nisea, karengan se tou-tou i ti’i se i papokeiyla lale’. Nisea se sinarakanan e lukar kaa laa tumu’utul e wewetengan wia se patuari-patuari nea. ¹⁴ Oh Empungku, ghenangenouw aku karengan eng kapualitan i ti’i wo te’a mouw perere’inla e reiy’ sa mina’asa pasiwo-siwon e lukar en tinuanaku mola witu em bale ni Empungku wo e reiy’ sa mina’asa pelayanan witu eng goremna! ¹⁵ Witu e masa ni’itu linoo’ku waki Yehuda se tou-tou masiri mapuus e nanggor witu e nendo Sabat, o kangkasi se tou-tou se maali-ali eng ke’ekes-ke’ekes eng gandum wo mamuatla nyi’a witu natas ni keledai, o kangkasi e nanggor, wu’ana nanggor, wu’ana ara, wo e minegheghioan muatan em paalin nea mea waki Yerusalem witu e nendo Sabat. Niaku ku ngime’enge’la nisea eng katoroan sea nu mewangker em bahan kekaanen. ¹⁶ O kangkasi se tou en Tirus se maena’ witu se maali-ali sera’ wo e minegheghioan barang pewangker wo mewangker ni’itu wia se tou-tou Yehuda witu e nendo Sabat, awes tare waki Yerusalem. ¹⁷ O laa ku mineneselela se pamuka-muka – pamuka-muka ne tou Yehuda, pokeiyku wia nisea: “Kalewo’an sapa em patuanan niouwla i yi’i ampit melangkoiyla eng kakudusan e nendo Sabat? ¹⁸ Reiy’ ku’a re’en se nene moyangmu se simiwo mola en tuana, i ka’ayo si Empung ta si minapa eiy e minapekasa kacilaka’an i yi’i witu nikita wo witu eng kota i yi’i? Sapa ku’a re’en kouw mekemaksut mapasela e nupi’ en timoro se Israel ampit limangkoiy eng kakudusan e nendo Sabat?” ¹⁹ Sa i tu kime’eremouw witu em pepalen-pepalen leloangan Yerusalem melelaa e nendo Sabat, i reoku peneten em pepalen-pepalen wo perentangkula rio te’a pawuka’an i ka’ayo lumangkoiy e nendo Sabat. Wo i tampakula se pirala tou waki se oki-oki’ku witu em pepalen-pepalen leloangan, rio reiy’la muatan ghumorem witu e nendo Sabat. ²⁰ Ta’an se tou-tou mabelante’ wo se mewangker e minegheghioen barang i ti’i kamurian se minapawengi kangkasi witu luar em beton Yerusalem minaka esa ruala. ²¹ Laa o ku ngume’enge’la nisea, pokeiyku: “Ya ka’a kouw minapawengi wia luar em beton? Sa kouw sumiwo ni’itu mekasape’ kasi e laa i tena’ku e lawasku wia nikoo.” Rengan e nedo ni’itu nisea se reiy’ mouw mineiy kasi witu e nendo Sabat. ²² O kangkasi neiyku i reo se tou-tou Lewi lumenasla en touna wo meiy tumayur witu em pepalen-pepalen leloangan kaa laa mekekudusla e nendo Sabat. Ee Empungku, ghenangenola niaku kangkasi karengan eng kapualitan i ti’i wo i koupus i tela niaku i ki’it e nupus lale’-Mu wangko’! ²³ Witu e masa ni’itu kangkasi linoo’oku kaa se pirala tou Yahudi se minepeka’awula se wewene-wewene Asdod, wewene-wewene Amon ka’apa se wewene-wewene Moab. ²⁴ Esa nga weteng waki se oki-oki’ nea se masusuiy em baasa Asdod ka’apa em baasa ne bangsa walina i ti’i wo se reiy’ mete’u susmusuiy em baasa Yahudi. ²⁵ Niaku ku mineneselela nisea, i kutokkula sea, wo se pirala tou witu nelet nea se wineweku wo en sinawutku em bu’ukna wo i reoku sea tumiwa’ demi si Empung, en tuana: “Te’a ma’an mekasa kouw sumarakanla se oki-oki’ wewenemu wia se oki-oki’ tuama nea, ka’apa medo se oki-oki’ wewene nea tanume si ka’awu i wee se oki-oki’ tuamamu ka’apa i wee en toumu nuesa! ²⁶ Reiy’ ku’a re’en si Salomo, raja Israel, si simiwo mola en dosa karengan eng kapualitan tanu e ni’itu? Ma’anouw tu’u witu nelet ne tuana eng ka’asa’an bangsa e reiy’la siesa raja tanu nisia, si neiy i keupusla ni Empungna wo si pinopo ni Empung i ti’i minamuali raja ne minapekasa Israel, ta’anouw nisia tu’u si kina’alian witu en dosa ne wewene-wewene wo’oseiy i ti’i. ²⁷ Sapa ku’a re’en se tou se lewo’ sa reiy’ luminga kaa nikouw kangkasi kouw simiwo e reiy’ sa mina’asa eng kalewo’an wangko’ i ti’i, nyi’a i yi’i minaroba lale’ witu si Empung ta karengan minepeka’awu se wewene-wewene wo’oseiy?” ²⁸ Siesa waki se oki-oki’ ni Yoyada bin Elyasib, imam wangko’ i ti’i, nyi’a mouw si manuang ni Sanbalat, tou eng Horoni i ti’i. Eng karengan e ni’itu neiyku i ure’ sia rumou’mi waki niaku. ²⁹ Ee Empungku, ghenangenola kumura sea kimewurla en jabatan imam ma’an en teta’aran tanume em baya ne imam wo se tou-tou Lewi. ³⁰ Linenaskula sea waki ereiy’sa mina’asa wo’o sapa e wo’oseiy wo neiyku i tataapla e lukar-lukar i wee em baya ne imam wo se tou-tou Lewi, siesa o siesa witu en supu pepa’ayangenna, ³¹ O kangkasi neiyku i tataapla e nesa kenaramen kaa laa mesesadiala lungu witu e nedo-nedo neiy i ketantu wo i wee e wua’na-wua’na kasa ketare-tare. Ee Empungku, ghenangenola niaku, demi eng kasejahtera’angku!