¹ Na’asaren ni Nehemia bin Hakhalya. Witu en sumedot Kislew en te’un karua nga pulu’, katoroan niaku nu witu em puri Susan, ² meiy mouw si Hanani, si meta’esa’an waki se patuari-patuariku ampit se pirala tou waki Yehuda, Niaku ku minueiyla nisea en tanume se tou-tou Yahudi se neiy i kaliseiy, neiy i kase’epangi waki petetaangen wo en tanume e Yerusalem. ³ Pokeiy nea wia niaku: “Tou-tou se minena’pe’ waki daerah maname, se neiy i kase’epangi waki petetaangen, se witu eng kapedisan wangko’ wo se witu eng ka’ada’an neiy i kase’ese’. Beton Yerusalem e minaghogharouw wo em pepalen-pepalen leloanganna e minarengisouw.” ⁴ Katoroan liningaku e nabar i yi’i, rumuberouw aku maame’ wo mengasi’ eng keurean pirala nga endo. Niaku ku minoso wo masombayang witu en sinaru ni Empung pakasa’an e langit, ⁵ pokeiyku: “Ee TUHAN, Empung pakasa’an e langit, Empung si kasa wangko’ wo ke’ekel, si timiboiy witu en teta’aran wo e nupus lale’-Na witu sitou si meupus wia-Nisia wo si minena-ena’ maki’itla em perenta-perenta-Na, ⁶ i wee mouw en talinga-Mu wo wuka’anouw em beren-Nu wo linganome en sombayang ni hamba-Mu en teakan i yi’i ni’i pa’ayokume witu en sinaru-Mu oat o wengi i wee se tou Israel, hamba-hamba-Mu i ti’i, ampit maaku e reiy’ sa mina’asa dosa en tinuana meiy mola nu tou Israel wia-Nikoo. O kangkasi niaku wo se kaum ne me’urangku nu simiwo mola en dosa. ⁷ Nikeiy keiy kasa mouw simelok witu-Nikoo wo reiy’ maki’itla em perenta-perenta, katataapan-katataapan wo e natoran-natoran neiy mouw i perenta-Mula wia si Musa, hamba-Mu i ti’i. ⁸ Ghenangenola e nuwu’ neiy-Mu i ower wia si Musa, hamba-Mu i ti’i, nyi’a i yi’i: Sa kouw maroba lale’, kouw laa-Ku i sabureseiyla witu nelet ne bangsa-bangsa. ⁹ Ta’an, sa kouw murikiti wia-Niaku wo minena-ena’ maki’itla em perenta-perenta-Ku ma’an matuanala nyi’a, takar ma’anouw tu’u se tou-tou neiy i kasea’mu se waki tempok e langit, se laa-Ku eruren sea sumeup wo aling-Ku waki tampa em pineleng-Ku mola kaa laa sumiwo e ngaran-Ku mena’ maname. ¹⁰ Reiy’ ku’a re’en nisea i yi’i se hamba-hamba-Mu wo umat-Mu se neiy mouw i waya-Mumi ampit eng kaente’an-Nu kewangko’ wo ampit e lawas-Mu ente’? ¹¹ Ee, TUHAN, weeanouw talinga wia en sombayang ni hamba-Mu i yi’i wo wia en sombayang ne hamba-hamba-Mu se pa’ar meide’la e ngaran-Nu, wo ma’anouw se hamba-hamba-Mu se mua’la e nendo i yi’i wo maka’ato en tongkoupusen waki sitou i yi’i.” Katoroan e ni’itu niaku i yi’i ku sumesiwo eng kekoo’on ni raja.